Váidaluslávlagat 3

₁Mun lean olmmái

gii lean šaddan gillát

Hearrá moari rissi.

₂Son lea ádján mu seavdnjadassii,

moskkuseavdnjadii.

₃Mu vuostái son lea bajidan gieđas

ain ođđasis.

₄Son gaikkodii mu oačči

ja loahpahii mu liikki,

cuvkii buot mu dávttiid.

₅Son huksii muvrra mu ovdii,

birastahtii mu mirkkuin ja váivviin.

₆Son bijai mu ássat seavdnjadassii,

olbmuid gaskii geat leat jápmán áigá juo.

₇Son válddii mu gitta

aman beassat báhtarussii,

son čanai mu lossa láhkkiiguin.

₈Vaikko mun bárggun ja fuoikkun,

de son ii gula mu rohkadusa.

₉Son muvrii mu geainnu gitta

čullojuvvon geđggiiguin,

dagai mu bálgá veadjemeahttumin johtit.

₁₀Son lei munnje

nugo njágadeaddji guovža,

dego ledjon mii lea čiehkádan.

₁₁Son čádjidahtii mu luottas,

gaikkodii mu ja guđii mu njaŋgát.

₁₂Son gelddii dávggis ja divui mu

njuolaidis moallan.

₁₃Son ráiggai mu monimuččaid

njuollaskuohpus njuolaiguin.

₁₄Mun gárten buot olbmuid bogostahkan,

sin bilkolávllan beaivvis beaivái.

₁₅Son gallehii mu rihča urtasiiguin,

attii munnje márona juhkat.

₁₆Son dettii mu vuolás gavjii,

cuvkii mu bániid čievrrain.

₁₇Buot buorre lea jávkan mu eallimis,

mun vajáldahtten mii lihkku lea.

₁₈Mun dadjen: Mun in šat veaje,

Hearrá lea váldán mus doaivvu.

₁₉Mun muittán iežan vártnuhisvuođa

ja ruovttuhisvuođa,

dat lea munnje máron ja mirko.

₂₀Dan mun jurddašan álo,

dat čuohcá munnje sakka.

₂₁Dat givssida mu,

ja mun váivašuvan.

₂₂Hearrá árbmugasvuođas

ii leat loahppa,

su váibmoláđisvuohta ii noga goassege.

₂₃Dat lea ođas juohke iđida,

stuoris lea su oskkáldasvuohta.

₂₄Mun dajan: Hearrá lea mu oassi,

mun dorvvastan sutnje.

₂₅Hearrá lea buorre dasa

gii vuordá su ja ohcá su.

₂₆Buorre lea jaskatvuođas

vuordit veahki Hearrás.

₂₇Buorre lea olbmái

guoddit geassá nuorravuođas.

₂₈Čohkkájehkos son okto ja orros jávohaga,

go Hearrá bidjá su guoddit nođiid,

₂₉deddos son ámadaju eatnamii

– ain sáhttá leat doaivu.

₃₀Jorgalehkos son niera dasa gii doške,

gallehuvvos son hiddjádusain.

₃₁Hearrá ii hilggo agálaččat.

₃₂Jos son lea moraštahttán,

de son fastain árpmiha

stuorra oskkáldasvuođastis.

₃₃Ii leat su miela mielde vuortnuhit

ja moraštahttit olbmuid.

₃₄Go dulbmet julggiid vuollái

buot eatnama fáŋggaid,

₃₅go botnjet olbmo vuoigatvuođa

Alimusa čalmmiid ovddas,

₃₆go biehttalit olbmos su vuoigatvuođa

– iigoson Hearrá oainne dan?

₃₇Gean sátni ollašuvvá?

Almma visot dáhpáhuvvá

nugo Hearrá cealká?

₃₈Almma bahá ja buorre boahtá

nugo Alimus gohčču?

₃₉Manne dalle ealli olmmoš váidala

suttuidis bálkká?

₄₀Suokkardehkot ja guorahallot

geainnuideamet

ja máhccot Hearrá lusa.

₄₁Bajidehkot gieđaid ja váimmu

albmái, Ipmila guvlui.

₄₂Mii leat suddudan

ja nággáruššan du vuostá,

don it leat addán ándagassii.

₄₃Don gokčet iežat moriin

ja doarrádallet min,

don goddet seasttekeahttá.

₄₄Don gokčet iežat balvvaiguin

maid čađa rohkadus ii beasa.

₄₅Don dahket min rihpan

ja hilggohassan

álbmogiid gaskii.

₄₆Buot min vašálaččat

njezzot midjiide.

₄₇Min oassin lea šaddan hirbma ja hávdi,

heavahus ja duššadeapmi.

₄₈Gatnjalat golget mu čalmmiin,

danne go mu álbmot lea duššamin.

₄₉Mu gatnjalat golget heaittekeahttá,

dat eai noga

₅₀ovdal go Hearrá geahččá vuolás

almmis ja oaidná.

₅₁Munnje čuohcá geahččat

iežan gávpoga nieiddaid bákčasa.

₅₂Dat geat doarridit mu almmá siva haga,

bivdaledje mu dego lotti.

₅₃Sii ádje mu eallinaga gáivui,

sii geađgádedje mu.

₅₄Čázit bádde mu oaivvi badjel,

mun jurddašin: Dát lea mu loahppa.

₅₅Hearrá, mun čuorvvun du nama

gáivvo čiekŋalasas.

₅₆Don gulat mu čuorvasa –

ale dahpa beljiidat go mun ánuhan

geahpádusa ja bestojumi.

₅₇Don boađát mu lusa go mun čuorvvun,

don cealkkát: Ale bala!

₅₈Hearrá, don čuoččuhat mu ášši,

don lonistat mu heakka.

₅₉Don oainnát dan vearrivuođa

maid mun gillán, Hearrá.

Veahket mu oažžut vuoigatvuođa!

₆₀Don oainnát mu vašálaččaid

mávssahanhálu,

buot sin bahás juonaid.

₆₁Hearrá, don gulat go sii hiddjidit mu,

don oainnát sin bahás áigumušaid.

₆₂Mu vašálaččat savkkástallet

ja humeštit mu vuostá duojážassii.

₆₃Fuomáš, mo sii dahket mu bogostahkan

gos sii ain čohkkájit dahje čuččodit.

₆₄Hearrá, mávssat sidjiide sin daguid.

₆₅Sevnnjodahte sin jierpmi,

divtte garuhusa deaivat sidjiide.

₆₆Hearrá, doarrit sin moaristat,

ale suova sin eallit

iežat almmi vuolde.