3. Mosesgirji 10

₁Arona bártnit Nadab ja Abihu válddiiga goabbáge dollalihtiska, bijaiga daidda ášu, gilvviiga dan ala suovvasiid ja buvttiiga ná Hearrá muođuid ovdii vieris dola mii ii lean dahkkojuvvon nugo son lei gohččon. ₂Dalle Hearrá luhtte vulggii dolla mii lovttii sudno, ja soai jámiiga Hearrá muođuid ovdii. ₃Moses dajai Aronii: “Dát lea dat man birra Hearrá celkkii:

₄Moses rávkkai lusas Arona čeazi Ussiela bártniid Mišaela ja Elsafana ja dajai sudnuide: “Manni ja guoddi vieljaideatte bassibáikki luhtte siidda olggobeallái.” ₅Mišael ja Elsafan loaiddasteigga ovdan ja guttiiga sudno báiddiid siste siidda olggobeallái, nugo Moses lei gohččon.

₆Moses dajai Aronii ja su bártniide Elasarii ja Itamarii: “Allet divtte vuovttaid heaŋgát luovusin alletge gaikkot biktasiiddádet, vai ehpet jámáše ja vai Hearrá ii moaráhuvaše oppa Israela searvegoddái. Muhto din vieljat, buot israellaččat, ožžot čierrut daid geaid Hearrá dolla bolddii. ₇Allet mana eret almmustusgoađi uvssa luhtte, amadet jápmit, dasgo dii lehpet vuidojuvvon Hearrá oljjuin.” Sii dahke nugo Moses gohčui.

₈Hearrá sártnui Aronii: ₉“Go dii áigubehtet mannat almmustusgoahtái, de ehpet oaččo juhkat viinni ehpetge eará garra juhkamuša, it don eabage du bártnit, amadet jápmit. Dán mearrádusa dii galgabehtet álo doallat buolvvas bulvii, ₁₀vai máhttibehtet earuhit basi das mii ii leat bassi ja buhttása das mii lea buhtismeahttun, ₁₁ja dii galgabehtet oahpahit israellaččaide buot lágaid maid Hearrá lea gulahan sidjiide Mosesa bokte.”

₁₂Moses dajai Aronii ja Elasarii ja Itamarii, su bártniide geat leigga báhcán: “Váldet dan borramušoaffara mii lea báhcán Hearrá dollaoaffariin, ja borret dan suvrutkeahttájin áltára luhtte, danin go dat lea allabassi. ₁₃Dii galgabehtet borrat dan bassi sajis. Dat lea du ja du bártniid oassi Hearrá dollaoaffariin. Nu Hearrá lea gohččon mu. ₁₄Mielgga mii lea bajiduvvon ja čoarbbeali mii lea addojuvvon oaffarin, dii galgabehtet borrat buhtis báikkis, don ja du bártnit ja nieiddat, dasgo dat lea addojuvvon du ja du bártniid oassin israellaččaid searvevuođaoaffariin. ₁₅Čoarbbeali mii addojuvvo oaffarin ja mielgga mii bajiduvvo, dii galgabehtet buktit oktan dollaoaffarbuiddiiguin ja bajidit Hearrá muođuid ovdii; dat lea du ja du bártniid oassi agálaččat, nugo Hearrá lea gohččon.”

₁₆Moses ozai suddooaffarbohká, muhto dat lei boldojuvvon. Dalle son dajai moaris Elasarii ja Itamarii, Arona bártniide geat leigga báhcán: ₁₇“Manne doai bolddiide suddooaffarealli eahppige borran dan bassi sajis, vaikko dat lea allabassi? Hearrá attii dan dudnuide vai doai váldibeahtti eret searvegotti suttuvealggi ja doaimmaheahppi sidjiide soabahusa Hearrá muođuid ovddas. ₁₈Oaffarealli varra ii buktojuvvon sisa bassibáikái. Danin doai livččiide galgan borrat dan bierggu bassi sajis, nugo mun lean gohččon.” ₁₉Aron dajai Mosesii: “Odne soai leaba oaffaruššan iežaska suddooaffara ja boaldinoaffara Hearrá muođuid ovddas, ja dattetge dát lea deaividan mu. Jos mun ieš livččen borran suddooaffara odne, livččiigo dat leamaš Hearrá miela mielde?” ₂₀Go Moses dan gulai, de son duđai.