3. Mosesgirji 15

₁Hearrá sártnui Mosesii ja Aronii:

₂Daddji israellaččaide: Jos olbmá rupmašis lea oačči golgan, de dat lea buhtismeahttun golgan. ₃Son lea buhtismeahttun nu guhká go su váivi bistá, leaččai dal golgan dahje ii. ₄Buot man alde buohcci veallá ja buot man alde son čohkká, šaddá buhtismeahttumin. ₅Juohkehaš gii guoská su oađđinsadjái, galgá bassat biktasiiddis ja basadit; son lea buhtismeahttun eahkeda rádjái. ₆Juohkehaš gii čohkána dakkár sadjái mas buohcci lea čohkkán, galgá bassat biktasiiddis ja basadit; son lea buhtismeahttun eahkeda rádjái. ₇Juohkehaš gii guoskkaha buohcci, galgá bassat biktasiiddis ja basadit; son lea buhtismeahttun eahkeda rádjái. ₈Jos dat gii buohcá golgama, čolgada buhtis olbmo ala, de dat geasa čolga lea deaivan, galgá bassat biktasiiddis ja basadit; son lea buhtismeahttun eahkeda rádjái. ₉Juohke diŋga man alde buohcci lea čohkkán riidedettiin, šaddá buhtismeahttumin. ₁₀Jos muhtun guoská diŋgii mii lea leamaš buohcci vuolde, de son lea buhtismeahttun eahkeda rádjái. Jos muhtun giehtaguššá dakkár diŋgga, de son galgá bassat biktasiiddis ja basadit; son lea buhtismeahttun eahkeda rádjái. ₁₁Jos olmmái gii buohcá golgama, guoská muhtun olbmui ovdal go lea doidán gieđaid čázis, de dat olmmoš geasa son guoskkai, galgá bassat biktasiiddis ja basadit; son lea buhtismeahttun eahkeda rádjái. ₁₂Láirelihti masa buohcci lea guoskan, galgá cuvket, muhto muorralihti galgá doidit čázis.

₁₃Go buohcci buorrána váivvistis, de su buhtástusáigi lea čieža beaivvi. Dasto son galgá bassat biktasiiddis ja basadit ráinnas čázis, ja de son lea buhtis. ₁₄Gávccát beaivvi son galgá váldit guokte turtelduvvá dahje guokte eará duvvá ja boahtit Hearrá muođuid ovdii almmustusgoađi uvssa lusa ja addit daid báhppii. ₁₅Báhppa galgá oaffaruššat nuppi suddooaffarin ja nuppi boaldinoaffarin. Ná báhppa galgá Hearrá muođuid ovddas doaimmahit sutnje soabahusa buhtismeahttunvuođas mii lei boahtán golgamis.

₁₆Jos olbmás manná siepman, de son galgá bassat oppa rupmaša; son lea buhtismeahttun eahkeda rádjái. ₁₇Buot biktasiid ja juohke náhkkeduoji man ala siepman lea boahtán, galgá bassat čázis; dat leat buhtismeahttumat eahkeda rádjái. ₁₈Jos olmmái veallá nissoniin ja sus manná siepman, de soai galgaba basadit; soai leaba buhtismeahttumat eahkeda rádjái.

₁₉Go nissonis leat mánodávddat ja varra golgá su rupmašis, de son lea buhtismeahttun čieža beaivvi. Dat gii guoská sutnje, lea buhtismeahttun eahkeda rádjái. ₂₀Buot man alde son veallá mánodávddaid áigge, šaddá buhtismeahttumin, ja buot man alde son čohkká, šaddá buhtismeahttumin. ₂₁Dat gii guoská su oađđinsadjái, galgá bassat biktasiiddis ja basadit; son lea buhtismeahttun eahkeda rádjái. ₂₂Dat gii guoská masage man alde son lea čohkkán, galgá bassat biktasiiddis ja basadit; son lea buhtismeahttun eahkeda rádjái. ₂₃Jos soamis guoská masage mii lea su oađđinsajis dahje man alde son lea čohkkán, de son lea buhtismeahttun eahkeda rádjái. ₂₄Jos olmmái veallá nissoniin, de su mánodávddat dahket olbmá buhtismeahttumin čieža beaivái. Buot man alde olmmái veallá, šaddá buhtismeahttumin.

₂₅Jos nissonis leat vardimat máŋga beaivvi, vaikko dat eai leat su mánodávddat, dahje jos mánodávddat bistet badjel áiggi, de son lea buhtismeahttun nu guhká go vardimat bistet, nugo mánodávddaid áiggege. ₂₆Buot man alde son veallá dahje čohkká vardimiid áigge, šaddá buhtismeahttumin nugo mánodávddaid áiggege. ₂₇Juohkehaš gii guoská daidda, šaddá buhtismeahttumin ja galgá bassat biktasiiddis ja basadit; son lea buhtismeahttun eahkeda rádjái.

₂₈Go nisson buhtistuvvo vardimiinnis, de su buhtástusáigi lea čieža beaivvi; de son lea buhtis. ₂₉Gávccát beaivvi son galgá váldit guokte turtelduvvá dahje guokte eará duvvá ja buktit daid báhppii almmustusgoađi uvssa lusa. ₃₀Báhppa galgá oaffaruššat nuppi suddooaffarin ja nuppigis boaldinoaffarin. Ná báhppa doaimmaha Hearrá muođuid ovddas sutnje soabahusa su vardimiin mat dahke su buhtismeahttumin.

₃₁Dii galgabehtet várjalit israellaččaid buhtismeahttunvuođas, vai sii eai jáme dan dihte go dahket buhtismeahttumin mu goađi, mii lea sin gaskkas.

₃₂Dát láhka guoská olbmái geas leat golgamat dahje geas manná olggos siepman, nu ahte son šaddá buhtismeahttumin, ₃₃nissonii geas leat mánodávddat, ja juohkehažžii, olbmái dahje nissonii, geas leat golgamat, ja olbmái gii veallá buhtismeahttun nissoniin.