3. Mosesgirji 16

₁Hearrá sártnui Mosesii maŋŋil go Arona bártniguovttos leigga jápmán, go leigga loaiddastan Hearrá muođuid ovdii.

₂Son celkkii: Cealkke vielljasat Aronii ahte son ii oaččo mannat goas ihkinassii bassibáikki ovdaloavdaga siskkobeallái ja soabahussaji lusa mii lea árkka badjelis, muđui son jápmá, danne go mun almmustuvan balvva siste soabahussaji badjelis.

₃Álo go Aron manná bassibáikái, de son galgá buktit nuorra vuovssá suddooaffarin ja viercca boaldinoaffarin. ₄Son galgá gárvodit bassi beallemasbáiddi ja atnit beallemasbuvssaid rupmašis govččasin, čatnat beallemasboahkána ja giessat beallemasturbána oaivái. Dát leat bassi biktasat, ja son galgá basadit ovdal go gárvoda daid. ₅Israellaččaid searvegottis son galgá oažžut guokte bohká suddooaffarin ja ovtta viercca boaldinoaffarin.

₆Aron galgá oaffaruššat iežas suddooaffarvuovssá ja doaimmahit soabahusa alccesis ja iežas bearrašii. ₇Dasto son galgá váldit dan guokte bohká ja bidjat daid Hearrá muođuid ovdii almmustusgoađi uvssa lusa ₈ja vuorbádit daid, nuppi Hearrái ja nuppigis Asaselii. ₉Dan bohká mii vuorbáduvvo Hearrái, Aron galgá buktit ovdan ja oaffaruššat suddooaffarin. ₁₀Dan bohká mii vuorbáduvvo Asaselii, galgá bidjat eallinaga Hearrá muođuid ovdii vai dasa doaimmahuvvo soabahus, ja de vuolggahit meahccái Asasela lusa.

₁₁Aron galgá oaffaruššat iežas suddooaffarvuovssá ja doaimmahit soabahusa alccesis ja iežas bearrašii. Go son lea goddán vuovssá, ₁₂de son galgá váldit dollalihti dievva hilaid áltáris Hearrá muođuid ovddas ja goapmira dievva njuvdojuvvon njálggahájat suovvasiid, ja doalvut daid ovdaloavdaga siskkobeallái. ₁₃Doppe son galgá bidjat suovvasiid dollii Hearrá muođuid ovdii, vai suovasbalva čiehká soabahussaji mii lea lihtumearkka badjelis. Dalle son ii jáme. ₁₄Son galgá váldit vuovssá vara ja riškalit dan suorpmain soabahussaji ovdaravdii, ja son galgá riškkuhit vara suorpmainis čieža geardde soabahussaji ovdii. ₁₅De son galgá njuovvat álbmoga suddooaffarbohká ja doalvut dan vara ovdaloavdaga siskkobeallái ja dahkat dan varain nugo vuovssá varainge. Son galgá riškkuhit dan soabahussaji ala ja soabahussaji ovdii.

₁₆Ná son doaimmaha soabahusa bassibáikái ja buhtista dan israellaččaid buhtismeahttunvuođas ja vearredaguin, buot sin suttuin. Seammá ládje son galgá dahkat almmustusgoahtái mii lea sin gaskkas buot sin buhtismeahttunvuođa siste. ₁₇Ii oktage oaččo leat almmustusgoađis dan rájes go Aron manná bassibáikái doaimmahit soabahusa, dan rádjái go son fas boahtá olggos. Go son lea doaimmahan soabahusa alccesis ja iežas bearrašii ja oppa Israela searvegoddái, ₁₈de son galgá mannat olggos áltára lusa mii lea Hearrá muođuid ovddas, ja doaimmahit soabahusa dasa. Son galgá váldit vuovssá ja bohká vara ja sihkkut dan juohke áltárčoarvái ₁₉ja riškkuhit vara suorpmain čieža geardde áltára ala. Nu son galgá buhtistit ja basuhit áltára israellaččaid buhtismeahttunvuođas.

₂₀Go Aron lea geargan doaimmaheames soabahusa bassibáikái, almmustusgoahtái ja áltárii, de son galgá buktit ovdan ealli bohká. ₂₁Son galgá bidjat goappašiid gieđaid ealli bohká oaivvi ala ja dovddastit buot israellaččaid vearredaguid ja rihkkosiid, buot sin suttuid, ja nu bidjat daid bohká oaivvi ala. De olmmái gii čuožžu das gearggusin, galgá doalvut bohká meahccái. ₂₂Bohkká oažžu guoddit buot sin suttuid ávdin meahccái, ja doppe dan galgá luoitit luovus.

₂₃De Aron galgá mannat almmustusgoahtái ja nuollat beallemasbiktasiid maid lei gárvodan go manai bassibáikái; dohko son galgá guođđit daid. ₂₄Son galgá basadit bassi sajis ja gárvodit iežas biktasiid. De son galgá mannat olggos ja oaffaruššat iežas boaldinoaffara ja álbmoga boaldinoaffara ja doaimmahit soabahusa alccesis ja álbmogii. ₂₅Suddooaffara buoiddi son galgá boaldit áltára alde. ₂₆Dat olmmái gii doalvvui bohká Asasela lusa, galgá bassat biktasiiddis ja basadit, ja de son oažžu máhccat siidii. ₂₇Suddooaffarvuovssá ja suddooaffarbohká maid varra buktojuvvui bassibáikái dagahit soabahusa, galgá doalvut siidda olggobeallái, ja daid náhki, bierggu ja gubmuid galgá boaldit. ₂₈Dat gii daid boaldá, galgá bassat biktasiiddis ja basadit, ja de son oažžu máhccat siidii.

₂₉Dán lága dii galgabehtet doallat agálaččat: Čihččet mánu logát beaivvi dii galgabehtet fástudit, iige dis oktage, leaččai son dal eatnamis riegádan olmmoš dahje vieris gii ássá din gaskkas, oaččo bargat maidege. ₃₀Dan beaivvi doaimmahuvvo didjiide soabahus, nu ahte dii šaddabehtet buhtisin, nu ahte dii buhtistuvvobehtet Hearrá ovddas buot suttuineattet. ₃₁Dat galgá leat din vuoiŋŋastanbeaivi, sabbat goas dii galgabehtet fástudit. Dát lea agálaš láhka.

₃₂Soabahusa galgá doaimmahit báhppa, dakkár gii lea vuidojuvvon ja vihahuvvon báhppan áhčis maŋŋil. Son galgá gárvodit beallemasbiktasiid, bassi biktasiid, ₃₃ja doaimmahit soabahusa bassi boššui, almmustusgoahtái ja áltárii, báhpaide ja oppa Israela searvegoddái.

₃₄Dán lága dii galgabehtet doallat agálaččat: Ovtta geardde jagis galgá soabahit buot israellaččaid suttuid.

Aron ollašuhtii gohččuma maid Hearrá lei addán Mosesii.