3. Mosesgirji 18

₁Hearrá sártnui Mosesii:

₂Cealkke israellaččaide: Mun lean Hearrá, din Ipmil. ₃Dii ehpet oaččo dahkat nugo dahke Egyptas gos dii ásaidet, ehpetge nu mo dahket Kanaanis gosa mun doalvvun din. Allet ane sin vieruid. ₄Doahttalehket mu lágaid, dollet mu báhkkomiid ja ellet daid mielde. Mun lean Hearrá, din Ipmil. ₅Dollet mu báhkkomiid ja lágaid. Juohke olbmui gii doallá daid, dat addet eallima. Mun lean Hearrá.

₆Ii oktage oaččo veallát soapmásiin gii lea su fuolki. Mun lean Hearrá. ₇It oaččo heahppášuhttit áhčát nu ahte veallát etniinat; son lea du iežat eadni, ale veallá suinna. ₈It oaččo veallát eadnebeliinat; muđui don heahppášuhtát iežat áhči. ₉It oaččo veallát oappáinat, it oaččo veallát oabbábeliinatge, gulaš son dal duinna seammá bearrašii dahje ii. ₁₀It oaččo veallát bártnát nieiddain dahje nieiddat nieiddain; muđui don heahppášuhtát iežat oačči ja vara. ₁₁It oaččo veallát iežat eadnebeale nieiddain; son lea du áhči fuolki, son lea du oabbá. ₁₂It oaččo veallát iežat siesáin; son lea du áhči fuolki. ₁₃It oaččo veallát iežat muoŧáin, son lea du eatni fuolki. ₁₄It oaččo veallát áhčát vielja áhkáin, sonhan lea du ipmi. ₁₅It oaččo veallát iežat manjiin; son lea bártnát áhkká, ale veallá suinna. ₁₆It oaččo veallát vieljat áhkáin, muđui don heahppášuhtát iežat vielja. ₁₇It oaččo veallát nissoniin ja su nieiddain, itge oaččo veallát su bártni dahje su nieidda nieiddain; sii leat lagaš fulkkežat, dat livččii heahpatlaš dahku. ₁₈It oaččo váldit áhkát oappá liigeáhkkán ja veallát suinna, nu guhká go du áhkká lea eallimin.

₁₉It oaččo veallát nissoniin gii mánodávddaid geažil lea buhtismeahttun. ₂₀It oaččo veallát lagamuččat áhkáin, amat šaddat buhtismeahttumin. ₂₁It oaččo addit ovttage mánáinat Molokii, muđui don heahppášuhtát iežat Ipmila nama. Mun lean Hearrá. ₂₂It oaččo veallát olbmáin nugo olmmái veallá nissoniin, dakkár lea fasti. ₂₃It oaččo seahkanaddat mainnage omiin, amat šaddat buhtismeahttumin. Nisson ii oaččo ásahit iežas oami ovdii, vai beassá seahkanaddat dainna; dakkár lea eartnjehas.

₂₄Allet daga iežaideattet buhtismeahttumin mainnage dákkáriin. Dasgo buot dákkáriin dat álbmogat maid mun áján eret din ovddas, leat dahkan iežaset buhtismeahttumin. ₂₅Maiddái eanan lea šaddan buhtismeahttumin. Danin mun ráŋggáštin eatnama dan vearredaguid dihte, ja dat vuvssii olggos ássiidis. ₂₆Muhto dii galgabehtet doallat mu lágaid ja mu báhkkomiid. Allos oktage dis, leaččai son dal eatnamis riegádan dahje vieris gii ássá din gaskkas, dahko ovttage diein fastivuođain. ₂₇Dakkár fastivuođaid dahke eatnama ássit ovdal din, ja eanan šattai buhtismeahttumin. ₂₈Allet divtte eatnama vuoksit din olggos danin go dahkabehtet dan buhtismeahttumin, nugo dat vuvssii olggos dan álbmoga mii lei ovdal din. ₂₉Juohkehaš gii dahká ovttage dáin fasttes daguin, galgá jávkaduvvot iežas álbmogis. ₃₀Dollet mu mearrádusa alletge ane daid fasttes vieruid maid olbmot atne ovdal din; dii ehpet oaččo dahkat iežadet buhtismeahttumin daiguin. Mun lean Hearrá, din Ipmil.