3. Mosesgirji 19

₁Hearrá sártnui Mosesii:

₂Cealkke oppa Israela searvegoddái: Lehket basit, dasgo mun, Hearrá, din Ipmil, lean bassi. ₃Juohkehaš dis galgá gudnejahttit eatnis ja áhčis ja doallat mu sabbahiid. Mun lean Hearrá, din Ipmil. ₄Allet jorgal eahpeipmiliid beallái. Allet daga alcceseattet leikejuvvon ipmilgovaid. Mun lean Hearrá, din Ipmil.

₅Go dii oaffaruššabehtet searvevuođaoaffara Hearrái, de dahket dan nu ahte dat lea Hearrá miela mielde. ₆Dan galgá borrat seammá beaivvi go dat oaffaruššojuvvo, dahje maŋit beaivvi. Dan mii báhcá goalmmát beaivái, galgá boaldit. ₇Jos soamis borrá dan goalmmát beaivvi, de dat lea fastivuohta, iige Hearrá dohkket oaffara. ₈Dat gii borrá dan, šaddá sivalažžan, dasgo son lea dahkan eahpebassin dan mii lei basuhuvvon Hearrái. Son galgá jávkaduvvot iežas álbmogis.

₉Go šaddu ráddjojuvvo du eatnamis, de it oaččo čuohppat gortni bealdoravddaid ráje itge čoaggit gordneoivviid mat leat báhcán. ₁₀It oaččo atnit maŋŋerádjama viidnegárddistat itge čoaggit gahččan viidnemurjjiid. Guođe daid gefiid ja vierrásiid várás. Mun lean Hearrá, din Ipmil.

₁₁Ehpet oaččo suoládit, ehpet gielistit ehpetge beahttit guhtet guimmiideattet. ₁₂Ehpet oaččo vuordnut veriid mu nammii, dasgo dalle don dagat Ipmilat nama eahpebassin. Mun lean Hearrá. ₁₃It oaččo váldit lagamuččastat veagal maidege itge rievidit sus maidege. It oaččo doallat beaivebálkkolačča bálkká alddát maŋit iđidii. ₁₄It oaččo garuhit bealjeheami itge bidjat čalmmeheami ovdii juoidá masa son jorrala, muhto bala Ipmilisttát. Mun lean Hearrá.

₁₅Ehpet oaččo dahkat veriid dubmedettiin. It oaččo leat bealát geafi ávkin itge riggá ávkin, muhto dubme lagamuččat vuoiggalaččat. ₁₆It oaččo vázzit birra ja bostalit iežat vieljaid, it oaččo bivdit lagamuččat heakka. Mun lean Hearrá. ₁₇It oaččo vašuhit vieljat, muhto cuiggot su, amat šaddat sivalažžan su dihte. ₁₈It oaččo mávssahit geasage itge vašuhit álbmogat olbmuid, muhto ráhkis lagamuččat nugo iežat. Mun lean Hearrá.

₁₉Galggat doallat mu lágaid. Ale divtte omiinat guokte šlája seahkanaddat oktii. It oaččo gilvit guovttelágán siepmaniid beldosat. It oaččo atnit biktasiid mat leat gođđojuvvon guovttelágán láiggis.

₂₀Jos olmmái veallá šlávvanissoniin gii lea lohpiduvvon áhkkán nuppi olbmái, muhto ii leat vel ostojuvvon friddjan dahje luitojuvvon friddjan, de dat olmmái galgá máksit vahátmávssu. Sudno ii oaččo goddit, danne go nisson ii lean luitojuvvon friddjan, ₂₁muhto olmmái galgá buktit Hearrái almmustusgoađi uvssa lusa viercca iežas vealgeoaffarin. ₂₂Go báhppa Hearrá muođuid ovddas lea doaimmahan sutnje soabahusa oaffaruššamiin viercca vealgeoaffarin, de son oažžu ándagassii suttu maid lea dahkan.

₂₃Go dii boahtibehtet iežadet eatnamii ja gilvibehtet buotlágán šattosmuoraid, de galgabehtet diktit vuosttaš šaddosiid orrut. Golbma jagi šaddosat leat didjiide gildosat; allet bora daid. ₂₄Muhto njealját jagis buot daid šaddosat galget basuhuvvot Hearrái ávvudemiin. ₂₅Easkka viđát jagi oažžubehtet borrat daid šaddosiid. Ná dii oažžubehtet mihá eambbo šattu. Mun lean Hearrá, din Ipmil.

₂₆Ehpet oaččo borrat bierggu mas lea varra. Ehpet oaččo einnostit ehpetge lohkat mearkkaid. ₂₇Ehpet oaččo čuohppat vuovttaid geađđašiin ehpetge čuohppat skávžžáid. ₂₈Ehpet oaččo nádjat mearkkaid iežadet rupmašii jápmán olbmo dihte ehpetge bidjat boalddihuvvon čálamearkkaid iežadet liikái. Mun lean Hearrá.

₂₉It oaččo heahppášuhttit nieiddat nu ahte divttát su šaddat fuorrán, vai fuorrávuohta ja heahpatlašvuohta ii deavdde eatnama. ₃₀Galgabehtet doallat mu sabbahiid ja gudnejahttit mu bassibáikki. Mun lean Hearrá. ₃₁Ehpet oaččo jorgalit jábmiid vuoiŋŋaid beallái ehpetge ohcat einnostusvuoiŋŋaid, vai dat eai daga din buhtismeahttumin. Mun lean Hearrá, din Ipmil. ₃₂Čuožžil čurgesvuovttaga ovddas, gudnejahte vuoras olbmo ja bala Ipmilisttát. Mun lean Hearrá.

₃₃Jos soames vieris ássá din eatnamii, de ehpet oaččo soardit su. ₃₄Vieris gii ássá din luhtte galgá leat didjiide dego eatnamis riegádan olmmoš. Ráhkis su dego iežat, dasgo diihan maid leiddet vierrásat Egyptas. Mun lean Hearrá, din Ipmil.

₃₅Ehpet oaččo verrošit go mearridehpet guhkkodat-, deaddo- dahje geassomihtu. ₃₆Dis galget leat rivttes veavttat, rivttes veaktageađggit, rivttes efamihttu ja rivttes hinmihttu. Mun lean Hearrá, din Ipmil, gii bukten din Egyptas. ₃₇Dii galgabehtet doallat buot mu lágaid ja báhkkomiid ja eallit daid mielde. Mun lean Hearrá.