3. Mosesgirji 22

₁Hearrá sártnui Mosesii:

₂Gohčo Arona ja su bártniid gieđahallat várrugasat bassi attáldagaid maid israellaččat basuhit munnje. Báhpat eai oaččo eahpebasuhit mu bassi nama. Mun lean Hearrá. ₃Cealkke sidjiide: Jos soamis din nális muhtumin lahkana buhtismeahttumin bassi attáldagaide maid israellaččat leat basuhan Hearrái, de son galgá jávkaduvvot mu čalmmiid ovddas. Mun lean Hearrá.

₄Arona nális ii oktage geas lea spihtáldávda dahje golgamat, oaččo borrat bassi attáldagaid, ovdal go lea šaddan buhtisin. Dát guoská juohkehažžii gii lea guoskkahan man beare mii lea šaddan buhtismeahttumin jábmi dihte, dahje dasa geas lea mannan siepman, ₅ja maiddái dasa gii lea guoskan dakkár smávvaeallái mas šaddá buhtismeahttumin dahje olbmui geas šaddá buhtismeahttumin, lehkos dat dal mii ihkinassii buhtismeahttunvuođaid. ₆Dat gii guoská masage dakkárii, lea buhtismeahttun eahkeda rádjái, iige son oaččo borrat bassi attáldagaid ovdal go lea basadan. ₇Muhto go beaivváš lea luoitádan, de son lea buhtis, ja de son oažžu borrat bassi attáldagaid, dasgo dat lea su borramuš. ₈Ieš jápmán dahje jámas gaikkoduvvon ealli son ii oaččo borrat, amas šaddat buhtismeahttumin. Mun lean Hearrá. ₉Sii galget doallat dan maid mun lean mearridan, amaset šaddat sivalažžan ja jápmit dan dihte go dahket eahpebassin dan mii lea bassi. Mun lean Hearrá guhte basuhan sin.

₁₀Ii oktage olggobealolmmoš oaččo borrat bassi attáldagaid. Mátkkálaš gii orru báhpa luhtte, dahje báhpa beaivebálkkolaš ii oaččo borrat dan mii lea bassi. ₁₁Muhto jos báhppa lea oastán šláva, de šlávva oažžu dan borrat, ja seammá láhkái šlávva gii lea riegádan su viesus; sii ožžot borrat seammá borramuša go báhppa ieš. ₁₂Jos báhpa nieida náitala olggobealolbmáin, de son ii oaččo šat borrat bassi oaffarattáldagaid. ₁₃Muhto jos báhpa nieida šaddá leaskan dahje hilgojuvvo eaige sus leat mánát, ja son máhccá áhčis vissui, de son oažžu borrat áhčis borramušaid nugo dalle go lei nuorra. Muhto olggobealolmmoš ii oaččo borrat daid. ₁₄Jos soamis meaddá borrat dan mii lea bassi, de son galgá buhtadit dan báhppii ja lasihit dasa vel viđádasa. ₁₅Báhpat eai oaččo dahkat eahpebassin bassi attáldagaid maid israellaččat oaffaruššet Hearrái ₁₆ja nu dagahit sidjiide siva ja ráŋggáštusa, go diktet sin borrat bassi attáldagaid. Dasgo mun lean Hearrá guhte basuhan daid.

₁₇Hearrá sártnui Mosesii:

₁₈Cealkke Aronii ja su bártniide ja buot israellaččaide: Jos soames israellaš dahje soames vieris gii ássá Israelis, buktá Hearrái oaffarin oami, leaččai dat dal lohpádusoaffar dahje eaktodáhtolaš oaffar maid son áigu oaffaruššat Hearrái boaldinoaffarin, ₁₉de dat galgá leat varis almmá vigi haga: vuoksá, sávza dahje gáica. Ná dat lea Hearrá miela mielde. ₂₀Ehpet oaččo oaffaruššat ealli mas lea vihki, dasgo dat ii leat Hearrá miela mielde.

₂₁Jos soamis buktá vuovssá, sávzza dahje gáicca searvevuođaoaffarin Hearrái juogo danin go áigu deavdit lohpádusa dahje danin go áigu addit eaktodáhtolaš oaffara, de ealli galgá leat almmá vigi haga, vai dat livččii dohkálaš Hearrái. Das ii oaččo leat makkárge vihki. ₂₂Ehpet oaččo oaffaruššat Hearrái ealli mii lea čalmmeheapme, mas lea doddjon juolgi dahje mii lea lápmašuvvan, dahje mas leat spárttut, durvát dahje ribon. Dakkáriid ehpet oaččo bidjat áltára ala dollaoaffarin Hearrái. ₂₃Dakkár vuovssá dahje sávzza mas lea okta lahttu ilá stuoris dahje ilá uhcci, don oaččut oaffaruššat eaktodáhtolaš oaffarin, muhto dat ii dohkke Hearrái lohpádusoaffarin. ₂₄Dakkár ealli man guolat leat čárvojuvvon, cuvkejuvvon, gaikkoduvvon dahje čuhppojuvvon, ii oaččo oaffaruššat Hearrái. Ehpet oaččo dahkat dakkára iežadet eatnamis ₂₅ehpetge oastit vierroeatnama olbmos dakkár elliid ja buktit daid biebmun Ipmilasadet. Dat leat billašuvvan, dain lea vihki, iige din attáldat leat Hearrá miela mielde.

₂₆Hearrá sártnui Mosesii:

₂₇Go gálbi, láppis dahje gihcci lea riegádan, de dan galgá diktit leat eatnis luhtte čieža beaivvi, muhto gávccát beaivvi rájes dat dohkke dollaoaffarattáldahkan Hearrái. ₂₈Ehpet oaččo njuovvat gusa ja dan gálbbi dahje sávzza ja dan lábbá seammá beaivvi. ₂₉Go oaffaruššabehtet Hearrái giittusoaffara, de galgabehtet oaffaruššat dan nu ahte dat lea Hearrá miela mielde. ₃₀Dan galgá borrat seammá beaivvi; ehpet oaččo guođđit das maidege maŋit iđidii. Mun lean Hearrá.

₃₁Dii galgabehtet doallat mu báhkkomiid ja eallit daid mielde. Mun lean Hearrá. ₃₂Ehpet oaččo dahkat eahpebassin mu bassi nama, dasgo israellaččat galget atnit mu bassin. Mun lean Hearrá guhte basuhan din. ₃₃Mun bukten din Egyptas vai livččen din Ipmil. Mun lean Hearrá.