3. Mosesgirji 4

₁Hearrá sártnui Mosesii:

₂Cealkke israellaččaide: Jos soamis fuomáškeahttá rihkku muhtun Hearrá báhkkoma ja dahká juoidá mii ii leat lobálaš, de sutnje gusket dát mearrádusat:

₃Jos vuidojuvvon báhppa sudduda ja dagaha álbmoga sivalažžan, de son galgá oaffaruššat Hearrái suddooaffarin nuorra vuovssá mii lea almmá vigi haga. ₄Son galgá doalvut vuovssá Hearrá muođuid ovdii almmustusgoađi uvssa lusa, bidjat gieđa dan oaivvi ala ja njuovvat dan Hearrá muođuid ovddas. ₅Vuidojuvvon báhppa galgá váldit veaháš vuovssávara ja doalvut dan almmustusgoahtái. ₆Son galgá buonjostit suorpma varas ja riškkuhit Hearrá muođuid ovddas vara čieža geardde bassibáikki ovdaloavdaga ovddabeallái. ₇Báhppa galgá maid sihkkut vara dan áltára čorvviide man alde njálggahájat suovvasat boldojuvvojit Hearrá muođuid ovddas almmustusgoađis. Dan vuovssávara mii báhcá, son galgá leiket boaldinoaffaráltára gurrii mii lea almmustusgoađi uvssa guoras. ₈Son galgá luvvet suddooaffarvuovssás buot buoiddi, sihke leavssusbuiddiid ja buot siskilušbuiddiid, ₉goappašiid maninčalmmiid ja buoiddi mii lea daid alde njárččáid guoras, ja stuorit vuoivvasgeaži mii luvvejuvvo oktan maninčalmmiiguin, ₁₀seammá láhkái go dat luvvejuvvojit searvevuođaoaffarvuovssás. Báhppa galgá boaldit daid boaldinoaffaráltára alde. ₁₁Vuovssá náhki ja bierggu, oaivvi ja julggiid, siskilušaid ja gubmuid, ₁₂oppa vuovssá, son galgá doalvut siidda olggobeallái buhtis báikái gosa oaffariid gunat leikejuvvojit, ja boaldit dan muoraid alde dolas. Dat galgá boldojuvvot dan báikkis gosa gunat leikejuvvojit.

₁₃Jos oppa Israela searvegoddi sudduda fuomáškeahttá ja rihkku dieđekeahttá Hearrá báhkkoma ja dahká juoidá mii ii leat lobálaš ja nu šaddá sivalažžan, ₁₄muhto dasto fuobmá iežas suttu, de searvegoddi galgá oaffaruššat suddooaffarin nuorra vuovssá. Sii galget doalvut dan almmustusgoađi lusa. ₁₅Searvegotti vuorrasat galget bidjat gieđaid vuovssá oaivvi ala Hearrá muođuid ovddas, ja vuoksá galgá goddojuvvot Hearrá muođuid ovddas. ₁₆Vuidojuvvon báhppa galgá váldit veaháš vuovssávara ja doalvut dan almmustusgoahtái. ₁₇Son galgá buonjostit suorpma varas ja riškkuhit dan Hearrá muođuid ovddas čieža geardde ovdaloavdaga ovddabeallái. ₁₈Son galgá maid sihkkut vara dan áltára čorvviide mii lea Hearrá muođuid ovddas almmustusgoađis. Dan vara mii lea báhcán, son galgá leiket boaldinoaffaráltára gurrii mii lea almmustusgoađi uvssa guoras. ₁₉Son galgá luvvet vuovssás buot buoiddi ja boaldit dan áltára alde. ₂₀Son galgá dahkat dainna vuovssáin seammá láhkái go suddooaffarvuovssáin. Go báhppa lea doaimmahan sidjiide soabahusa, de sii ožžot ándagassii. ₂₁Vuoksá galgá dolvojuvvot siidda olggobeallái ja boldojuvvot nugo ovddit vuokságe. Dát lea searvegotti suddooaffar.

₂₂Jos oaivámuš rihkku Hearrá, Ipmilis, báhkkoma ja fuomáškeahttá dahká juoidá mii ii leat lobálaš, muhto dasto fuobmá ahte lea sivalaš ₂₃dahje boahtá diehtit ahte lea suddudan, de son galgá buktit oaffarattáldahkan bohká mii lea almmá vigi haga. ₂₄Son galgá bidjat gieđa bohká oaivvi ala ja njuovvat dan Hearrá muođuid ovddas dan báikkis gos boaldinoaffareallit goddojuvvojit. Dat lea suddooaffar. ₂₅Báhppa galgá váldit suorpmain veaháš suddooaffara vara ja sihkkut dan boaldinoaffaráltára čorvviide ja leiket áltára gurrii dan vara mii lea báhcán. ₂₆Buot buoiddi son galgá boaldit áltára alde seammá ládje go searvevuođaoaffara buoiddige. Go báhppa lea doaimmahan soabahusa, de oaivámuš oažžu ándagassii.

₂₇Jos soamis álbmogis fuomáškeahttá rihkku Hearrá báhkkoma ja dahká juoidá mii ii leat lobálaš, muhto de fuobmá ahte lea sivalaš ₂₈dahje boahtá diehtit ahte lea suddudan, de son galgá buktit oaffarattáldahkan njiŋŋelas gáicca mii lea almmá vigi haga. ₂₉Son galgá bidjat gieđa suddooaffarealli oaivvi ala ja njuovvat dan boaldinoaffarsajis. ₃₀Báhppa galgá váldit suorpmain veaháš vara ja sihkkut dan boaldinoaffaráltára čorvviide. Dan vara mii báhcá, son galgá leiket áltára gurrii. ₃₁Son galgá luvvet buot buoiddi seammá ládje go buoidi luvvejuvvo searvevuođaoaffareallis. Báhppa galgá boaldit dan áltára alde hádjan mii lea Hearrá miela mielde. Go báhppa lea doaimmahan soabahusa, de dat gii lea rihkkon, oažžu ándagassii.

₃₂Jos muhtin buktá suddooaffarin lábbá, de dat galgá leat njiŋŋelas almmá vigi haga. ₃₃Son galgá bidjat gieđa suddooaffarealli oaivvi ala ja njuovvat dan suddooaffarin dan báikkis gos boaldinoaffareallit njuvvojuvvojit. ₃₄Báhppa galgá váldit suorpmain veaháš suddooaffarealli vara ja sihkkut dan boaldinoaffaráltára čorvviide. Dan vara mii báhcá, son galgá leiket áltára gurrii. ₃₅Son galgá luvvet buot buoiddi seammá láhkái go sávzzabuoidi luvvejuvvo searvevuođaoaffaris. Báhppa galgá boaldit dan áltára alde oktan Hearrá dollaoaffariiguin. Go báhppa lea doaimmahan soabahusa, de dat gii lea rihkkon, oažžu ándagassii.