Lukas 1

₁Máŋggas leat iskan govvidit daid dáhpáhusaid mat leat ollašuvvan min gaskkas, ₂nugo midjiide leat muitalan dat geat álggu rájes ledje čalmmeoaidnovihtanat ja geat šadde sáni bálvaleaddjin. ₃Nu lean munge, go lean suokkardan dárkilit visot gitta álggu rájes, mearridan čállit daid rievttes ortnegis du várás, gudnejahttojuvvon Teofilos, ₄vai dieđát man luohtehahtti lea oahpahus maid leat ožžon.

₅Herodesa, Judea gonagasa, áigge elii báhppa Sakarias gii gulai Abia báhppajuhkosii. Maiddái su áhkká Elisabet lei Arona soga olmmoš. ₆Soai leigga guktot Ipmila čalmmiin vuoiggalaččat ja eliiga láitemeahttumin buot Hearrá báhkkomiid ja njuolggadusaid mielde. ₇Sudnos eai lean mánát, danin go Elisabet lei sahkuheapme, ja soai leigga juo alla agis.

₈Muhtumin Sakarias lei iežas juhkosa vuorus doaimmaheamen báhpabargguidis Ipmila ovddas. ₉Go bálvalandoaimmat vieru mielde vuorbáduvvojedje, de su bargun šattai mannat Hearrá tempelii cahkkehit suovasoaffara. ₁₀Olbmot ledje dan botta olggobealde rohkadallamin. ₁₁Dalle Hearrá eŋgel almmustuvai Sakariasii suovasáltára olgeš bealde. ₁₂Go Sakarias oinnii eŋgela, de son suorganii ja šattai ballui. ₁₃Muhto eŋgel celkkii sutnje: “Ale bala, Sakarias, Ipmil lea gullan du rohkadusa. Du áhkká Elisabet riegádahttá dutnje bártni ja don bijat su namman Johannes. ₁₄Son šaddá dutnje illun ja ávvun, ja su riegádeapmi illudahttá olusiid. ₁₅Dasgo son šaddá stuorisin Hearrá ovddas. Viinni ja garra juhkamuša son ii juga, ja su dievva lea Bassi Vuoigŋa eatnis heakka rájes. ₁₆Son jorgala eatnagiid Israelis Hearrá, sin Ipmila, beallái. ₁₇Son manná Hearrá ovddas Elia vuoiŋŋas ja fámus, son jorgala áhčiid váimmu mánáid beallái ja addá jeagohemiide vuoiggalaš miela, ja nu son ráhkkanahttá álbmoga Hearrá boahtimii.”

₁₈Sakarias jearai eŋgelis: “Mas mun sáhtán diehtit ahte nie geavvá? Munhan lean juo boaris, ja mu áhkkáge lea eallilan olmmoš.” ₁₉Eŋgel vástidii: “Mun lean Gabriel gii čuoččun Ipmila muođuid ovddas. Mun lean vuolggahuvvon sárdnut dutnje ja buktit dán illusága. ₂₀Muhto don šattat dál gielaheapmin itge sáhte sárdnut ovdal go dan beaivvi go dát dáhpáhuvvá, danne go it jáhkkán mu sániide mat ollašuvvet go áigi dievvá.”

₂₁Olbmot vurde Sakariasa ja imaštalle manne son ádjánii tempelis nu guhká. ₂₂Go son dasto bođii olggos, de son ii sáhttán sárdnut, ja das sii árvidedje ahte son lei oaidnán oainnáhusa tempelis. Son šattai seavašit sidjiide ja bisui gielaheapmin.

₂₃Go Sakariasa bálvalusbeaivvit ledje nohkan, de son manai ruoktot, ₂₄ja soames áiggi geažes su áhkká Elisabet šattai áhpeheapmin. Vihtta mánu Elisabet orui čihkosis. ₂₅Son jurddašii: “Hearrá lea dahkan munnje dán. Son lea geahččan mu beallái ja luvven mu eret olbmuid bilkkus.”

₂₆Go Elisabet lei guđát mánus, de Ipmil vuolggahii eŋgel Gabriela muhtun Galilea gávpogii man namma lei Nasaret, ₂₇nieidda lusa gii lei lohpádaddan Josefiin, Davida soga olbmáin. Nieidda namma lei Maria. ₂₈Eŋgel bođii sisa su lusa ja celkkii: “Dearvva dutnje, don gii leat árpmihuvvon! Hearrá lea duinna.” ₂₉Son suorganii sakka eŋgela sániid dihte ja imaštii maid dát buorástahttin mearkkašii. ₃₀Muhto eŋgel celkkii sutnje: “Ale bala, Maria, don leat gávdnan árpmu Ipmila luhtte. ₃₁Don šattat máná vuostá ja riegádahtát bártni, ja don bijat sutnje namman Jesus. ₃₂Son lea stuoris ja gohčoduvvo Alimusa bárdnin, ja Hearrá Ipmil addá sutnje su áhči Davida truvnnu. ₃₃Son ráđđe Jakoba viesu agálaččat, iige su gonagasváldi noga goassege.” ₃₄Maria jearai eŋgelis: “Mo dat sáhttá dáhpáhuvvat go in leat leamaš ovttainge olbmáin.” ₃₅Eŋgel vástidii: “Bassi Vuoigŋa boahtá du badjelii, ja Alimusa fápmu suoivanastá du. Dan dihte lea bassi dat mánná gii riegáda, ja son gohčoduvvo Ipmila bárdnin. ₃₆Du fuolki Elisabet lea maiddái vuordimin bártni, boarisvuođastis. Son gii adnojuvvui sahkuheapmin, lea juo guđát mánus. ₃₇Dasgo ii mihkkege leat veadjemeahttun Ipmilii.” ₃₈Dalle Maria celkkii: “Mun lean Hearrá bálvaleaddji. Šaddos munnje nugo leat cealkán.” Ja eŋgel vulggii su luhtte eret.

₃₉Moatte beaivvi geažes Maria doamai gávpogii mii lei Judea várreeatnamis. ₄₀Son manai Sakariasa vissui ja dearvvahii Elisabeta. ₄₁Go Elisabet gulai Maria dearvvahusa, de mánná su goaŧus lihkastii. Bassi Vuoigŋa devddii su, ₄₂ja son čuorvvui alla jienain: “Buressivdniduvvon leat don nissoniid gaskkas, ja buressivdniduvvon lea mánná du goaŧus! ₄₃Mo munnje sáhttá geavvat nu ahte mu Hearrá eadni boahtá mu lusa? ₄₄Go mun gullen du dearvvahusa, de mánná mu goaŧus lihkastii ávus. ₄₅Ja ávdugas son gii oskkui, dasgo dat maid Hearrá lea cealkán sutnje, ollašuvvá!”

₅₆Maria orui Elisabeta luhtte lahka golbma mánu ja máhcai dasto ruoktot.

₅₇Elisabeta áigi dievai, ja son riegádahtii bártni. ₅₈Go su ránnját ja fuolkkit gulle ahte Hearrá lei čájehan sutnje stuorra árpmu, de sii illudedje suinna.

₅₉Gávccát beaivvi sii bohte birračuohppat bártni. Sii dáhtto bidjat sutnje namman Sakarias áhči nama mielde, ₆₀muhto máná eadni dajai: “Ii eisege, su namman biddjojuvvo Johannes.” ₆₁Sii dadje: “Ii du sogas leat ovttasge dat namma.” ₆₂De sii jerre áhčis seavvimiin, man nama son dáhtui bidjat mánnái. ₆₃Sakarias siđai čállintávvala ja čálii dasa: “Su namma lea Johannes.” Dalle buohkat imaštalle. ₆₄Ja dallánaga Sakariasa njálbmi ja njuovčča čoavdásedje, ja son máidnugođii Ipmila. ₆₅Buot dan guovllu olbmot ballagohte, ja dát dáhpáhusat begge viidát oppa Judea várreeatnamis. ₆₆Ja dat geat dan gulle, bidje dan millii ja jerre: “Miison dán mánás šaddá?” Ja Hearrá giehta lei suinna.

₆₇Sakarias, máná áhči, devdojuvvui Bassi Vuoiŋŋain ja sártnui profehtalaš sániid:

₈₀Ja bárdni stuorui ja gievrrui Vuoiŋŋas. Son orui meahcis gitta dan beaivvi rádjái go son divui iežas Israela ovdii.