Lukas 10

₁Das maŋŋil Hearrá válljii velá čiežalogiguokte máhttájeaddji ja vuolggahii sin guoktásiid guoktásiid iežas ovdal juohke gávpogii ja gillái gosa ieš áiggui mannat.

₂Son celkkii sidjiide:

“Ládju lea stuoris, muhto bargit uhccán. Rohkadallet dan dihte láju hearrá vuolggahit bargiid ládjosis.

₃Vulget, mun vuolggahan din dego lábbáid gumppiid gaskii. ₄Allet váldde mielde burssa, lávkka alletge gápmagiid, alletge buorástahte ovttage mátkkis. ₅Go boahtibehtet muhtun vissui, de celket ovddemustá: ‘Ráfi dán vissui.’ ₆Jos das lea muhtun ráfi olmmoš, de din ráfi bissu su luhtte, muhto jos ii leat, de dat máhccá didjiide. ₇Orrot dan viesus ja borret ja juhket maid das fállet didjiide, dasgo bargi ánssáša bálkkás. Allet mana viesus vissui.

₈Go boahtibehtet muhtun gávpogii ja dan olbmot váldet din vuostá, de borret mii din ovdii biddjojuvvo, ₉buoridehket buhcciid geat leat das ja muitalehket buohkaide: Ipmila riika lea boahtán din lahka. ₁₀Muhto jos muhtun gávpogis gosa boahtibehtet, olbmot eai váldde din vuostá, de mannet dan gáhtaide ja dadjet: ₁₁‘Mii savdnjilit eret velá muolddage mii lea darvánan min julggiide din gávpogis. Muhto dihtet ahte Ipmila riika lea boahtán lahka!’ ₁₂Mun cealkkán didjiide: Sodomai geavvá duopmobeaivvi geahppadeappot go dán gávpogii.

₁₃Vuoi du, Korasin! Vuoi du, Betsaida! Jos dat oavddut mat leat dahkkojuvvon dudno gáhtain, livčče dahkkojuvvon Tyrosis ja Sidonis, de dat livččiiga áigá juo jorgalan horstta ja gunaid siste. ₁₄Duopmobeaivvi Tyrosii ja Sidonii geavvá geahppadeappot go dudnuide. ₁₅Ja don, Kapernaum, jogo don aliduvvot albmái? Vuolás jábmiidáibmui don norddastuvvot!

₁₆Gii gullá din, dat gullá mu, ja gii hilgu din, dat hilgu mu. Muhto gii hilgu mu, dat hilgu su gii mu lea vuolggahan.”

₁₇Dat čiežalogiguokte máhttájeaddji máhcce ilus ja dadje: “Hearrá, velá bahás vuoiŋŋatge jeagadit min, go mii gohččut daid du nammii.” ₁₈Jesus celkkii sidjiide: “Mun oidnen mo Sáhtán gahčai vuolás almmis dego álddagas. ₁₉Duođaid, mun lean addán didjiide fámu duolbmat gearbmašiid ja skorpiovnnaid ja bihtit buot vašálačča fámus. Ii mihkkege vahágahte din. ₂₀Allet almmatge illut dan dihte go vuoiŋŋat jeagadit din, muhto illudehket dan dihte go din namat leat čállojuvvon albmái.”

₂₁Dan bottus son ávvudii Bassi Vuoiŋŋas ja celkkii:

“Mun rámidan du, Áhčážan, almmi ja eatnama Hearrá, ahte leat čiehkan dán viisáin ja jierpmálaččain, muhto leat almmuhan dan mánáid láhkásaččaide. Duođaid, Áhčážan, nu lei du buorre dáhttu. ₂₂Buot mu Áhčči lea oskkildan mu háldui. Dušše Áhčči diehtá gii Bárdni lea, ja dan gii Áhčči lea, diehtá dušše Bárdni ja dat geasa Bárdni dáhttu su almmuhit.”

₂₃De Jesus jorgalii máhttájeddjiid beallái ja celkkii sidjiide sierra: “Ávdugasat dat čalmmit mat oidnet maid dii oaidnibehtet! ₂₄Mun cealkkán didjiide: Ollu profehtat ja gonagasat leat dáhtton oaidnit maid dii oaidnibehtet, eaige leat beassan oaidnit, ja gullat maid dii gullabehtet, eaige leat beassan gullat.”

₂₅Muhtun láhkadovdi dáhtui geahččalit Jesusa. Son dajai: “Oahpaheaddji, maid mun galggan dahkat vai árben agálaš eallima?” ₂₆Jesus jearai: “Mii lea čállojuvvon láhkii? Maid don ieš das logat?” ₂₇Olmmái vástidii: “Ráhkis Hearrá, Ipmilat, oppa váimmus ja oppa sielus ja oppa fámus ja oppa mielas, ja lagamuččat nugo iežat.” ₂₈Jesus celkkii: “Don vástidit riekta. Daga nie, de oaččut eallit.” ₂₉Muhto olmmái vikkai čájehit iežas vuoigatlažžan ja jearai: “Gii dalle lea mu lagamuš?” ₃₀ Jesus vástidii su gažaldahkii ná:

“Muhtun olmmái lei mannamin Jerusalemis Jerikoi, go rievvárat fallehedje su. Rievvárat nuolahedje su ja illastedje su. De sii vulge ja guđđe su dasa beallejábmin. ₃₁Dan geainnu deaivvai vádjolit báhppa, muhto go son oinnii olbmá, de son garvvii ja manai meaddel. ₃₂Nu dagai maiddái levilaš gii deaivvai boahtit dasa: Go son oinnii olbmá, de songe garvvii ja manai meaddel. ₃₃Muhto muhtun samarialaš bođii mátkkoštettiin olbmá guovdu, oinnii su ja árkkášii su njuorrasit. ₃₄Son manai su lusa, golggahii oljju ja viinni su háviide ja čanai daid. De son bajidii olbmá iežas ásena sealgái, doalvvui su guossevissui ja divššui su. ₃₅Maŋit iđida son válddii burssas guokte denára, attii daid guosseviesu isidii ja dajai: ‘Divššo su, ja maid don velá eambbo golaheaččat, dan mun mávssán go boađán ruoktot.’

₃₆Guhtemuš dán golbmasis orru du mielas leamaš dan olbmá lagamuš gii lei šaddan rievváriid gihtii?” ₃₇Láhkadovdi vástidii: “Dat gii čájehii sutnje váibmoláđisvuođa.” Jesus celkkii: “Mana ja daga seammá láhkái.”

₃₈Jesus vádjolii ovddos oktan máhttájeddjiidisguin ja bođii muhtun gillái. Doppe muhtun nisson gean namma lei Marta, válddii su vissosis. ₃₉Martas lei oabbá, Maria. Son čohkánii Hearrá julggiid ovdii ja guldalii su sániid. ₄₀Marta váivvidii iežas ollu ráhkademiin, ja danin son bođii dadjat: “Hearrá, itgo don beroš das ahte mu oabbá lea guođđán buot bargguid munnje? Gohčo su veahkehit mu.” ₄₁Muhto Hearrá vástidii: “Marta, Marta, don moraštat ja muosehuvat eatnat áššiin. ₄₂Dušše okta lea dárbbašlaš. Maria lea válljen buori oasi, iige dat váldojuvvo sus eret.”