Lukas 11

₁Oktii go Jesus lei leamaš rohkadallamin, de muhtun su máhttájeddjiin dajai sutnje: “Hearrá, oahpat min rohkadallat, nugo Johannes oahpahii iežas máhttájeddjiid.” ₂Dalle Jesus celkkii sidjiide: “Go rohkadallabehtet, de dadjet ná:

₅Jesus celkkii vel: “Josmat muhtun dis manná ustibis lusa gaskaija áigge ja dadjá: ‘Ustiban, lone munnje golbma láibbi. ₆Mu ustit lea boahtán mu lusa mátkkistis, iige mus leat maid guossohit sutnje.’ ₇Nubbi vástida viesu siste: ‘Ale váivvit mu. Uksa lea juo dahppojuvvon, ja mun lean oađđimin mánáidanguin. In mun sáhte lihkkat addit maidege.’ ₈Muhto mun cealkkán didjiide: Vaikko son ii lihkage addit sutnje maidege ustitvuođa dihte, de son lihkká danin go nubbi ii vuollán átnumis, ja addá nubbái buot maid dárbbaša.

₉Dan dihte mun cealkkán didjiide: Átnot, de oažžubehtet. Ohcet, de gávdnabehtet. Goalkkuhehket, de didjiide rabastuvvo. ₁₀Dasgo dat gii átnu, oažžu, ja dat gii ohcá, gávdná, ja dat gii goalkkuha, rabastuvvo.

₁₁Almma ii oktage dis leat áhčči gii addá bárdnásis gearbmaša go bárdni sihtá sus guoli, ₁₂dahje skorpiovnna go son sihtá moni? ₁₃Go vel diige geat lehpet bahát, máhttibehtet addit mánáidasadet buriid attáldagaid, de man sakka eambbo din Áhčči addá almmis Bassi Vuoiŋŋa daidda geat sus dan átnot!”

₁₄Jesus ájii gielahis olbmás olggos bahás vuoiŋŋa. Go vuoigŋa lei vuolgán, de gielahis olmmái sárdnugođii, ja olbmot ovddošedje. ₁₅Muhto muhtumat dadje: “Son ádjá bahás vuoiŋŋaid olggos Beelsebula, bahás vuoiŋŋaid oaivámučča, fámuin.” ₁₆Earrásat dáhtto geahččalit su ja gáibidedje sus mearkka almmis.

₁₇Muhto Jesus diđii sin jurdagiid ja celkkii sidjiide:

“Juohke riika mii juohkása ja lea soahpameahttun iežainis, duššá, ja viessu gahččá viesu ala. ₁₈Jos dal Sáhtán soahtá iežainis, de dan riika dalle sáhttá bissut? Dii dadjabehtet ahte mun áján olbmuin olggos bahás vuoiŋŋaid Beelsebula vehkiin. ₁₉Muhto jos mun áján olbmuin olggos bahás vuoiŋŋaid Beelsebula vehkiin, de gean vehkiin din olbmot dalle ádjet daid olggos? Dan dihte sii šaddet din duopmárin. ₂₀Muhto jos mun áján olbmuin olggos bahás vuoiŋŋaid Ipmila suorpmain, de dallehan Ipmila riika lea boahtán din lusa.

₂₁Go gievrras olmmái fákte iežas viesu vearju gieđas, de su opmodat orru ráfis. ₂₂Muhto jos muhtun boahtá gii lea velá gievrrat ja vuoitá su, de dalle dat gievrrat váldá sus buot vearjjuid maidda son luhtii, ja juogada sállaša. ₂₃Dat gii ii leat mu beale, dat lea mu vuostá, ja gii ii muinna čohkke, dat biđge.

₂₄Go buhtismeahttun vuoigŋa vuolgá olggos olbmos, de dat vádjola ávdin guovllus ja ohcá vuoiŋŋastanbáikki, muhto ii gávnna. Dalle dat dadjá: ‘Mun máhcan vissosan mas vulgen.’ ₂₅Go dat de boahtá ja gávdná viesu suohpalastojuvvon ja čiŋahuvvon, ₂₆de dat viežžá vel čieža vuoiŋŋa, bahábuid go dat ieš, ja dat bohtet sisa ja ásset dohko. Nu dan olbmo dilli šaddá loahpas bahábun go dat lei ovdal.”

₂₇Go Jesus lei dáid sárdnumin, de muhtun nisson olbmuid gaskkas čuorvvui: “Ávdugas dat goaŧŧu mii du guttii, ja ávdugasat dat čiččit maid don njammet!” ₂₈Muhto Jesus celkkii: “Daja baicce: Ávdugasat dat geat gullet Ipmila sáni ja vurkejit dan.”

₂₉Go eatnat olbmot čoagganedje, de Jesus sárdnugođii sidjiide:

“Dát buolva lea bahás buolva. Dat gáibida mearkka, muhto áidna mearka mii dasa addojuvvo, lea Jona mearka. ₃₀Nugo Jona lei mearkan Ninive olbmuide, nu Olbmobárdnige šaddá mearkan dán bulvii. ₃₁Lullieatnama dronnet čuožžila dupmui oktan dán buolvva olbmuiguin ja dubme sin. Dasgo son bođii eatnama gežiin gullat Salomo viissisvuođa, ja dás lea eambbo go Salomo! ₃₂Ninive olbmot čuožžilit dupmui oktan dán buolvvain ja dubmejit dan. Dasgo Jona sártni geažil sii jorgaledje, ja dás lea eambbo go Jona!

₃₃Ii oktage cahkket lámppá ja bija dan čihkosii iige gári vuollái, muhto lámpájuolgái, vai dat geat bohtet sisa, oidnet dan báitima. ₃₄Du čalbmi lea du rupmaša lámpá. Go du čalbmi lea dearvvaš, de oppa du rumaš lea čuovgat, muhto jos du čalbmi lea vigis, de du rumaš lea seavdnjat. ₃₅Várut dasto vai dat čuovga mii du siste lea, ii leat seavdnjadas. ₃₆Jos oppa du rumaš lea čuovgat iige mihkkege osiid das leat seavdnjat, de buot šaddá čuovgadin nugo dalle go lámpá báitimiinnis du čuvge.”

₃₇Go Jesus lei sárdnumin, de muhtun farisealaš bovdii su iežas vissui boradit. Son manai dohko ja válddii saji beavddis. ₃₈Farisealaš imaštalai go oinnii ahte Jesus ii bassan gieđaid mállásiid ovdal. ₃₉Muhto Hearrá celkkii sutnje:

“Dii farisealaččat buhtistehpet gal lihtiideattet ja gáriideattet olggobeale, muhto din siskkildasa dievva lea rievádus ja bahávuohta. ₄₀Dii jierpmeheamit! Almma dat seammá gii lea dahkan olggobeale, lea dahkan maiddái dan mii lea siskkobealde? ₄₁Addet dalle gefiide dan mii lea gári siste. Dalle buot šaddá didjiide buhtisin.

₄₂Vuoi din, farisealaččat! Dii addibehtet logádasaid minttain, urttasšattuin ja buot ruttain, muhto vajálduhttibehtet vuoigatvuođa ja Ipmila ráhkisvuođa. Dáid dii galggašeiddet doallat, muhto ii dan dihte vajáldahttit daid eará báhkkomiidge.

₄₃Vuoi din, farisealaččat! Dii dáhttubehtet čohkkát synagogas ovddemus sajiin ja liikobehtet go olbmot dearvvahit din márkanšiljus. ₄₄Vuoi din! Dii lehpet dego merkekeahtes hávddit, eaige olbmot dieđe go sii dulbmet daid.”

₄₅Dalle muhtun láhkadovdi dajai: “Oahpaheaddji, dakkár sániiguin don hiddjidat maiddái min.”

₄₆Jesus vástidii: “Vuoi dinge, láhkadovdit! Dii bidjabehtet olbmuide lossa nođiid maid sii illá nagodit guoddit, muhto ieža dii ehpet guoskka daidda suorpmainge. ₄₇Vuoi din! Dii ceggebehtet hávdegeđggiid profehtaide geaid din áhčit godde. ₄₈Ná dii dovddastehpet ja dohkkehehpet dan maid din áhčit dahke: Sii godde profehtaid ja dii ceggebehtet profehtaide hávdegeđggiid. ₄₉Dan dihte Ipmila Viissisvuohta lea cealkán: ‘Mun vuolggahan sin lusa profehtaid ja apostaliid; muhtumiid sis sii goddet ja earrásiid doarrádallet.’ ₅₀Danne dát buolva šaddá vástidit buot daid profehtaid varas mii máilmmi vuođđudeami rájes lea golggahuvvon, ₅₁Abela vara rájes gitta Sakarja vara rádjái, su gii goddojuvvui áltára ja tempela gaskii. Duođaid, mun cealkkán didjiide: Dát buolva šaddá das vástidit.

₅₂Vuoi din, láhkadovdit, go dii lehpet váldán dieđu čoavdaga. Dii ieža ehpet leat mannan sisa, ja daid geat dáhtto mannat, dii lehpet caggan mannamis.”

₅₃Go Jesus vulggii das, de čáloahppavaččat ja farisealaččat vurje su buotlágán gažaldagaiguin. ₅₄Sii geahččaledje su oažžut dadjat juoidá mainna beasašedje giellat su.