Lukas 19

₁Jesus bođii Jerikoi ja vádjolii gávpoga čađa. ₂Doppe lei olmmái gean namma lei Sakkeus. Son lei tuolláriid oaivámuš ja hui rikkis. ₃Son dáhtui oaidnit mii olbmáid Jesus lei, muhto go lei uhcci šattus, de son ii oaidnán su olbmuid duohken. ₄Nu son viegai ovdalii ja gavccui meahccefiikonmurrii, vai beassá oaidnit Jesusa gii lei boahtimin dan geainnu. ₅Go Jesus bođii dan sadjái, de son geahčastii bajás ja celkkii: “Sakkeus, njieja hoahpus. Odne mun boađán du dállui.”

₆Sakkeus njiejai hoahpus ja válddii Jesusa guossái iluin. ₇Go olbmot oidne dan, de sii buohkat nimmoredje ja dadje: “Suttolaš olbmá lusa son manai orrut.” ₈Muhto Sakkeus dajai Hearrái buohkaid gullut: “Hearrá, beali opmodagastan mun attán gefiide, ja geas lean gaikon liiggás, dasa mun attán ruoktot njealjegeardásaččat.” ₉Jesus celkkii sutnje: “Odne lea bestojupmi boahtán dán vissui, dasgo sonnai lea Abrahama bárdni. ₁₀Aiddo dan mii lei láhppon, Olbmobárdni lea boahtán ohcat ja beastit.”

₁₁Jesus muitalii veardádusa daidda geat ledje gullamin dan, dasgo son lei lahka Jerusalema ja olusat doivo Ipmila riikka almmustuvvat dallánaga.

₁₂Son celkkii: “Muhtun allanálat olmmái vulggii gáiddus eatnamii, vai beassá oažžut doppe gonagasválddi ja de máhccat ruoktot. ₁₃Son rávkkai lusas logi bálvaleaddji, attii guhtiige golleruđa ja dajai: ‘Gávppašehket dáiguin dassážii go mun máhcan.’ ₁₄Muhto su riikka olbmot vašuhedje su ja vuolggahedje su maŋŋái áirasiid cealkit: ‘Mii eat dáhto dán olbmá iežamet gonagassan.’

₁₅Olmmái máhcai riikasis gonagassan. Go son lei boahtán, de son rávkkai lusas bálvaleddjiid geat ledje ožžon ruđaid, vai beassá gullat man ollu iešguhtege lei dienidan. ₁₆Vuosttaš bođii su ovdii ja dajai: ‘Hearrá, dainna golleruđain maid addet, mun lean dienidan logi golleruđa.’ ₁₇Hearrá celkkii sutnje: ‘Bures dahkkojuvvon! Don leat buorre bálvaleaddji. Go don leat leamaš oskkáldas uhccánaččas, de beasat ráđđet logi gávpoga.’ ₁₈Nubbi bođii ja dajai: ‘Hearrá, dainna golleruđain maid addet, mun lean dienidan vihtta golleruđa.’ ₁₉Sutnje gonagas dajai: ‘Don beasat ráđđet vihtta gávpoga.’ ₂₀De bođii vel okta bálvaleaddji. Son dajai: ‘Hearrá, dá lea du golleruhta. Mun gissen dan liinni sisa. ₂₁Mun ballen dus, danin go don leat garra olmmái. Don válddát maid it leat bidjan áimmuide, ja láddjet maid it leat gilván.’ ₂₂Gonagas dajai sutnje: ‘Mun dubmen du du iežat sániid mielde. Don bahás bálvaleaddji! Don nappo dihtet ahte mun lean garra olmmái gii válddán maid in leat bidjan áimmuide, ja láddjen maid in leat gilván. ₂₃Manne don dalle it bidjan mu ruđa báŋkui? Dalle mun máhcadettiinan livččen ožžon dan oktan reanttuin.’

₂₄Gonagas dajai daidda geat ledje das čuožžumin: ‘Váldet sus ruđa ja addet dan dasa geas leat logi golleruđa.’ ₂₅Sii dadje: ‘Hearrá, sus leat juo logi golleruđa.’ ₂₆‘Mun cealkkán didjiide: Juohkehažžii geas lea, dasa addojuvvo, ja geas ii leat, das váldojuvvo eret velá datge mii sus lea. ₂₇Muhto buktet deike mu vašálaččaid geat eai dáhtton mu gonagassan, ja steavlidehket sin mu čalmmiid ovddas.’”

₂₈Go Jesus lei cealkán dán, de son vulggii mannat bajás Jerusalema geainnu. ₂₉Go son lei boahtimin Oljovárrái ja lei juo lahka Betfage ja Betania, de son vuolggahii máhttájeddjiinis guoktása ₃₀ja celkkii: “Manni don gillái mii do oidno. Go boahtibeahtti dohko, de gávdnabeahtti čadnojuvvon ásenvárssá man čielggis ii oktage olmmoš vel leat čohkkán. Čoavdi dan ja bukti deike. ₃₁Jos muhtin dadjá dudnuide: ‘Manne doai dan čoavdibeahtti?’ de vástideahkki: ‘Hearrá dárbbaša dan.’”

₃₂Máhttájeaddji guovttos vulggiiga ja gávnnaheigga ahte buot lei nugo Jesus lei cealkán. ₃₃Go soai leigga čoavdimin várssá, de dan eaiggádat jerre: “Manne doai čoavdibeahtti várssá?” ₃₄Soai vástideigga: “Hearrá dárbbaša dan.” ₃₅Soai láidiiga várssá Jesusa lusa, lebbiiga biktasiiddiska dan čielgái ja veahkeheigga Jesusa beassat riidet. ₃₆Ja go son de riidii, de olbmot lebbo biktasiiddiset geainnu ala. ₃₇Go son lahkanii gávpogii ja lei njiedjamin Oljováris, de oppa máhttájeddjiid joavku rámidišgođii ja máidnugođii Ipmila alla jienain buot fámolaš daguid dihte maid sii ledje oaidnán. Sii čurvo: ₃₈“Buressivdniduvvon lehkos son, gonagas, guhte boahtá Hearrá nammii! Ráfi almmis ja gudni allagasas!” ₃₉Muhtun farisealaččat dadje olbmuid gaskkas Jesusii: “Oahpaheaddji, cuiggot máhttájeddjiidat!” ₄₀Muhto Jesus vástidii: “Mun cealkkán didjiide: Jos sii jávohuvašedje, de geađggit čuorvugoađášedje.”

₄₁Go Jesus bođii lagabuidda ja oinnii gávpoga, de son čierrugođii dan ₄₂ja celkkii: “Jos donge áddešit otná dán beaivvi mii buktá dutnje ráfi! Muhto dat lea dál čihkkojuvvon du čalmmiid ovddas. ₄₃Beaivvit bohtet go du vašálaččat ráhkadit čomaid du birra, birastahttet du ja fallehit du juohke guovllus. ₄₄Sii heavahit du oktan ássiidatguin. Dus ii báze geađgi geađggi ala, danne go it dovdan iežat oahppaladdanáiggi.”

₄₅Jesus manai tempelšilljui ja ádjigođii eret daid geat ledje das gávppašeamen. ₄₆Son celkkii sidjiide: “Lea čállojuvvon: Mu viessu lea rohkadusa viessu. Muhto dii lehpet dahkan dan rievvárbiedjun.”

₄₇Son oahpahii dasto tempelis juohke beaivvi. Bajimusbáhpat, čáloahppavaččat ja álbmoga oaivámuččat bivde goddit su, ₄₈muhto eai diehtán mo dahkat dan, danne go buot olbmot gessojedje sutnje ja guldaledje su.