Lukas 5

₁Go Jesus muhtun beaivvi lei čuožžumin Gennesaretjávrri gáttis ja olbmot bahkkejedje sutnje vai besset gullat Ipmila sáni, ₂de son oinnii jávregáttis guokte fatnasa. Bivdit ledje mannan dain eret ja ledje doidimin firpmiideaset. ₃Jesus manai nuppi fatnasii, mii gulai Simonii, ja dáhtui su sirdit veaháš gáttis eret. De son čohkánii ja oahpahii olbmuid fatnasis.

₄Go Jesus lei geargan sárdnumis, de son celkkii Simonii: “Suhket fávlái ja suhppot firpmiid.” ₅Simon vástidii: “Oahpaheaddji, mii leat bargan geažos ija eatge leat ožžon maidege. Muhto mun suhppen vel fierpmi, go don gohčut.” ₆Sii dahke nu ja fidnejedje nu stuorra guollehivvodaga ahte sin fierbmi gaikánišgođii. ₇Sii sevve guimmiideaset geat ledje nuppi fatnasis, boahtit veahkkin. Sii bohte ja devde goappašiid fatnasiid nu ahte dat goasii vudjo. ₈Go Simon Peter dan oinnii, de son luoitádii Jesusa julggiid ovdii ja dajai: “Hearrá, mana eret mu luhtte! Mun lean suttolaš olmmái.” ₉Stuorra sálaš lei hirpmástuhttán su ja buohkaid geat ledje suinna, ₁₀nu maiddái Sebedeusa bártni guoktá Jakoba ja Johannesa geat leigga Simona bivdoguoimmit. Muhto Jesus celkkii Simonii: “Ale bala. Dás maŋás don bivddát olbmuid.” ₁₁De sii suhke gáddái, guđđe buot ja čuvvo Jesusa.

₁₂Go Jesus lei muhtun gávpogis, de su lusa bođii olmmái gii lei áibbas spihtálnaga. Go son oinnii Jesusa, de son luoitádii su ovdii muđolassii ja ánuhii: “Hearrá! Jos don dáhtut, de don veaját buhtistit mu.” ₁₃Jesus geigii gieđa, guoskkahii su ja celkkii: “Mun dáhtun. Šatta buhtisin.” Dallánaga spihtáldávda jávkkai. ₁₄Jesus gilddii su muitaleames dan geasage ja celkkii: “Mana čájehit iežat báhppii ja oaffaruša buhtástusastat oaffara, nugo Moses lea gohččon, duođaštussan sidjiide.” ₁₅Jesusa beaggin viidánii ain, ja ollu olbmot čoahkkanedje gullat su ja buoriduvvot buohcuvuođaineaset. ₁₆Muhto son manai ávdin báikkiide rohkadallat.

₁₇Go Jesus muhtun beaivvi fas oahpahii, de muhtun farisealaččat ja láhkaoahpaheaddjit čohkkájedje guldaleamen su. Sii ledje boahtán buot Galilea giliin, Judeas ja Jerusalemis. Jesusis váikkuhii Hearrá fápmu, nu ahte son sáhtii buoridit. ₁₈Muhtun olbmát gudde dohko guoddinseaŋggas lámis olbmá. Sii vigge buktit su sisa ja bidjat Jesusa ovdii. ₁₉Muhto olbmuid eatnatvuođa dihte sii eai goit sáhttán buktit su sisa, ja nu sii gorgŋo dáhki ala, luvvejedje diillaid ja luite buohcci oktan guoddinseaŋggain aiddo Jesusa ovdii. ₂₀Go Jesus oinnii sin oskku, de son celkkii: “Ustiban, du suttut leat addojuvvon ándagassii.” ₂₁Dalle čáloahppavaččat ja farisealaččat jurddašedje: “Mii olbmáid dát lea? Sonhan bilkida Ipmila. Gii sáhttá addit suttuid ándagassii earret Ipmila?” ₂₂Jesus diđii maid sii jurddašedje ja celkkii sidjiide: “Maid dii jurddašehpet váimmusteattet? ₂₃Goappá lea álkit dadjat: ‘Du suttut leat addojuvvon dutnje ándagassii’, vai dadjat: ‘Lihka ja vázzil’? ₂₄Muhto vai diehtibehtet ahte Olbmobártnis lea váldi eatnama alde addit suttuid ándagassii” – ja son sártnui lámis olbmái – “mun cealkkán dutnje: Čuožžil, váldde seaŋggat ja mana ruoktot.” ₂₅Ja dallánaga olmmái čuožžilii buohkaid oaidnut, válddii seaŋgga maid alde lei veallán, vulggii ruoktot ja máinnui Ipmila. ₂₆Buohkat hirpmástuvve ja máidno Ipmila. Balus sii dadje: “Odne mii leat oaidnán dakkára mii ii leat jáhkkimis.”

₂₇Dasto Jesus vulggii doppe ja oinnii Levi-nammasaš tuollára čohkkámin tuolloviesu olggobealde. Jesus celkkii sutnje: “Čuovo mu!” ₂₈Levi guđii visot, čuožžilii ja čuovui Jesusa.

₂₉Levi ráhkadii dasto Jesusii stuorra guossemállásiid iežas viesus, ja ollu tuollárat ja earrásat ledje boradeamen sudnuin. ₃₀Muhto farisealaččat ja čáloahppavaččat geat gulle sidjiide, nimmorišgohte ja dadje Jesusa máhttájeddjiide: “Manne dii boradehpet ja juhkabehtet tuolláriiguin ja suttolaččaiguin?” ₃₁Jesus vástidii sidjiide: “Eai dearvvaš olbmot dárbbaš dálkkasteaddji, muhto buohccit. ₃₂In mun leat boahtán rávkat vanhurskásiid, muhto suttolaččaid, vai sii jorgalit.”

₃₃Sii dadje Jesusii: “Johannesa máhttájeaddjit fástudit dávjá ja rohkadallet, nu maiddái farisealaččaid máhttájeaddjit, muhto du máhttájeaddjit borret ja juhket.” ₃₄Son vástidii: “Oaččuhehpetgo dii headjagussiid fástudit dalle go irgi lea ain sin luhtte? ₃₅Muhto boahtá áigi go irgi váldojuvvo sin luhtte eret, ja dalle sii fástudit.”

₃₆Jesus muitalii vel sidjiide veardádusa: “Ii oktage váldde bihtá ođđa biktasis ja bija dan duokŋasin boares biktasii. Dasgo dalle ođđa bivttas gaikána, iige duokŋasge mii lea váldojuvvon ođđa biktasis, heive boares biktasii. ₃₇Iige oktage leike varas viinni boares viidneseahkaide. Dasgo dalle varas viidni ludde boares viidneseahkaid, viidni golgá eatnamii ja viidneseahkat billašuvvet. ₃₈Varas viinni galgá baicca leiket ođđa viidneseahkaide. ₃₉Ii oktage gii lea juhkan boares viinni, hálit varas viinni. Son atná boares viinni buorebun.”