Markus 10

₁Jesus vulggii doppe ja bođii Judeai Jordana don beallái. Ollu olbmot čoagganedje fas su lusa, ja son oahpahii sin nugo láviige. ₂Su lusa bohte maid muhtun farisealaččat geat jerre sus: “Leago boatnjás lohpi earránit áhkástis?” Sii dáhtto geahččalit su. ₃Son vástidii sidjiide: “Makkár mearrádusaid Moses lea addán didjiide?” ₄Sii dadje: “Moses suovai boatnjá čállit earrogirjji ja earránit áhkástis.” ₅Dalle Jesus celkkii sidjiide: “Din váimmu garasvuođa dihte Moses čálii didjiide dán mearrádusa. ₆Muhto máilmmi álggus Ipmil sivdnidii sudno olmmájin ja nissonin. ₇Dan dihte olmmái guođđá áhčis ja eatnis ja eallá áhkáinis, ₈ja dat guovttis šaddaba oktan oažžin. Soai eaba leat šat guokte; soai leaba okta oažži. ₉Ja maid Ipmil lea ovttastahttán, dan ii olmmoš oaččo earuhit.”

₁₀Go sii ledje oktonassii, de máhttájeaddjit jerre sus ođđasis dán ášši. ₁₁Jesus celkkii sidjiide: “Gii earrána áhkástis ja náitala nuppiin, dat rihkku náitosa, ₁₂ja jos nisson earrána boatnjástis ja náitala nuppiin, de son rihkku náittosdili.”

₁₃Olbmot bukte Jesusa lusa mánáid, vai son guoskkahivččii daid, muhto máhttájeaddjit šiggo daid geat bukte mánáid. ₁₄Go Jesus dan oinnii, de son suhtai ja celkkii sidjiide: “Diktet mánáid boahtit mu lusa, alletge hehtte sin. Dasgo Ipmila riika gullá dakkáraččaide. ₁₅Duođaid, mun cealkkán didjiide: Dat gii ii váldde vuostá Ipmila riikka nugo mánná, dat ii eisege beasa dan sisa.” ₁₆Son válddii mánáid sallii, bijai gieđaid sin ala ja buressivdnidii sin.

₁₇Go Jesus lei vuolgimin doppe, de muhtun olmmái bođii viega, čippostii su ovdii ja jearai: “Buorre oahpaheaddji, maid mun galggan dahkat vai árben agálaš eallima?” ₁₈Jesus vástidii: “Manne don gohčodat mu buorrin? Ii oktage leat buorre earret Ipmila. ₁₉Donhan dovddat báhkkomiid: It oaččo goddit, it oaččo rihkkut náittosdili, it oaččo suoládit, it oaččo cealkit vearreduođaštusa, it oaččo váldit nuppis dan mii lea su, gudnejahte áhčát ja eatnát.” ₂₀Olmmái dajai sutnje: “Oahpaheaddji, buot dáid mun lean doallan nuorravuođa rájes.” ₂₁Jesus geahčai sutnje, anii su ráhkisin ja celkkii: “Okta dus váilu. Mana ja vuovdde buot mii dus lea, ja atte ruđaid gefiide, de dus lea dávvir almmis. Boađe dasto ja čuovo mu.” ₂₂Olmmái šattai lossa millii dáid sániid dihte. Son vulggii eret morrašis, danne go sus lei ollu opmodat.

₂₃Jesus jorgalii, geahčai máhttájeddjiidasas ja celkkii: “Man váttis lea daidda geain lea ollu opmodat, beassat Ipmila riikii!” ₂₄Máhttájeaddjit imaštalle su sániid, muhto son geardduhii: “Mánážiiddán, man váttis lea beassat Ipmila riikii! ₂₅Álkit lea kamelii mannat nállošalmmi čađa go riggái beassat Ipmila riikii.” ₂₆Máhttájeaddjit hirpmástuvve vel eambbo ja dadje guhtet guoibmáseaset: “Gii dalle sáhttá bestojuvvot?” ₂₇Jesus geahčai sidjiide ja celkkii: “Olbmuide dat gal lea veadjemeahttun, muhto ii Ipmilii. Ipmilii buot lea vejolaš.”

₂₈Dalle Peter dajai sutnje: “Nabai mii? Mii leat guođđán visot ja čuvvon du.” ₂₉Jesus vástidii: “Duođaid, mun cealkkán didjiide: Gii ihkinassii mu ja evangeliuma dihte lea guođđán viesus, vieljaidis dahje oappáidis, eatnis, áhčis dahje mánáidis dahje bealdduidis, ₃₀dat oažžu čuođigeardásaččat: Dán máilmmis viesuid, vieljaid ja oappáid, etniid ja mánáid ja bealdduid – muhto maiddái doarrádallamiid – ja boahtti máilmmis agálaš eallima. ₃₁Muhto eatnat vuosttamuččat šaddet maŋimužžan ja maŋimuččat vuosttamužžan.”

₃₂Go sii de manne bajás Jerusalema geainnu, de Jesus manai ovddemusas. Máhttájeaddjit ledje suorganan, ja olbmot geat bohte sin maŋis, ballagohte. Dalle son válddii fas guoktenuppelohkái máhttájeaddjis sierra ja sárdnugođii sidjiide dan mii sutnje dáhpáhuvvá: ₃₃“Geahča, mii mannat bajás Jerusalemii, ja Olbmobárdni addojuvvo bajimusbáhpaid ja čáloahppavaččaid gihtii. Sii dubmejit su jápmimii ja addet su báhkiniid gihtii, ₃₄geat bilkidit ja čolget ja spihččejit su ja goddet su. Muhto golmma beaivvi geažes son čuožžila jábmiid luhtte.”

₃₅Jakob ja Johannes, Sebedeusa bártnit, bođiiga Jesusa lusa ja dajaiga: “Oahpaheaddji, moai dáhtošeimme du dahkat munnuide juoidá.” ₃₆Jesus jearai: “Maid doai dáhttubeahtti ahte mun dagan dudnuide?” ₃₇Soai vástideigga: “Go du hearvásvuohta boahtá, de divtte munno čohkkát iežat bálddas, nuppi olgeš ja nuppigis gurut bealde.” ₃₈Jesus celkkii sudnuide: “Doai eahppi dieđe maid átnubeahtti. Sáhttibeahttigo doai juhkat dan geara maid mun jugan dahje gásttašuvvot dainna gásttain mainna mun gásttašuvvon?” ₃₉Soai vástideigga: “De sáhtte.” Jesus celkkii sudnuide: “Dan geara maid mun jugan, doaige šaddabeahtti juhkat, ja dainna gásttain mainna mun gásttašuvvon, doaige gásttašuvvobeahtti. ₄₀Muhto ii leat mu ášši mearridit gii čohkká mu olgeš ja gii gurut bealde. Dat sajit leat daidda geaidda dat leat mearriduvvon.”

₄₁Go eará logis dan gulle, de sii suhtte Jakobii ja Johannesii. ₄₂Muhto Jesus rávkkai sin lusas ja celkkii: “Dii diehtibehtet ahte dat geat adnojuvvojit ráđđejeaddjin, sordet álbmogiid, ja eatnama stuorrát stivrejit daid garra gieđain. ₄₃Muhto nu ii oaččo leat din gaskkas. Gii din gaskkas dáhttu šaddat stuorisin, dat galgá leat earáid bálvaleaddji, ₄₄ja gii din gaskkas dáhttu leat vuosttamuš, dat galgá leat buohkaid šlávva. ₄₅Ii Olbmobárdnige boahtán bálvaluvvot, muhto bálvalit ja addit heakkas lonisin eatnagiid ovddas.”

₄₆Sii bohte Jerikoi. Go Jesus de vulggii gávpogis oktanaga máhttájeddjiidisguin ja ollu olbmuiguin, de geaidnoguoras čohkkái čalmmehis gearjideaddji Bartimeus, Timeusa bárdni. ₄₇Go son gulai ahte nasaretlaš Jesus lei mannamin das meaddel, de son čuorvugođii: “Jesus, Davida bárdni, árpmit mu!” ₄₈Olusat šiggo su vai son jávohuvašii, muhto son čuorvvui vel jitnoseappot: “Davida bárdni, árpmit mu!” ₄₉Dalle Jesus orustii ja celkkii: “Rávket su deike.” Sii manne rávkat čalmmeheami ja dadje sutnje: “Ale bala! Čuožžil, son rávká du.” ₅₀Olmmái nuolastii oalgebiktasa, njuikii čuoččat ja bođii Jesusa lusa. ₅₁Jesus jearai sus: “Maid don dáhtut ahte mun dagan dutnje?” Čalmmeheapme vástidii: “Rabbuni, daga mu oaidnin.” ₅₂Dalle Jesus celkkii sutnje: “Vázzil, du osku lea beastán du.” Dallánaga olmmái šattai oaidnin, ja son vádjolišgođii Jesusa mielde.