Markus 12

₁Jesus sárdnugođii sidjiide veardádusaiguin: “Olmmái gilvvii viidnegárddi, áiddui dan, čuolai báktái viidnebohčingári ja huksii fáktentoartna. Dasto son láigohii gárddi láigoheddjiide ja fárrii ieš eret eatnamis. ₂Sohppojuvvon áigái son vuolggahii bálvaleaddjis láigoheddjiid lusa, vai oažžu sis iežas oasi viidnegárddi šattus. ₃Muhto sii dohppejedje olbmá, cábme su ja bidje su mannat ruoktot guoros gieđaid. ₄De eaiggát vuolggahii sin lusa nuppi bálvaleaddji, ja suge sii illastedje ja heahppášuhtte. ₅Son vuolggahii dasto eará bálvaleaddji, ja su sii godde. Nu geavai earáidege; muhtumiid sii cábme, muhtumiidgis godde. ₆Dál sus lei dušše okta, iežas ráhkis bárdni. Su son vuolggahii maŋimužžan láigoheddjiid lusa, danin go son jurddašii: ‘Mu bártni sii goittot gudnejahttet.’ ₇Muhto láigoheaddjit dadje guhtet guoibmáseaset: ‘Diet lea árbbolaš. Goddot su, de árbi lea min.’ ₈Sii dohppejedje su, godde su ja bálkestedje olggos viidnegárddis.

₉Maid viidnegárddi eaiggát dál dahká? Son boahtá ja heavaha láigoheddjiid ja addá viidnegárddi earáide. ₁₀Almma lehpet lohkan čállagiin dán báikki: Geađgi maid huksejeaddjit hilgo, lea šaddan čiehkageađgin. ₁₁Dat lea Hearrá dahku, ja dat lea ovddolaš min čalmmiin.”

₁₂Sii dáhtto váldit su gitta, muhto balle olbmuin. Sii áddejedje ahte son muitalii dán veardádusa sin birra. De sii guđđe su ja manne eret.

₁₃Dasto sii vuolggahedje su lusa muhtun farisealaččaid ja Herodesa doarjaleddjiid giellat su sániiguin. ₁₄Sii bohte ja dadje sutnje: “Oahpaheaddji, mii diehtit ahte don leat vuoiggalaš. Don it beroš das maid earát oaivvildit itge geahča olbmo hápmái, muhto oahpahat Ipmila geainnu duohtavuođas. Leago riekta máksit vearuid keaisárii vai ii? Galgatgo mii máksit vai eat?” ₁₅Muhto Jesus dovddai sin guoktilašvuođa ja celkkii sidjiide: “Manne dii geahččalehpet giellat mu? Čájehehket munnje denára.” ₁₆Sii čájehedje ruđa, ja son jearai: “Gean govva ja namma das lea?” Sii vástidedje: “Keaisára.” ₁₇Dalle Jesus celkkii sidjiide: “Addet keaisárii dan mii gullá keaisárii, ja Ipmilii dan mii gullá Ipmilii.” Sii ovddošedje sakka su vástádusa.

₁₈De Jesusa lusa bohte muhtun saddukealaččat geat dadjet ahte ii leat bajásčuožžileapmi. Sii jerre sus: ₁₉“Oahpaheaddji, Moses lea mearridan ná: Jos muhtuma viellja jápmá ja sus báhcá áhkká muhto ii mánná, de dát olmmái galgá váldit vieljas áhká ja addit vielljasis náli. ₂₀De ledje čieža vieljaža. Boarráseamos sis válddii áhká, muhto jámii mánáheapmin. ₂₁Dalle nubbi válddii leaskka, muhto songe jámii mánáheapmin. Nu geavai goalmmádiige ₂₂ja buot čiehččasii: Ii oktage sis ožžon máná. Buot maŋimužžan jámii nisson. ₂₃Go sii bajásčuožžileami beaivvi čuožžilit jábmiid luhtte, de gean áhkká son dalle lea? Buot čiežashan leat atnán su áhkkán.”

₂₄Jesus vástidii: “Dii čádjidehpet, danne go ehpet dovdda čállagiid ehpetge Ipmila fámu. ₂₅Go jábmit čuožžilit, de sii eai náital eaige náitojuvvo, muhto sii leat dego eŋgelat almmis. ₂₆Muhto mii boahtá dasa ahte jábmit čuožžilit, de ehpetgo leat lohkan Mosesa girjjis muitalusa buolli bastilislátnjámiestagis? Das Ipmil cealká Mosesii: Mun lean Abrahama Ipmil, Isaka Ipmil ja Jakoba Ipmil. ₂₇Ii son leat jábmiid, muhto ealli olbmuid Ipmil. Dii lehpet oalát čádjidan.”

₂₈Muhtun čáloahppavaš lei guldalan sin ságastallama ja fuomášan man bures Jesus vástidii saddukealaččaide. Son bođii Jesusa lusa ja jearai: “Guhtemuš báhkkon lea buot deháleamos?” ₂₉Jesus vástidii: “Deháleamos báhkkon lea dát: Gula, Israel! Hearrá, min Ipmil, Hearrá lea okta. ₃₀Ráhkis Hearrá, Ipmilat, oppa váimmus, oppa sielus, oppa mielas ja oppa fámus. ₃₁Nubbi lea dát: Ráhkis lagamuččat nugo iežat. Ii mihkkege báhkkomiid leat stuorit go dát guokte.” ₃₂ Čáloahppavaš dajai sutnje: “Oahpaheaddji, don leat vuoigadis. Don dadjet duođa go celket ahte Hearrá lea áidna Ipmil, earret su ii leat oktage. ₃₃Ja go olmmoš ráhkista su oppa váimmus ja oppa jierpmis ja oppa fámus ja ráhkista lagamuččas nugo iežas, de dat lea eambbo go boaldinoaffarat ja buot eará oaffarat.” ₃₄Go Jesus gulai ahte son vástidii jierpmálaččat, de son celkkii sutnje: “Don it leat guhkkin eret Ipmila riikkas.” Iige oktage duostan šat jearrat Jesusis maidege.

₃₅Go Jesus oahpahii tempelis, de son jearai: “Mo čáloahppavaččat sáhttet dadjat ahte Messias lea Davida bárdni? ₃₆David ieš lea cealkán Bassi Vuoiŋŋa bokte: Hearrá celkkii mu hearrái: Čohkán mu olgeš beallái, dassážii go mun bijan du vašálaččaid du julggiid vuollái. ₃₇David ieš gohčoda Messiasa hearrán. Mo Messias dalle sáhttá leat Davida bárdni?”

Ollu olbmot guldaledje mielasteaset Jesusa. ₃₈Go son oahpahii sin, de son celkkii: “Váruhehket čáloahppavaččain! Sii liikojit vázzit guhkes biktasat gárvun ja dáhttot olbmuid dearvvahit sin márkanšiljus, ₃₉sii čohkánit ovddimus stuoluide synagogas ja gudnesajiide go leat guossis, ₄₀muhto loktet leaskkaid viesuid ja atnet guhkes rohkosiid dušše hámi dihte. Dađe garraseabbon šaddá sin duopmu.”

₄₁Jesus čohkánii tempelbumbbá báldii ja geahčadii mo olbmot bidje dasa ruđaid. Eatnat riggát adde ollu. ₄₂De bođii geafes leaskanisson ja bijai bumbái guokte šlántte, moatti evrre veara. ₄₃Jesus rávkkai máhttájeddjiid lusas ja celkkii: “Duođaid, mun cealkkán didjiide: Dát geafes leaska bijai bumbái eambbo go buohkat earát. ₄₄Buohkat earát adde valljivuođasteaset, muhto son attii geafivuođastis buot mii sus lei, oppa eallámušas.”