Markus 14

₁Ledje vel guokte beaivvi beassážiidda ja suvrutkeahtes láibbi basiide. Bajimusbáhpat ja čáloahppavaččat smihtte mo sáhtášedje juonalašvuođain dohppet Jesusa ja goddit su. ₂Sii dadje: “Ii fal basiid áigge, danin go dalle olbmot vedjet stuimmáskit.”

₃Go Jesus lei Betanias Simona luhtte, gii lei spihtálaš, ja lei čohkkámin beavddis, de dohko bođii nisson geas lei alabasterbohttalis buhtis ja divrras nardusvuoiddas. Son cuvkii bohttala ja golggahii vuoidasa Jesusa oaivái. ₄Muhtumat geat ledje das, moaráhuvve ja dadje guhtet guoibmáseaset: “Manne skihtardit vuoidasa? ₅Dan livččii sáhttán vuovdit goit golmmačuođi denárii ja addit ruđaid gefiide.” Ja sii skuldojedje sakka nissona. ₆Muhto Jesus celkkii: “Diktet su ráfis! Manne dii vuorjabehtet su? Son lea dahkan munnje buori dagu. ₇Geafit leat álo din luhtte, ja dii sáhttibehtet dahkat buriid sidjiide dalle go dáhttubehtet, muhto mun in leat din luhtte álo. ₈Son dagai maid sáhtii. Son vuoiddai juo dál mu rupmaša hávdádeami várás. ₉Duođaid, mun cealkkán didjiide: Oppa máilmmis, gos ihkinassii evangelium sárdniduvvo, de muitaluvvo dán nissona dahku su muitun.”

₁₀Muhto Judas Iskariot, okta dan guoktenuppelohkásis, manai bajimusbáhpaid lusa vai beassá beahttit Jesusa. ₁₁Sii illosedje go gulle dan ja lohpidedje addit sutnje ruđa. Dan rájes Judas ohcagođii liibba addit Jesusa sin gihtii.

₁₂Suvrutkeahtes láibbi basiid vuosttaš beaivvi, go beassášláppis njuvvojuvvui, de máhttájeaddjit jerre Jesusis: “Gosa dáhtut min ráhkadit dutnje beassášmállásiid?” ₁₃Dalle Jesus vuolggahii máhttájeddjiinis guoktása ja celkkii sudnuide: “Manni gávpogii. Doppe dudno ovddal boahtá olmmái gii guoddá čáhceruhku. Čuovvu su, ₁₄ja gosa son manná, de daddji dan dálu isidii: ‘Oahpaheaddji jearrá: Gos lea latnja gos mun beasan borrat beassášmállásiid máhttájeddjiidanguin?’ ₁₅Isit čájeha dudnuide badjegearddis stuorra lanja gos visot lea válmmaštuvvon. Ráhkadeahkki dohko midjiide mállásiid.” ₁₆Máhttájeaddji guovttos vulggiiga ja bođiiga gávpogii. Visot manai nugo Jesus lei cealkán sudnuide, ja soai ráhkadeigga beassášmállásiid.

₁₇Go šattai eahket, de Jesus bođii dohko guoktenuppelohkái máhttájeddjiinis. ₁₈Go sii ledje beavddis boradeamen, de Jesus celkkii: “Duođaid, mun cealkkán didjiide: Okta dis beahttá mu – olmmái gii lea boradeamen muinna.” ₁₉Máhttájeaddjit šadde morrašii, ja nubbi nuppi maŋis jearai sus: “In suige goit mun?” ₂₀Jesus vástidii: “Okta dis guoktenuppelohkásis, olmmái gii buonjosta lihtis oktanaga muinna. ₂₁Olbmobárdni gal vuolgá eret aiddo nugo su birra lea čállojuvvon, muhto vuoi dan olbmo gii beahttá Olbmobártni! Dan olbmui livččii buoret jos son ii oppa livčče riegádange.”

₂₂Go sii ledje boradeamen, de Jesus válddii láibbi, giittii, doadjalii, attii máhttájeddjiidasas ja celkkii: “Váldet dán, dát lea mu rumaš.” ₂₃De son válddii geara, giittii Ipmila ja attii sidjiide, ja sii buohkat juhke das. ₂₄Son celkkii: “Dát lea mu varra, lihtu varra mii golggahuvvo eatnagiid ovddas. ₂₅Duođaid, mun cealkkán didjiide: Mun in šat máistte viidnemuora šaddosa ovdal go dan beaivvi go jugan ođđa viinni Ipmila riikkas.”

₂₆Go sii ledje lávlon máidnunlávlaga, de sii vulge Oljovárrái. ₂₇Jesus celkkii sidjiide: “Dii buohkat vearránehpet mus, danne go lea čállojuvvon: Mun časkkán geahčči, ja sávzzat bieđganit. ₂₈Muhto maŋŋil go mun lean čuožžilan jábmiid luhtte, de mun manan din ovdal Galileai.” ₂₉Peter dajai sutnje: “Vaikko buot earát vearránivčče dus, de in goit mun.” ₃₀Jesus vástidii: “Duođaid, mun cealkkán dutnje: Odne, dán ija, ovdal go vuoncávaris bišku guovtte geardde, de don biehttalat mu golmma geardde.” ₃₁Muhto Peter nannii: “Vaikko mun galggašin velá jápmit duinna, de mun in biehttal du.” Ja nu dadje buot earátge.

₃₂Sii bohte báikái man namma lea Getsemane, ja Jesus celkkii máhttájeddjiide: “Čohkánehket dása dan boddii go mun rohkadalan.” ₃₃Petera, Jakoba ja Johannesa son válddii fárrosis. Son riemai doarggistit ja áŧestuvvat. ₃₄Son celkkii sidjiide: “Mu siellu lea lossa morrašis, jápmima morrašis. Orrot dás ja gohcet.” ₃₅Son manai dobbelažžii, luoitádii eatnamii ja rohkadalai ahte dát boddu manašii su meattá, jos vejolaš. ₃₆Son celkkii: “Abba, Áhčážan! Buot lea dutnje vejolaš. Váldde mus eret dán geara. Muhto ii dattetge nugo mun dáhtun, muhto nugo don dáhtut.” ₃₇De son máhcai ja gávnnai máhttájeddjiid oađđimin. Son celkkii Peterii: “Simon, leatgo don oađđimin? Itgo don nagodan gohcit ovttage diimmu? ₃₈Gohcet ja rohkadallet, amadet šaddat geahččalussii. Vuoigŋa lea gal geargat, muhto oažži lea headju.” ₃₉Son manai fas dobbelažžii ja rohkadalai seammá sániiguin. ₄₀Go son máhcai, de son gávnnai sin fas oađđimin, danne go nahkárat dedde sin čalmmiid. Sii eai diehtán maid vástidit sutnje. ₄₁Son bođii sin lusa goalmmát geardde ja celkkii: “Aingo dii lehpet oađđimin ja vuoiŋŋasteamen? Dál buot lea čielggas. Diibmu lea boahtán go Olbmobárdni addojuvvo suttolaččaid gihtii. ₄₂Čuožžilehket, vulgot! Dat gii beahttá mu, lea lahka.”

₄₃Go Jesus lei ain sárdnumin, de bođii Judas, okta dan guoktenuppelohkásis, ja su fárus bajimusbáhpaid, čáloahppavaččaid ja vuorrasiid vuolggahan olmmáijoavku miehkit ja soappit gieđas. ₄₄Jesusa beahtti lei šiehtadan olbmáiguin mearkka: “Son lea dat olmmái gean mun cummistan. Dohppejehket su, fáktejehket ja dolvot eret.” ₄₅Go son bođii, de son manai dallánaga Jesusa lusa ja dajai: “Rabbi!” ja cummistii su. ₄₆Olbmát dohppejedje Jesusa ja válde su fáŋgan. ₄₇Dalle okta dain geat čužžo das, rohttii miehki ja časkkii bajimusbáhpa bálvaleaddji nu ahte su beallji čuohppasii eret. ₄₈Jesus celkkii olmmáijovkui: “Dii lehpet vuolgán miehkit ja soappit gieđas dohppet mu dego rievvára. ₄₉Mun ledjen dinguin beaivválaččat tempelšiljus ja oahpahin, ehpetge dii váldán mu gitta. Muhto dát dáhpáhuvvá vai čállagat ollašuvvet.” ₅₀Dalle buohkat guđđe su ja báhtaredje.

₅₁Jesusa mielde lei nuorra olmmái geas lei gárvun dušše liidnebivttas. Olbmát dohppejedje su, ₅₂muhto son luoitilii liidnebiktasa ja báhtarii álásin.

₅₃Jesus dolvojuvvui bajimusbáhpa lusa, ja buot bajimusbáhpat, vuorrasat ja čáloahppavaččat čoahkkanedje dohko. ₅₄Peter oavnnjildii Jesusa gitta bajimusbáhpa gárdima šilljui. Doppe son čohkánii bálvaleddjiid gaskii ja liekkadalai dollagáttis. ₅₅Bajimusbáhpat ja oppa ráđđi ohce duođaštusa Jesusa vuostá vai besset dubmet su jápmimii. Dakkár ii goitge gávdnon. ₅₆Olusat bukte vearreduođaštusaid su vuostá, muhto sin duođaštusat eai boahtán ovttaide. ₅₇De čuožžiledje muhtumat ja bukte su vuostá vearreduođaštusa: ₅₈“Mii leat gullan su cealkimin: ‘Mun gaikkun dán tempela maid olbmuid gieđat leat dahkan, ja golmma beaivvis huksen nuppi maid olbmot eai leat dahkan.’” ₅₉Muhto eai dán áššisge sin duođaštusat boahtán ovttaide. ₆₀Dalle bajimusbáhppa čuožžilii ja jearai Jesusis: “Iigo dus leat mihkkege dadjamušaid sin sivahallamiidda?” ₆₁Muhto Jesus orui jávohaga iige vástidan maidege. Bajimusbáhppa jearai vel: “Leatgo don Messias, buressivdniduvvon Ipmila Bárdni?” ₆₂Jesus vástidii: “Mun lean, ja dii šaddabehtet oaidnit Olbmobártni čohkkámin Fámu olgeš bealde ja boahtimin almmi balvvaiguin.”

₆₃Dalle bajimusbáhppa gaikkodii biktasiiddis ja dajai: “Masa mii dál šat dárbbašit duođašteddjiid? ₆₄Diihan gulaidet, mo son bilkidii Ipmila. Mo din mielas orru?” Buohkat ledje dan oaivilis ahte son ánssášii jápmit.

₆₅Muhtumat ripme čolgat su. Sii gokče su muođuid, čorbme su ja dadje: “Dál don sáhtát profehtastallat!” Maiddái fávttat spežžo su muhtui.

₆₆Peter lei vuollin šiljus. Muhtun bajimusbáhpa bálvánieida bođii dohko, ₆₇ja go son oinnii Petera liekkadallamin, de son geahčai sutnje ja dajai: “Don maid ledjet dainna Jesusiin, nasaretlaččain.” ₆₈Muhto Peter biehttalii. “Mun in eisege ipmir maid don oaivvildat”, son dajai ja manai olggos olggut šilljui. Ja vuoncávaris biškkádii. ₆₉Muhto nieida oinnii su fas ja dajai daidda geat ledje das: “Dát olmmái lea okta sis.” ₇₀Peter biehttalii fas. Maŋŋelaš earátge geat ledje das, dadje Peterii: “Don leat vissásii okta sis, donhan maid leat galilealaš.” ₇₁Muhto son garrudišgođii ja vuortnui: “Mun in dovdda dan olbmá gean birra dii hállabehtet.” ₇₂Seammás vuoncávaris biškkádii nuppádassii. De Peter muitái maid Jesus lei cealkán sutnje: “Ovdal go vuoncávaris bišku guovtte geardde, de don biehttalat mu golmma geardde.” Ja son čirrui.