Markus 15

₁Dakkaviđe iđedis bajimusbáhpat ráđđádalle vuorrasiiguin ja čáloahppavaččaiguin, oppa Ráđiin. Sii čatne Jesusa, dolvo su eret ja adde su Pilatusa háldui.

₂Pilatus jearai Jesusis: “Leatgo don juvddálaččaid gonagas?” Jesus vástidii: “Ieš don dan dajat.” ₃Bajimusbáhpat sivahalle su sakka, ₄ja Pilatus jearai: “Itgo don vástit maidege? Almma don gulat mo sii sivahallet du!” ₅Muhto Jesus ii šat vástidan maidege. Dat imaštahtii Pilatusa.

₆Basiid áigge Pilatus lávii luoitit luovos ovtta fáŋgga, dan gean álbmot siđai. ₇Muhtun gean namma lei Barabbas, lei giddagasas stuibmideddjiiguin geat ledje sorbmen olbmo stuimmiid siste. ₈Pilatusa lusa lei čoahkkanan olmmošjoavku mii siđai su dahkat nugo son lávii. ₉Pilatus jearai: “Dáhttubehtetgo mu luoitit luovos juvddálaččaid gonagasa?” ₁₀Son oainnat diđii ahte bajimusbáhpat gáđašvuođas ledje addán Jesusa su gihtii. ₁₁Muhto bajimusbáhpat oalgguhedje olbmuid sihtat su luoitit luovos baicca Barabbasa. ₁₂Pilatus jearai fas álbmogis: “Maid mun dalle dagan dán olbmái gean dii gohčodehpet juvddálaččaid gonagassan?” ₁₃Sii čurvo: “Russiinávle!” ₁₄Pilatus jearai: “Maid baháid son lea dahkan?” Muhto sii čurvo vel jitnoseappot: “Russiinávle su!” ₁₅Pilatus dáhtui dahkat olbmuid miela mielde ja luittii Barabbasa luovos, muhto Jesusa son spihččehii ja attii russiinávlejuvvot.

₁₆Soalddáhat dolvo Jesusa eatnanhearrá ladni šilljui ja rávke čoahkkái olles fáktaveaga. ₁₇Sii gárvvuhedje sutnje purpurbiktasa ja bárgidedje bastilislátnjákruvnnu ja bidje dan su oaivái. ₁₈De sii ripme dearvvahit su: “Dearvva, juvddálaččaid gonagas!” ₁₉Sii cábme soppiin su oaivvi, čolge su ja čippostedje ja gopmirdedje su ovdii. ₂₀Go sii ledje bilkidan su, de sii nulle sus purpurbiktasa, gárvvuhedje sutnje fas su iežas biktasiid ja vulge doalvut su russiinávlejuvvot.

₂₁Sii bággejedje muhtun olbmá gii lei mannamin das meaddel, guoddit Jesusa ruossa. Son lei kyrenelaš Simon, Aleksandrosa ja Rufusa áhčči, gii lei boahtimin gávpogii. ₂₂Sii dolvo Jesusa báikái man namma lea Golgata – dat lea Oaiveskálžobáiki. ₂₃Sii adde sutnje juhkat viinni masa lei seaguhuvvon myrra, muhto son ii váldán dan. ₂₄De sii russiinávlejedje su ja juogadedje su biktasiid ja vuorbádalle maid guhtege oaččui. ₂₅Lei goalmmát diibmu go sii russiinávlejedje su. ₂₆Bajilčálusin lei čállojuvvon váidda su vuostá: Juvddálaččaid gonagas. ₂₇Oktan suinna sii russiinávlejedje guokte rievvára, nubbi su olgeš ja nubbi su gurut beallái. ₂₈Nu ollašuvve čállagiid sánit: Son lohkkojuvvui láhkarihkkuid searvái. ₂₉Dat geat manne meattá, bárde oaivvi ja bilkidedje su: “Don gii gaikkut tempela ja hukset dan fas golmma beaivvis, ₃₀beastte dal iežat ja njieja vuolás ruossas!” ₃₁Seammá láhkái bilkidedje su maiddái bajimusbáhpat ja čáloahppavaččat. Sii dadje guhtet guoibmáseaset: “Earáid son gal lea beastán, muhto iežas ii veaje beastit. ₃₂Njidjos dál ruossas – Messias, Israela gonagas! Go mii dan oaidnit, de mii oskut sutnje.” Maiddái dat geat leigga russiinávlejuvvon oktan suinna, hiddjideigga su.

₃₃Beaiveguovdil, guđát diimmus, sevnnjodii miehtá eatnama, ja seavdnjadas bisttii gitta ovccát diimmu rádjái. ₃₄Ovccát diimmus Jesus čuorvvui alla jienain: “Eloi, Eloi, lema sabaktani?” Dat lea: “Ipmilan, Ipmilan, manne don leat mu guođđán?” ₃₅Go muhtumat dain geat ledje das, gulle dan, de sii dadje: “Son čuorvu Elia.” ₃₆Muhtun viehkalii njuoskadit guobbarasa ettetviinnis, bijai dan soabbegeahčái, attii sutnje juhkat ja dajai: “Gehččot dal, boahtágo Elia váldit su vuolás.” ₃₇Muhto Jesus čurvii alla jienain ja attii vuoiŋŋas. ₃₈Dalle tempela ovdaloavdda gaikánii guovdat, badjeravddas gitta vuolleravdii. ₃₉Go čuohtásaoaivámuš gii čuoččui das su buohta, oinnii Jesusa mo son attii vuoiŋŋas, de son dajai: “Duođaid, dát olmmái lei Ipmila Bárdni!”

₄₀Dobbelaččas ledje maiddái muhtun nissonat geahččamin. Das ledje Maria Magdalena, nubbi Maria gii lei nuorat Jakoba ja Josesa eadni, ja Salome. ₄₁Sii ledje vádjolan Jesusa mielde juo Galileas ja bálvalan su. Das ledje maiddái ollu eará nissonat geat ledje boahtán Jerusalemii Jesusa mielde.

₄₂Lei šaddan juo eahket; lei sabbaha ruohtta, ráhkkananbeaivi. ₄₃Dalle dasa bođii arimatealaš Josef, gudnejahttojuvvon ráđđelahttu gii ieš vurddii Ipmila riikka. Son arvvai mannat Pilatusa ságaide ja ánuhii oažžut Jesusa rupmaša. ₄₄Pilatus imaštii go gulai ahte Jesus lei juo jápmán. Son rávkkai lusas čuohtásaoaivámučča ja jearai leigo Jesus duođaid juo jápmán. ₄₅Ja go oaivámuš duođaštii dan sutnje, de son attii Jesusa rupmaša Josefii. ₄₆Josef osttii beallemasliinni, válddii Jesusa vuolás ruossas, giesai su liinni sisa ja bijai su hávdái mii lei čullojuvvon báktái. Hávddi uksaráiggi ovdii son fierahii geađggi. ₄₇Maria Magdalena ja Josefa eadni Maria geahčaiga gosa Jesus hávdáduvvui.