Markus 5

₁Sii bohte Gerasa eatnamii nuppi beallái jávrri. ₂Dalán go Jesus lávkii fatnasis, de su ovddal bođii hávddiin olmmái geas lei buhtismeahttun vuoigŋa. ₃Olmmái orui hávddiin, iige oktage nagodan šat čatnat su, ii velá láhkkiiguinge. ₄Máŋgii su gieđat ja juolggit ledje čadnojuvvon, muhto son lei cuvken láhkkiid ja botken báttiid. Ii oktage máhttán lodjudit su. ₅Ijatbeaivái son orui hávddiin ja váriin, huikkii ja nájai iežas geđggiiguin.

₆Go son dal áiccai Jesusa guhkkin, de son bođii viega, luoitádii su ovdii ₇ja čuorvvui alla jienain: “Jesus, Alimus Ipmila Bárdni, mii dus lea muinna dahkamuššan? Mun vuortnuhan du Ipmila bokte, ale givssit mu!” ₈Dasgo Jesus lei cealkán sutnje: “Don buhtismeahttun vuoigŋa, vuolgge olbmás!” ₉ “Mii du namma lea?” Jesus jearai, ja oaččui vástádussan: “Legiona, danne go mii leat eatnagat.” ₁₀Vuoiŋŋat ánuhedje ahte Jesus ii ájáše sin eret dan guovllus. ₁₁Das lahkosiin lei várrevielttis guohtumin stuorra spiidneeallu. ₁₂Buhtismeahttun vuoiŋŋat ánuhedje Jesusis: “Vuolggat min spiidneellui, divtte min mannat spiinniide!” ₁₃Jesus mieđihii dan daidda. Dalle buhtismeahttun vuoiŋŋat vulge olbmás ja manne spiinniide, ja oppa eallu, sullii guokteduhát spiinni, hurgalii báktedardda badjel vuolás jávrái, ja buot spiinnit heavvanedje.

₁₄Guođoheaddjit viehkaledje doppe ja muitaledje dán visot gávpogis ja lagas báikkiin. Olbmot bohte geahččat mii lei dáhpáhuvvan. ₁₅Sii bohte Jesusa lusa ja oidne bosttahuvvon olbmá čohkkámin das. Olmmái geas ledje leamaš buot dat vuoiŋŋat, čohkkái gárvvuhuvvon ja olles jierpmis. Dat suorggahii sin. ₁₆Dat geat ledje oaidnán visot, muitaledje mo lei geavvan bosttahuvvon olbmái ja spiinniide. ₁₇Dalle buohkat ánuhišgohte Jesusa vuolgit eret sin eatnamis.

₁₈Go Jesus manai fatnasii, de dat gii lei leamaš bosttahuvvon, siđai beassat su fárrui. ₁₉Jesus ii suovvan dan, muhto celkkii sutnje: “Mana ruoktot iežat olbmuid lusa ja muital sidjiide buot maid Hearrá lea dahkan dutnje, ja mo son lea árpmihan du.” ₂₀Olmmái vulggii ja muitalii Dekapolisa guovllus buohkaide maid Jesus lei dahkan sutnje, ja buohkat ovddošedje.

₂₁Go Jesus lei fas mannan fatnasiin jávrri nuppe beallái, de ollu olbmot čoahkkanedje su lusa. Go son lei ain jávregáttis, ₂₂de dasa bođii muhtin synagoga ovdaolmmoš gean namma lei Jairos. Go olmmái oinnii Jesusa, de son luoitádii su julggiid ovdii ₂₃ja ánuhii: “Boađe, mu uhca nieiddaš lea jápmimin. Bija gieđaid su ala, de son dearvvašmuvvá iige jáme.” ₂₄Jesus vulggii su mielde, ja ollu olbmot čuvvo su ja bahkkejedje sutnje.

₂₅Das lei maid nisson gii lei gillán vardima guoktenuppelohkái jagi. ₂₆Son lei leamaš máŋgga dálkkasteaddji divššus ja lei gillán olu. Son lei golahan buot mii sus lei, iige lean ožžon maidege vehkiid, muhto lei baicca hedjonan. ₂₇Son lei gullan mii muitaluvvui Jesusa birra, ja dál son bođii olbmuid gaskka Jesusa duohkái ja guoskkahii su biktasiid maŋil, ₂₈dasgo son jurddašii: “Jos beasašin guoskkahit su biktasiid, de mun dearvvašmuvan.” ₂₉Dallánaga vardin bisánii, ja son dovddai rupmašis ahte lei buorránan givssistis. ₃₀ Jesus dovddai dalán ahte sus lei vuolgán fápmu. Son jorggihii olbmuid siste ja jearai: “Gii guoskkahii mu biktasiid?” ₃₁Máhttájeaddjit dadje sutnje: “Don oainnát ahte olbmot bahkkejit du ala, ja jearat: Gii guoskkahii mu?” ₃₂Muhto Jesus geahčai iežas birra vai beassá oaidnit gii dan lei dahkan. ₃₃Nisson doarggistii balus, danin go son diđii mii lei dáhpáhuvvan sutnje. Son bođii Jesusa ovdii, luoitádii eatnamii ja muitalii buot mii lei dáhpáhuvvan. ₃₄Jesus celkkii sutnje: “Nieiddažan, du osku lea buoridan du. Mana ráfis, don leat buorránan givssistat.”

₃₅Go Jesus lei ain sárdnumin, de muhtumat synagoga ovdaolbmo ruovttus bohte ja dadje: “Du nieida jámii. Ale šat vuorjja oahpaheaddji.” ₃₆Go Jesus gulai sin sániid, de son celkkii synagoga ovdaolbmui: “Ale bala, duššefal oskko.” ₃₇Son ii suovvan ovttage boahtit mielde earret Petera, Jakoba ja Johannesa, Jakoba vielja. ₃₈Sii bohte synagoga ovdaolbmo vissui, ja Jesus oinnii šláma ja olbmuid geat čirro ja fuiko. ₃₉Son manai sisa ja celkkii sidjiide: “Manne dii šlápmabehtet ja čierrubehtet? Ii mánná leat jápmán, son oađđá.” ₄₀Olbmot boagustedje su. Muhto son ájii buohkaid olggos, válddii mielddis máná áhči ja eatni ja daid geat ledje suinna, ja manai latnjii gos mánná lei. ₄₁De son válddii máná gihtii ja celkkii: “Talita kum!” Dat mearkkaša: “Nieida, mun cealkkán dutnje: Lihka!” ₄₂Ja dallánaga nieida čuožžilii ja váccašii; son lei guoktenuppelotjahkásaš. Buohkat hirpmástuvve sakka. ₄₃Muhto Jesus gilddii sin garrasit muitaleames geasage mii lei dáhpáhuvvan. Son gohčui sin addit niidii borrat.