Markus 7

₁Muhtun čáloahppavaččat bohte Jerusalemis, ja ovttas farisealaččaiguin sii manne Jesusa lusa. ₂Sii oidne muhtumiid su máhttájeddjiin borramin buhtismeahttun, basakeahtes gieđaiguin. ₃Eai farisealaččat eaige eará juvddálaččatge boradišgoađe ovdal go leat bassan gieđaid. Nu sii atnet dárkilit áhčiid árbevieruid. ₄ Ja go sii leat boahtán márkanšiljus, de sii eai bora maidege ovdal go leat lávggodan. Sis leat maiddái ollu eará vierut maid sii leat dollet, nugo doidit juhkanlihtiid, mukkaid ja ruittuid. ₅Danne farisealaččat ja čáloahppavaččat jerre Jesusis: “Manne du máhttájeaddjit eai doala áhčiid árbevieruid, muhto borret buhtismeahttun gieđaiguin?” ₆Jesus vástidii sidjiide: “Dii guoktilaččat! Riekta Jesaja lea einnostan din birra. Leahan čállojuvvon: Dát álbmot gudnejahttá mu baksamiiguin, muhto dan váibmu lea guhkkin mus eret. ₇Duššás sii bálvalit mu, dasgo sin oahput leat olbmuid báhkkomat. ₈Dii lehpet hilgon Ipmila báhkkoma, vai sáhttibehtet doallat olbmuid njuolggadusaid.” ₉Ja son celkkii: “Dii lehpet čeahpit dahkat duššin Ipmila báhkkoma, vai beassabehtet atnit iežadet njuolggadusaid. ₁₀Moses celkkii: Gudnejahte áhčát ja eatnát ja Gii garuha áhčis dahje eatnis, dat galgá ráŋggáštuvvot jápmimiin. ₁₁Muhto dii oahpahehpet nuppe ládje. Jos muhtun dadjá áhččásis dahje eadnásis: ‘Dat mainna mun livččen sáhttán veahkehit du, lea dál korban: mun lean lohpidan dan tempelattáldahkan’, ₁₂de dii ehpet suova su veahkehit iežas áhči dahje eatni. ₁₃Nu dii dahkabehtet duššin Ipmila sáni, go doallabehtet árbenjuolggadusaideattet ja oahpahehpet daid. Ja eatnat eará dakkár daguid dii dahkabehtet.”

₁₄Son rávkkai fas olbmuid lusas ja celkkii: “Guldalehket buohkat mu ja geahččalehket áddet. ₁₅Ii mihkkege mii boahtá olbmo sisa olggobealde, daga su buhtismeahttumin. Muhto dat mii manná olbmos olggos, dahká olbmo buhtismeahttumin.” ₁₆Gullos dat geas leat bealjit!

₁₇Go Jesus dasto vulggii olbmuid luhtte ja bođii vissui, de máhttájeaddjit sihte su čilget dán veardádusa. ₁₈Son celkkii sidjiide: “Lehpetgo diigis nie jierpmeheamit? Ehpetgo dii ádde ahte ii mihkkege mii boahtá olbmo sisa olggobealde, sáhte dahkat su buhtismeahttumin? ₁₉Iihan dat mana su váibmui, muhto čoavjái ja dasto lunddolaš geainnu olggos.” Nu son celkkii ahte buot biepmut leat buhttásat. ₂₀Son celkkii vel: “Mii olbmos boahtá olggos, dat dahká su buhtismeahttumin. ₂₁Aiddo olbmo siskkildasas, váimmus, bohtet bahás jurdagat, furrodat, suolavuohta, olmmošgoddin, ₂₂váccešis eallin, vuovdáivuohta, bahávuohta, behtolašvuohta, nuoskivuohta, utnohisvuohta, hiddjideapmi, čeavláivuohta ja jierpmehisvuohta. ₂₃Buot dát bahá boahtá olbmo siskkildasas ja dahká su buhtismeahttumin.”

₂₄Jesus vulggii doppe Tyrosa guovlluide. Son manai orrut muhtun dállui iige dáhtton ovttage dan diehtit, muhto su boahtin ii lean čiegadeames. ₂₅Muhtun nisson gean nieiddas lei buhtismeahttun vuoigŋa, gulai ahte Jesus lei boahtán, ja son bođii ja luoitádii Jesusa julggiid ovdii. ₂₆Nisson ii lean juvddálaš, muhto Syria foinikialaš. Son siđai Jesusa ádjit bahás vuoiŋŋa su nieiddas, ₂₇muhto Jesus celkkii: “Divtte mánáid vuos gallánit. Ii leat riekta váldit láibbi mánáin ja bálkestit dan beatnagiidda.” ₂₈Nisson vástidii: “Hearrá, maiddái beatnagat ožžot borrat beavddi vuolde láibemoaluid maid mánát gahčahit.” ₂₉Dalle Jesus celkkii sutnje: “Daid sániid dihte mun cealkkán dutnje: Mana ruoktot, bahás vuoigŋa lea vuolgán du nieiddas.” ₃₀Nisson manai ruoktot ja oinnii máná veallámin seaŋggas. Bahás vuoigŋa lei vuolgán sus.

₃₁Dasto Jesus vulggii fas Tyrosa guovlluin ja bođii Sidona bokte Galileajávrái, Dekapolisa guovlluide. ₃₂Doppe su lusa buktojuvvui bealjehis olmmái gii illá máhtii sárdnut, ja sii dáhtto su bidjat gieđa olbmá ala. ₃₃Jesus válddii olbmá sierra olbmuid gaskkas, bijai suorpmaid su beljiide, čolgadii ja guoskkahii su njuokčama. ₃₄De son geahčastii albmái, šuohkihii ja celkkii sutnje: “Effata.” Dat lea: “Rahpas.” ₃₅Dallánaga olbmá bealjit rahpasedje, ja su njuokčama báddi čoavdásii, nu ahte son sártnui čielgasit. ₃₆Jesus gilddii olbmuid muitaleames dán geasage, muhto mađe eambbo son sin gilddii, dađe eambbo sii beakkuhedje dan. ₃₇Buohkat ovddošedje sakka ja dadje: “Buot son lea dahkan bures. Bealjehemiid son dahká gullin ja gielahemiid sárdnun.”