Markus 8

₁De ledje fas ollu olbmot boahtán čoahkkái iige sis lean mihkkege borramuššan. De Jesus rávkkai lusas máhttájeddjiidis ja celkkii: ₂“Mun árkkášan njuorrasit dáid olbmuid. Sii leat leamaš mu luhtte juo golbma beaivvi, iige sis leat mihkkege borramuššan. ₃Jos mun luoittán sin vuolgit borakeahttájin ruoktot, de sii vuoimmehuvvet mátkkis. Muhtumat sis leat boahtán guhkkin.” ₄Máhttájeaddjit dadje sutnje: “Mo dáppe meahcis sáhttá fidnet nu ollu láibbi ahte dat galleha dáid buohkaid?” ₅Jesus jearai: “Galle láibbi dis leat?” Sii vástidedje: “Čieža.” ₆Jesus gohčui olbmuid čohkánit eatnamii. De son válddii dan čieža láibbi, giittii, doadjalii láibbiid ja attii máhttájeddjiide. Máhttájeaddjit juogadedje daid dasto álbmogii. ₇Sis ledje maid moadde smávva guoláža. Jesus buressivdnidii guolážiid ja gohčui daidge juogaduvvot. ₈Olbmot borre ja gallánedje, ja báhcán bihtát čohkkejuvvojedje čieža veaddelihti dievva. ₉Das ledje lahka njealljeduhát olbmo. Go Jesus lei luoitán sin mannat ruoktot, ₁₀de son dallán lávkii máhttájeddjiidisguin fatnasii ja manai Dalmanuta guovlluide.

₁₁Farisealaččat bohte ja ákkastallagohte Jesusiin. Geahččalan dihte su sii dáhtto sus mearkka almmis. ₁₂Jesus šuohkihii lossadit ja celkkii: “Manne dát buolva gáibida mearkka? Duođaid, mun cealkkán didjiide: Dán bulvii ii addojuvvo mearka.” ₁₃De son vulggii sin luhtte, lávkii fas fatnasii ja manai nuppi beallái jávrri.

₁₄Máhttájeaddjit ledje vajáldahttán váldimis mielde láibbi; sis lei dušše okta láibi fatnasis. ₁₅Jesus rávvii sin: “Váruhehket farisealaččaid ja Herodesa suvrradáiggis!” ₁₆Muhto sii dadje guhtet guimmiidasaset ahte sis ii lean láibi. ₁₇Jesus fuomášii dan ja celkkii: “Manne dii dadjabehtet ahte dis ii leat láibi? Ehpetgo dii veláge árvit ehpetge ádde maidege? Leago din váibmu nu buššon? ₁₈Dishan leat čalmmit, ehpetgo dii oainne? Dishan leat bealjit, ehpetgo dii gula? Ja ehpetgo dii muitte: ₁₉Go mun doadjalin dan vihtta láibbi vihttaduhát olbmui, de galle veaddelihti dievva báhcán láibebihtáid dii čohkkiidet?” Sii vástidedje: “Guoktenuppelohkái.” ₂₀“Ja go mun doadjalin dan čieža láibbi njealljeduhát olbmui, de galle veaddelihti dievva láibebihtáid dii dalle čohkkiidet?” Sii vástidedje: “Čieža.” ₂₁Jesus celkkii sidjiide: “Ehpetgo dii veláge ádde?”

₂₂Sii bohte Betsaidai. Doppe muhtumat bukte Jesusa lusa čalmmehis olbmo ja sihte Jesusa guoskkahit su. ₂₃Jesus válddii čalmmeheami gihtii ja láidii su gávpoga olggobeallái. De son čolgadii olbmá čalmmiide, bijai gieđaid su čalmmiid ala ja jearai: “Oainnátgo maidege?” ₂₄Olmmái rabastii čalmmiid ja dajai: “Mun oainnán olbmuid – oainnán dego muoraid, muhto dat váccašit.” ₂₅Jesus bijai fas gieđaid su čalmmiid ala, ja dalle olbmá oaidnu čielggai. Son lei ollásit buorránan ja oinnii čielgasit visot. ₂₆Jesus vuolggahii su ruoktot ja celkkii: “Ale oppa finage gávpogis.”

₂₇Jesus ja su máhttájeaddjit vulge Kaisarea Filippi birasbáikkiide. Go sii ledje mátkkis dohko, de son jearai máhttájeddjiin: “Geanin olbmot dadjet mu?” ₂₈Sii vástidedje: “Muhtumat Johannes gásttašeaddjin, soapmásat Elian, earrásatgis dadjet ahte don leat muhtun profehtain.” ₂₉Jesus jearai: “Naba dii, geanin dii dadjabehtet mu?” Peter vástidii sutnje: “Don leat Messias.” ₃₀Muhto Jesus gilddii sin garrasit muitaleames iežas birra geasage.

₃₁Dasto Jesus oahpahišgođii sidjiide ahte Olbmobárdni ferte gillát ollu. Álbmoga vuorrasat, bajimusbáhpat ja čáloahppavaččat hilgot su, ja son goddojuvvo, muhto golmma beaivvi geažes son čuožžila jábmiid luhtte. ₃₂Dan son muitalii rahpasit. Dalle Peter válddii su sierra ja cuiggodišgođii su. ₃₃Muhto Jesus jorggihii, geahčai máhttájeddjiidasas ja cuiggodii Petera: “Gáidda mu ovddas, Sáhtán! Du jurdagat eai leat Ipmila, muhto olbmuid jurdagat.”

₃₄Jesus rávkkai lusas olbmuid ja máhttájeddjiidis ja celkkii sidjiide: “Jos guhtege dáhttu vádjolit mu luottaid, de son galgá biehttalit iežas, váldit iežas ruossa ja čuovvut mu. ₃₅Dasgo dat gii dáhttu gádjut iežas eallima, massá dan, muhto dat gii massá iežas eallima mu ja evangeliuma dihte, gádju dan. ₃₆Mii ávkkiid das lea olbmui jos son vuoitá alccesis oppa máilmmi, muhto massá iežas sielu? ₃₇Mainna olmmoš sáhttá oastit iežas sielu ruoktot? ₃₈Guhte dán oskkáldasmeahttun ja suttolaš buolvvas heahpana mu ja mu sániid dihte, su dihte Olbmobárdnige heahpana, go son boahtá Áhčis hearvásvuođas bassi eŋgeliiguin.”