Nahum 3

₁Vuoi varragávpoga

man dievva lea gielisvuohta

ja rieviduvvon sálaš!

Ii goassege noga stajádus.

₂Gula, spižát spohkket,

juvllat skorret,

heasttat ruhttet,

vovnnat skirvanaddet.

₃Riidejeaddjit bahkkejit ovdan,

miehkit šelgot,

sáittit álddagastet.

Goddojuvvon olbmot dievva, liikagubat,

lohkameahttun ollu jábmit,

olmmoš jorraladdá liikkaide.

₄Nu šattai dán liekkus čáppa fuorá

eatnatgeardásaš furrošeami dihte.

Son lei čeahppi noidošit,

son čanai álbmogiid fuorrávuođainis,

čearddaid noidošemiinis.

₅Dál mun jorgalan du vuostá,

cealká Hearrá, Almmiveagaid Ipmil.

Mun bajidan du vuolppu

badjel du muođuid

ja čájehan álbmogiidda du álásvuođa,

riikkaide du heahpada.

₆Mun bállahastalan du durddiin,

heahppášuhtán du,

bijan du geahčadeamošin.

₇Buohkat geat oidnet du

jorgalit dutnje selggiid ja dadjet:

“Ninive lea hearjiduvvon,

gii dan árpmoštalašii?

Leago oktage gii jeđđe su?”

₈Leatgo don buoret go No Amon,

mii lei Nileanu gáttis, čáziid gasku?

Eatnu lei dan suodji, čáhci dan muvra.

₉Nubia ja Egypta adde gávpogii

dan stuorra fámu,

Put ja Libya ledje dan doarjagat.

₁₀Dattetge dan álbmot dolvojuvvui veagal,

datnai fertii mannat fáŋgavuhtii.

Velá sin mánážatge cuvkejuvvojedje

buot gáhtačiegain.

Allanálat olbmát vuorbádallojuvvojedje,

buot dan stuorrát biddjojuvvojedje láhkkiide.

₁₁Maiddái don juhkaluvat

nu ahte mielahuvat.

Maiddái don galggat ohcat suoji

vašálačča ovddas.

₁₂Buot du ladnit leat dego fiikonmuorat

main leat árra šaddosat:

Jos dat savdnjiluvvojit,

de dat gahččet dan njálbmái

gii dáhttu daid borrat.

₁₃Geahča: Du soahteolbmát

leat dego nissonat.

Du eatnama poarttat

leat rabastuvvon vašálažžii.

Dolla lea loaktán du poartabummaid.

₁₄Goaivvo alccesat čázi

birastahttojumi várás,

nanne ladniidat!

Steaččo rábáha, duolmma láirrá,

dohppe diilageađgefoarpma!

₁₅Dolla loaktá du, miehkki loahpaha du,

borrá du dego rásselohkkosuoksa,

vaikko dii lehpet ollugat

dego rásselohkkosuovssat,

eatnagat dego rásselohkkomoahti.

₁₆Vaikko du gávpeolbmát livčče eanebut

go almmi násttit,

de dat leat dego suovssat

mat guđđet gara ja girdilit.

₁₇Du virgeolbmát leat eatnagat

dego rásselohkut,

du čállit nugo rásselohkkomoahti

mii seaivu muvrra ala,

go beaivi jálddosma,

muhto go beaivváš badjána,

de dat girdilit,

iige oktage dieđe gosa dat šadde.

₁₈Du báimmanat snahppojit,

Assyria gonagas,

du oaivámuččat ođđet.

Du álbmot lea bieđganan váriide,

iige oktage čohkke dan.

₁₉Du vihkái ii leat geahpádus,

du hávvi ii leat buorideames.

Buohkat geat gullet ságaid du birra,

spežžot gieđaid.

Giiba ii livčče deaivvahallan

du heaittekeahtes bahávuhtii?