Nehemja 12

₁Dát leat dat báhpat ja levilaččat geat bohte ruovttoluotta oktan Serubbabeliin, Šealtiela bártniin, ja Ješuain:

Seraja, Jeremia, Esra, ₂Amarja, Malluk, Hattuš, ₃Šekanja, Rehum, Meremot, ₄Iddo, Ginneton, Abia, ₅Mijamin, Maadja, Bilga, ₆Šemaja, Jojarib, Jedaja, ₇Sallu, Amok, Hilkia ja Jedaja. Sii ledje báhpaid ja sin virgeguimmiid oaivámuččat Ješua áigge.

₈Levilaččat: Ješua, Binnui, Kadmiel, Šerebja, Juda ja Mattanja, gii ovttas virgeguimmiidisguin jođihii máidnunlávluma, ₉ja Bakbukja ja Unni, geat ovttas virgeguimmiideaskkaguin čuoččuiga nubbin joavkun aiddo sin buohta.

₁₀Ješuai riegádii Jojakim, Jojakimii Eljašib, Eljašibii Jojada, ₁₁Jojadai Johanan ja Johananii Jaddua.

₁₂Jojakima áigge dát olbmát ledje báhppasogaid oaivámuččat: Meraja lei Seraja soga oaivámuš, Hananja Jeremia soga, ₁₃Mešullam Esra soga, Johanan Amarja soga, ₁₄Jonatan Malluka soga, Josef Šebanja soga, ₁₅Adna Harima soga, Helkai Merajota soga, ₁₆Sakarja Iddo soga, Mešullam Ginnetona soga, ₁₇Sikri Abia soga, Minjamina soga, Piltai Moadja soga, ₁₈Šammua Bilga soga, Jonatan Šemaja soga, ₁₉Mattenai Jojariba soga, Ussi Jedaja soga, ₂₀Kallai Sallu soga, Eber Amoka soga, ₂₁Hašabja Hilkia soga ja Netanel Jedaja soga oaivámuš.

₂₂Eljašiba, Jojada, Johanana ja Jaddua áigge báhppasogaid oaivámuččat čállojuvvojedje girjái Persia gonagasa Dareiosa ráđđenáiggi rádjái. ₂₃Levilaččaid sogaid oaivámuččat čállojuvvojedje muitalusaid girjjiide Johanana, Eljašiba bártni, áiggi rádjái.

₂₄Levilaččaid oaivámuččat ledje Hašabja, Šerebja, Ješua, Binnui ja Kadmiel. Sin virgeguoimmit čužžo aiddo sin buohta vuoruideaset mielde. Sii giite ja rámidedje Ipmila, nugo Ipmila olmmái David lei mearridan. ₂₅Mattanja, Bakbukja, Obadja, Mešullam, Talmon ja Akkub ledje uksafávttat geaid bargun lei fáktet poarttaid vuorkálanjaid. ₂₆Sii ledje Jojakima, Ješua bártni, Josadaka áddjuba, ja eatnanhearrá Nehemja ja Esra, čáloahppavačča, áigásaš olbmot.

₂₇Go šattai áigi vihahit Jerusalema muvrra, de Jerusalemii vižžojuvvojedje levilaččat buot báikkiin gos sii ásse, lágidit vihahanávvudeami, máidnut ja čuojahit symbálaid, hárppaid ja lyraid. ₂₈Lávlut čoagganedje Jerusalema birasguovlluin ja netofalaččaid giliin, ₂₉Bet-Haggilgalis ja dain eatnamiin mat leat Geba ja Asmaveta birra. Lávlut ledje oainnat huksen alcceseaset giliid Jerusalema lahka. ₃₀Báhpat ja levilaččat buhtistedje iežaset, ja dasto sii buhtistedje álbmoga, poarttaid ja muvrra.

₃₁De mun gohččon Juda oaivámuččaid goargŋut muvrra ala ja bidjen dasa guokte stuorra máidnunkoara. Nubbi dain vádjolii muvrra alde olgeš guvlui Duvdnepoartta guvlui. ₃₂Sin maŋis váccii Hošaja ja bealli Juda oaivámuččain ja ₃₃Asarja, Esra, Mešullam, ₃₄Juda, Benjamin, Šemaja ja Jeremia. ₃₅Sin maŋis bohte muhtun báhpat ja čuojahedje trompehtaid. Dat ledje Sakarja, Jonatana bárdni; su áddjá lei Šemaja, gean áhčči lei Mattanja, gean áhčči lei Mikaja, gean áhčči lei Sakkur, gean áhčči lei Asaf, ₃₆ja su virgeguoimmit Šemaja, Asarel, Milalai, Gilalai, Maai, Netanel, Juda ja Hanani. Sii čuojahedje daid čuojanasaid maid Ipmila olmmái David lei mearridan, ja Esra, čáloahppavaš, váccii sin ovddas. ₃₇Sii vázze Ájapoartta meattá ja das ain njuolga bajás boardaga Davida gávpogii, dan boardaga gokko muvra badjána Davida šloahta bajábeallái, ja nuorttas gitta Čáhcepoartta rádjái. ₃₈Nubbi máidnunkoarra vádjolii gurut guvlui, ja mun ovttas álbmoga nuppiin beliin vázzen dan maŋis. Mii vácciimet muvrra alde Ommantoartna meattá Govdamuvrii ₃₉ja doppe Efraimpoartta, Ješanapoartta, Guollepoartta, Hananeltoartna ja Meatoartna bokte Sávzaportii. Fáktapoartta gurrii mii čuoččaheimmet.

₄₀De goabbáge máidnunkoarra válddii iežas saji Ipmila viesus, nu maiddái mun ja ovttas muinna bealli oaivámuččain ₄₁ja báhpat Eljakim, Maaseja, Minjamin, Mikaja, Eljoenai, Sakarja ja Hananja geain ledje trompehtat, ₄₂ja Maaseja, Šemaja, Elasar, Ussi, Johanan, Malkia, Elam ja Eser. De lávlut lávlugohte, ja Jisrahja jođihii sin.

₄₃Dan beaivvi oaffaruššojuvvojedje stuorra oaffarat, ja buohkat illudedje, dasgo Ipmil lei addán sidjiide stuorra ilu. Nissonat ja mánát maid illudedje, ja illudeapmi gullui guhkás Jerusalemis.

₄₄Seammá beaivvi nammaduvvojedje olbmát gozihit vuorkálanjaid. Daidda ledje ráddjojuvvon oaffarattáldagat, álgošaddu ja logádasat maid báhpat ja levilaččat lága mielde galge oažžut gávpogiid bealdduin. Illu lei stuoris Judas dan dihte go báhpat ja levilaččat ledje fas bálvaleamen ₄₅ja atnimin fuola ipmilálvalusmeanuin ja buhtistanmeanuin. Maiddái lávlut ja uksafávttat bálvaledje nugo David ja su bárdni Salomo leigga mearridan. ₄₆Ledjehan juo dolin, Davida ja Asafa áigge, lávluin jođiheaddjit, go sii lávlo giittuslávlagiid ja máidnunlávlagiid Ipmilii. ₄₇Serubbabela ja Nehemja áigge buot israellaččat adde lávluide ja uksafávttaide dan maid sii dárbbašedje beaivválaččat. Olbmot adde levilaččaide bassi attáldagaid mat sidjiide gulle, ja levilaččatgis adde Arona bártniide sin oasi.