Nehemja 13

₁Seammá beaivvi álbmogii lohkkojuvvui Mosesa girjjis. Dalle fuomášuvvui mearrádus ahte ii oktage ammonlaš iige moablaš goassege oaččo beassat Ipmila searvegoddái, ₂go sii eai lean miehtan addit israellaččaide láibbi ja čázi, muhto ledje baicce bálkáhan Bileama garuhit sin. Dattetge min Ipmil jorgalii garuhusa buressivdnádussan. ₃Go israellaččat ledje gullan lága, de sii čulde buot vierrásiid eret Israelis.

₄Muhto ovdal dan báhppa Eljašib lei biddjojuvvon Ipmila tempela vuorkálanjaid bearráigeahččin. Son lei Tobia fuolki ₅ja lei lágidan sutnje stuorra lanja, gosa ovdal lávejedje rádjat borramušoaffara, suovvasiid, lihtiid ja daid gortni, viinni ja oljju logádasaid mat gulle levilaččaide, lávluide ja uksafávttaide, ja báhpaid attáldagaid. ₆Mun in lean Jerusalemis go buot dát dáhpáhuvai, dasgo mun ledjen máhccan Babylonia gonagasa Artaxerxesa lusa su golbmaloginuppi ráđđenjagis. Muhto muhtun áiggi geažes mun bivden gonagasas lobi vuolgit fas Jerusalemii. ₇Go mun jovden dohko ja oidnen dan bahá maid Eljašib lei dahkan, go lei lágidan Tobiai gámmára Ipmila viesu ovdašiljuide, ₈de mun suhtten sakka ja bálkestin buot Tobia biergasiid olggos lanjas. ₉De mun gohččon buhtistit lanjaid ja bijahin fas dohko tempellihtiid, borramušoaffara ja suovvasiid.

₁₀Mun gullen maid ahte levilaččat eai lean ožžon dan maid livčče galgan oažžut, ja ahte levilaččat ja lávlut geaid bargun lei doaimmahit tempelbálvalusa, ledje mannan dan dihte iešguhtege báikásis. ₁₁Dalle mun belken oaivámuččaid ja jerren manne sii eai lean atnán fuola Ipmila viesus. De mun čohkkejin levilaččaid ja bidjen sin fas virggiidasaset. ₁₂Dasto oppa Juda buvttii vuorkálanjaide gordne-, viidne- ja oljologádasaid. ₁₃Mun bidjen báhppa Šelemja, čálli Sadoka ja Pedaja, levilačča, gozihit vuorkálanjaid, ja adden sidjiide veahkkin Hanana, Sakkura bártni, Mattanja áddjuba. Sii oainnat adnojuvvojedje oskkáldassan ja galge atnit fuola das ahte sin vieljat ožžo oasiset.

₁₄Ipmilan, muitte mu dán dihte, alege vajáldahte daid oskkáldas daguid maid mun lean dahkan Ipmilan viesu ja dan bálvalusa ávkin.

₁₅Daid áiggiid mun oidnen muhtin Juda olbmuid duolbmamin viidnebohčingáriid sabbahin. Soapmásat fievrridedje gortni maid ledje noađuhan áseniid čielgái, ja maiddái viinni, viidnemurjjiid, fiikoniid ja eará gálvvuid, ja bukte daid Jerusalemii sabbatbeaivvi. Mun cuiggodin sin vuovdimis doppe eallámušaid. ₁₆Muhtun Tyrosa olbmát geat ásse Jerusalemis, bukte guliid ja juohkelágán gálvvuid ja vuvde daid juvddálaččaide sabbahin. ₁₇Dalle mun belken Juda hearráid ja dadjen sidjiide: “Mo dii sáhttibehtet láhttet nie bahás ehpetge basut sabbaha? ₁₈Almma min Ipmil lea addán buot dáid lihkuhisvuođaid midjiide ja dán gávpogii dan dihte go din áhčit dahke dakkáriid? Ja dál dii lasihehpet Ipmila moari Israela vuostá, go ehpet basut sabbaha.” ₁₉Go Jerusalema poarttain sevnnjodišgođii ovdal sabbaha, de mun gohččon dahppat uvssaid ja gilden rahpamis daid ovdal go sabbat lei vássán. Mun maid bidjen muhtumiid iežan olbmáin fáktet poarttaid, vai makkárge gálvvut eai buktojuvvoše gávpogii sabbahin. ₂₀Moddii gávppašeaddjit ja buotlágáš gálvvuid vuovdit idjadedje Jerusalema olggobealde, ₂₁muhto mun cuiggodin sin ja celken: “Manne dii idjadehpet muvraguoras? Jos dii oktii vel dahkabehtet nie, de mun gohčun fallehit din.” Dan áiggi rájes sii eai šat boahtán sabbahin. ₂₂Dasto mun mearridin levilaččaid buhtistit iežaset ja boahtit fáktet poarttaid, vai sabbatbeaivi adnojuvvošii bassin.

Ipmilan, muitte mu maiddái dán dihte, ja árpmit mu stuorra árkkálmastinvuođastat!

₂₃Daid áiggiid mun fuomášin ahte muhtun juvddálaččat ledje váldán áhkkán Ašdoda, Ammona ja Moaba nissoniid. ₂₄Bealli sin mánáin hupme ašdodgiela dahje muhtun eará álbmoga giela, muhto eai ádden hebreagiela. ₂₅Mun belken sin ja garuhin sin, muhtumiid mun velá cápmen ja gaikon sis vuovttaid. De mun vuortnuhin sin Ipmila bokte: “Dii ehpet oaččo addit nieiddaideattet sin bártniide ehpetge váldit sin nieiddaid bártniidasadet dahje alcceseattet áhkkán. ₂₆Iigo Salomo, Israela gonagas, suddudan aiddo dáinna lágiin? Su veardásaš gonagas ii lean ovttage eará álbmogis, ja Ipmil ráhkistii su ja bijai su oppa Israela gonagassan, muhto vierronissonat fillejedje maiddái su suddudit. ₂₇Galgágo olmmoš dal gullat ahte dii dahkabehtet dán stuorra suttu ja lehpet oskkáldasmeahttumat min Ipmilii, go váldibehtet áhkkán vierronissoniid?”

₂₈Jojadas, bajimusbáhppa Eljašiba bártnis, lei bárdni gii lei horonlaš Sanballata vivva; su mun ádjen eret.

₂₉Ipmilan, muitte mo sii leat duolvadan báhppavuođa ja báhpaid ja levilaččaid lihtu.

₃₀Ná mun buhtistin sin buot vierrásis ja mearridin báhpaid ja levilaččaid bálvalanbargguid, nu ahte juohkehaš diđii maid galggai bargat. ₃₁Mun mearridin maid áiggiid goas sii galge buktit muoraid ja álgošattuid.

Ipmilan, muitte dan ja loga dan munnje buorrin!