Nehemja 8

₁Oppa álbmot čoagganii Čáhcepoartta šilljui. Sii dáhtto čáloahppavačča Esra viežžat girjegearu mas lei Mosesa láhka, man Hearrá lei addán Israelii. ₂Báhppa Esra buvttii lága searvegotti ovdii. Das ledje olbmát ja nissonat, buohkat geat nagadedje ipmirdit maid gulle. Dalle lei čihččet mánu vuosttaš beaivi. ₃Esra čuoččui Čáhcepoartta šiljus árra iđida rájes gitta gaskabeaivvi rádjái ja logai lága olbmáide ja nissoniidda ja buohkaide geat nagadedje áddet, ja buohkat guldaledje dárkilit mii láhkagirjjis daddjojuvvui. ₄Esra, čáloahppavaš, čuoččui muorraaládasa alde mii lei ráhkaduvvon aiddo dán várás. Su olgeš bealde čužžo Mattitja, Šema, Anaja, Uria, Hilkia ja Maaseja ja su gurut bealdegis Pedaja, Mišael, Malkia, Hašum, Hašbaddana, Sakarja ja Mešullam. ₅Esra rabastii girjegearu buohkaid oaidnut – son čuoččui badjeleappos go earát – ja go son rabastii dan, de oppa álbmot čuožžilii. ₆Esra máinnui Hearrá, stuorra Ipmila, ja oppa álbmot bajidii gieđaid ja čuorvvui: “Amen, amen!” Sii čippostedje ja rohkadalle Hearrá eatnamii muođuid. ₇Go álbmot fas lei čuožžilan, de levilaččat Ješua, Bani, Šerebja, Jamin, Akkub, Šabbetai, Hodia, Maaseja, Kelita, Asarja, Josabad, Hanan ja Pelaja čilgejedje dasa lága. ₈Sii lohke Ipmila láhkagirjji, dulkojedje ja čilgejedje dan, nu ahte olbmot áddejedje dan mii lohkkojuvvui.

₉Eatnanhearrá Nehemja, báhppa Esra, čáloahppavaš, ja levilaččat geat oahpahedje álbmoga, dadje sidjiide: “Dát beaivi lea basuhuvvon Hearrái, din Ipmilii. Allet moraš alletge čiero!” Dasgo buohkat čirro go gulle mii láhkii lei čállojuvvon. ₁₀De Esra dajai sidjiide: “Mannet dál ruoktot, borret ávvubiepmu ja juhket njálgga viinni, ja addet daiddage geain ii leat mihkkege. Dát beaivihan lea basuhuvvon min Hearrái. Allet leage morrašis, dasgo illu man Hearrá addá lea din fápmu.” ₁₁Levilaččat oadjudedje álbmoga ja dadje: “Lehket muosis, dát beaivi lea bassi. Allet moraš!” ₁₂De buohkat vulge ruoktot borrat ja juhkat, ja sii adde attáldagaid ja dolle stuorra ávvudeami, dasgo sii ledje ádden dan mii sidjiide lei oahpahuvvon.

₁₃Mánu nuppi beaivvi čoahkkanedje buot álbmoga sohkaoaivámuččat, báhpat ja levilaččat Esra, čáloahppavačča, lusa guorahallat lága. ₁₄Sii fuobmájedje ahte lei čállojuvvon láhkii ahte Hearrá lei gohččon Mosesa bokte israellaččaid ássat lastagođiin čihččet mánu basiid áiggi. ₁₅Dalle sii gulahedje buot gávpogiin ja Jerusalemis: “Mannet váriide viežžat oliivamuoraid, meahcceoliivamuoraid, myrtamuoraid, pálmmaid ja eará suhkkes muoraid lastaovssiid, ja ráhkadehket dain gođiid, nugo lea čállojuvvon.”

₁₆Dalle buohkat manne viežžat lastaovssiid, ja juohkehaš ráhkadii goađi dáhkis ala dahje šilljosis. Sii dahke gođiid maiddái Ipmila viesu šiljuide ja Čáhcepoartta ja Efraima poartta šiljuide. ₁₇Oppa searvegoddi, dat geat ledje máhccan fáŋgavuođas, ráhkadedje lastagođiid ja orro dain. Israellaččat eai lean dahkan nu Josua, Nuna bártni, beivviid rájes dán beaivvi rádjái, ja sii ávvudedje ja illudedje. ₁₈Beaivvis beaivái Esra logai Ipmila láhkagirjji, vuosttaš beaivvis gitta maŋimuš beaivái. Čieža beaivvi olbmot dolle basiid, ja gávccát beaivvi lei bassi čoagganeapmi, nugo lei mearriduvvon.