Nehemja 9

Máidnojuvvon lehkos

du hearvás namma,

dat lea aliduvvon buot máidnuma

ja rámádusa badjel.

₆Aivve don leat Hearrá.

Don leat sivdnidan almmi,

almmiid almmi ja buot dan veaga,

eatnama ja buot mii das lea,

mearaid ja buot mii dain lea.

Don ealihat buot,

ja almmiveahka rohkadallá du.

₇Don leat Hearrá Ipmil.

Don válljejit Abrama,

buktet su Uras Kaldeas

ja addet sutnje nama Abraham.

₈Don oidnet ahte son lei dutnje oskkáldas.

Don dahket suinna lihtu,

lohpidit addit su nállái

eatnama mii gulai kanaanlaččaide,

hetlaččaide, amorlaččaide, perisselaččaide,

jebuslaččaide ja girgašlaččaide.

Ja don dollet iežat lohpádusa,

dasgo don leat oskkáldas.

₉Don oidnet min áhčiid

vártnuhisvuođa Egyptas,

don gullet sin čuorvasa Ruksesmeara gáttis.

₁₀Don dahket mearkkaid

ja oavdudaguid faraoi,

su bálvaleddjiide ja su eatnama álbmogii,

dasgo don oidnet sin čeavlás meanuid

min áhčiid vuostá.

Nu don dahket alccesat nama

mii beaggá ain odnege.

₁₁Don luddejit ábi sin ovddas,

ja sii rasttildedje meara goikása mielde.

Muhto daid geat doarrádalle sin,

don suhppejit čiekŋalassii

dego geađggi veagalaš čáziide.

₁₂Don láidejit sin balvabáccis beaivet,

ihkku don diktet dollabácci čuvget

geainnu man sii johte.

₁₃Don njidjet Sinaivárrái,

don sárdnot singuin almmis,

addet sidjiide rivttes njuolggadusaid

ja luohtehahtti lágaid,

buriid gohččumiid ja báhkkomiid.

₁₄Don almmuhit sidjiide

iežat bassi sabbaha,

ja don addet sidjiide báhkkomiid,

njuolggadusaid ja lágaid

du bálvaleaddji Mosesa bokte.

₁₅Don addet sidjiide láibbi almmis,

go sii nelgo,

don diktet čázi golgat bávttis,

go sii goike.

Don gohččot sin mannat váldit oapmineaset

eatnama maid ledjet vurdnon

addit sidjiide.

₁₆Muhto min áhčit ledje

čeavlát ja nággárat,

eai sii guldalan du báhkkomiid.

₁₇Sii biehttaledje jeagadeames eaige muitán

oavdduid maid don ledjet dahkan sidjiide.

Sii nággárušše ja mearridedje

máhccat Egypta šlávvavuhtii.

Muhto don attát ándagassii,

don leat árbmugas ja váibmoláđis Ipmil,

don leat guhkesmielalaš

ja du buorrevuohta lea stuoris,

don it hilgon sin.

₁₈Sii leikejedje gálbbi alcceseaset

ja dadje: “Dát lea du Ipmil

guhte doalvvui du eret Egyptas.”

Sii bilkidedje du sakka.

₁₉Muhto stuorra váibmoláđisvuođastat

don it dattetge guođđán sin meahccái.

Balvabázzi ii gáidan sis beaivet,

muhto čájehii sidjiide geainnu,

iige dollabázzi gáidan sis ihkku,

muhto čuvgii sidjiide geainnu man johtit.

₂₀Don addet iežat buori vuoiŋŋa máhttáhit sin,

don addet sidjiide manna borrat

ja čázi, go sii goike.

₂₁Don atnet sis fuola

njealljelogi jagi meahcis,

ii sis váilon mihkkege.

Sin biktasat eai nohkan

eaige juolggit bohtanan.

₂₂Don addet sin oapmin

álbmogiid ja riikkaid

ja dahket daid sin rádjeeanamin.

Sii válde eatnamiid

mat gulle Sihonii, Hešbona gonagassii,

ja Ogii, Bašana gonagassii.

₂₃Don addet sidjiide mánáid

nu ollu go almmis leat násttit.

Don buktet sin eatnamii

maid ledjet lohpidan

sin áhčiide.

₂₄Ja mánát válde eatnama oapmineaset.

Don vuolidit sin ovddas kanaanlaččaid,

eatnama ássiid,

ja addet sin gihtii

gonagasaid ja eatnama olbmuid,

sii besse dahkat sidjiide maid dáhtto.

₂₅Sii válde ladnegávpogiid

ja šattolaš eatnamiid.

Sii válde viesuid maid dievva ledje

buorit gálvvut,

čullojuvvon arvegáivvuid ja viidnegárddiid,

oliivagárddiid ja šattosmuoraid eatnatvuođa.

Sii borre, gallánedje ja buido,

sii návddašedje du stuorra attáldagaid.

₂₆Muhto de sii ripme nággáruššat

ja vuostálastigohte du,

sii jorgaledje du láhkii selggiid.

Sii godde du profehtaid

geat nuktaledje sin

jorgalit fas du lusa,

sii bilkidedje du sakka.

₂₇Don addet sin vašálaččaid gihtii,

ja sii sorde sin.

Dalle sii čurvo du heađis

ja áŧestusas,

ja don gullet sin albmái.

Stuorra váibmoláđisvuođastat

don vuolggahit sidjiide bestiid

geat beste sin vašálaččaid gieđas.

₂₈Muhto go sii ledje ožžon ráfi,

de sii ohpit dahke

dan maid don atnet bahán.

Don addet sin vašálaččaid gihtii

geat ráđđejedje sin.

Muhto go sii fas čurvo du,

de don gullet dan albmái,

ja stuorra váibmoláđisvuođastat

don gádjot sin eatnat gerddiid.

₂₉Don nuktalit álbmoga

jorgalit doallat du lága,

muhto sii ledje čeavlát

eaige guldalan du báhkkomiid.

Sii suddudedje du lágaid vuostá

mat addet eallima daidda geat dollet daid.

Vuosteháguin sii jorgaledje selggiid,

sii ledje nággárat eaige dáhtton guldalit.

₃₀Don gierddahallet sin eatnat jagiid,

vuoiŋŋainat don várrejit sin

ja diktet iežat profehtaid nuktalit sin,

muhto sii eai dáhtton guldalit.

De don addet sin vierroálbmogiid gihtii,

₃₁muhto stuorra váibmoláđisvuođastat

don it duššadan sin áibbas

itge guođđán sin,

dasgo don leat árbmugas ja váibmoláđis Ipmil.

₃₂Ja dál, min Ipmil, don stuorra,

veagalaš ja hirbmatlaš Ipmil

guhte doalat lihtu ja bisuhat árpmu,

ale loga smávisin

buot dan áŧestusa mii lea deaividan min

– min gonagasaid ja oaivámuččaid,

min báhpaid ja profehtaid,

min áhčiid ja oppa du álbmoga –

Assyria gonagasaid beivviid rájes

gitta dán beaivvi rádjái.

₃₃Don leat leamaš vuoigatlaš

juohke áššis mii lea deaividan min,

don leat leamaš oskkáldas

vaikko mii leat eallán ipmilmeahttumit.

₃₄Min gonagasat ja oaivámuččat,

min báhpat ja áhčit

eai doallan du lága,

sii eai guldalan du báhkkomiid

eaige várrehusaid

maid don addet sidjiide.

₃₅Vaikko sii ásse iežaset riikkas

ja sis ledje buot buorit

maid don ledjet addán sidjiide,

viiddis ja šattolaš eatnamis

maid don ledjet addán sidjiide oapmin,

de sii eai bálvalan du

eaige jorgalan bahás vádjolusasteaset.

₃₆Dál mii leat šlávat.

Eatnamis maid don addet min áhčiide

vai sii beasašedje návddašit dan šaddosiid

ja buriid attáldagaid,

das mii leat dál šlávvan.

₃₇Eatnama valljugas šaddu

manná dál gonagasaide

geaid gihtii don leat addán min

min suttuid dihte.

Sii ráđđejit min rupmaša ja min omiid

aiddo nugo dáhttot.

Mii leat stuorra heađis.