4. Mosesgirji 1

₁Jahki ja mánnu maŋŋil go israellaččat ledje vuolgán Egyptas, nuppi jagi nuppi mánu vuosttaš beaivvi, Hearrá sártnui Sinaimeahcis almmustusgoađis Mosesii:

₂Lohket oppa Israela searvegotti olbmáid sogaid mielde ja bearrašiid mielde, ja merkejehket logahallamii juohkehačča nama. ₃Doai Aroniin galgabeahtti geahčadit buot Israela soahteolbmáid, guoktelogijahkásaččaid ja das boarráseappuid geat sáhttet soahtat. ₄Dudnos galgá leat veahkkin olmmái guđege čearddas, iežas bearraša oaivámuš. ₅Dát olbmát galget leat dudno veahkkin: Rubena čearddas Elisur, Šedeura bárdni, ₆Simeona čearddas Šelumiel, Surišaddaja bárdni, ₇Juda čearddas Nahšon, Amminadaba bárdni, ₈Isaskara čearddas Netanel, Suara bárdni, ₉Sebulona čearddas Eliab, Helona bárdni, ₁₀Josefa bártniin Efraima čeardda olmmoš Elišama, Ammihuda bárdni ja Manasse čeardda olmmoš Gamliel, Pedasura bárdni, ₁₁Benjamina čearddas Abidan, Gidoni bárdni, ₁₂Dana čearddas Ahieser, Ammišaddaja bárdni, ₁₃Ašera čearddas Pagiel, Okrana bárdni, ₁₄Gada čearddas Eljasaf, Deuela bárdni, ₁₅ja Naftali čearddas Ahira, Enana bárdni. ₁₆Dát leat searvegotti ovddasteaddjit, čearddaid ja sogaid oaivámuččat geat galget jođihit Israela soahteveaga.

₁₇Moses ja Aron válddiiga veahkkin dáid namahuvvon olbmáid ₁₈ja rávkkaiga čoahkkái oppa searvegotti nuppi mánu vuosttaš beaivvi. Buot guoktelogijahkásaš ja boarráset olbmát lohkkojuvvojedje ja merkejuvvojedje logahallamiidda sogaid mielde ja bearrašiid mielde. ₁₉Ja Moses geahčadii israellaččaid Sinaimeahcis, nugo Hearrá lei gohččon.

₂₀Rubena, Israela vuosttašriegádeaddji nálli, buot guoktelogijahkásaš ja das boarráset olbmát geat sáhtte soahtat, lohkkojuvvojedje ja merkejuvvojedje logahallamii sogaid mielde ja bearrašiid mielde. ₂₁Dát Rubena čeardda olbmát ledje njealljelogiguhttaduhát vihttačuođi.

₂₂Simeona nálli, buot guoktelogijahkásaš ja das boarráset olbmát geat sáhtte soahtat, lohkkojuvvojedje ja merkejuvvojedje logahallamii sogaid mielde ja bearrašiid mielde. ₂₃Dát Simeona čeardda olbmát ledje vihttalogiovcciduhát golbmačuođi.

₂₄Gada nálli, buot guoktelogijahkásaš ja das boarráset olbmát geat sáhtte soahtat, merkejuvvojedje logahallamii sogaid mielde ja bearrašiid mielde. ₂₅Dát Gada čeardda olbmát ledje njealljelogivihttaduhát guhttačuođivihttalogi.

₂₆Juda nálli, buot guoktelogijahkásaš ja das boarráset olbmát geat sáhtte soahtat, merkejuvvojedje logahallamii sogaid mielde ja bearrašiid mielde. ₂₇Dát Juda čeardda olbmát ledje čiežaloginjealljeduhát guhttačuođi.

₂₈Isaskara nálli, buot guoktelogijahkásaš ja das boarráset olbmát geat sáhtte soahtat, merkejuvvojedje logahallamii sogaid mielde ja bearrašiid mielde. ₂₉Dát Isaskara čeardda olbmát ledje vihttaloginjealljeduhát njeallječuođi.

₃₀Sebulona nálli, buot guoktelogijahkásaš ja das boarráset olbmát geat sáhtte soahtat, merkejuvvojedje logahallamii sogaid mielde ja bearrašiid mielde. ₃₁Dát Sebulona čeardda olbmát ledje vihttalogičiežaduhát njeallječuođi.

₃₂Josefa bártni Efraima nálli, buot guoktelogijahkásaš ja das boarráset olbmát geat sáhtte soahtat, merkejuvvojedje logahallamii sogaid mielde ja bearrašiid mielde. ₃₃Dát Efraima čeardda olbmát ledje njealljelogiduhát vihttačuođi.

₃₄Josefa nuppi bártni Manasse nálli, buot guoktelogijahkásaš ja das boarráset olbmát geat sáhtte soahtat, merkejuvvojedje logahallamii sogaid mielde ja bearrašiid mielde. ₃₅Dát Manasse čeardda olbmát ledje golbmalogiguokteduhát guoktečuođi.

₃₆Benjamina nálli, buot guoktelogijahkásaš ja das boarráset olbmát geat sáhtte soahtat, merkejuvvojedje logahallamii sogaid mielde ja bearrašiid mielde. ₃₇Dát Benjamina čeardda olbmát ledje golbmalogivihttaduhát njeallječuođi.

₃₈Dana nálli, buot guoktelogijahkásaš ja das boarráset olbmát geat sáhtte soahtat, merkejuvvojedje logahallamii sogaid mielde ja bearrašiid mielde. ₃₉Dát Dana čeardda olbmát ledje guhttalogiguokteduhát čiežačuođi.

₄₀Ašera nálli, buot guoktelogijahkásaš ja das boarráset olbmát geat sáhtte soahtat, merkejuvvojedje logahallamii sogaid mielde ja bearrašiid mielde. ₄₁Dát Ašera čeardda olbmát ledje njealljelogioktaduhát vihttačuođi.

₄₂Naftali nálli, buot guoktelogijahkásaš ja das boarráset olbmát geat sáhtte soahtat, merkejuvvojedje logahallamii sogaid mielde ja bearrašiid mielde. ₄₃Dát Naftali čeardda olbmát ledje vihttalogigolbmaduhát njeallječuođi.

₄₄Dát ledje olbmát geat geahčaduvvojedje. Sin geahčadedje Moses, Aron ja Israela oaivámuččat, guoktenuppelohkái olbmá, okta guđege čearddas. ₄₅Nu geahčaduvvojedje israellaččat bearrašiid mielde, buot guoktelogijahkásaš ja das boarráset olbmát geat sáhtte soahtat. ₄₆Geahčaduvvon olbmát ledje oktiibuot guhttačuođigolbmaduhát vihttačuođi. ₄₇Levilaččat ja sin čearda ii geahčaduvvon oktan earáiguin.

₄₈Hearrá sártnui Mosesii:

₄₉Levi čeardda don it oaččo geahčadit, itge lohkat sin go logat eará israellaččaid. ₅₀Bija baicce levilaččaid atnit fuola almmustusgoađis ja buot dan biergasiin ja dárbašiin. Sii galget guoddit goađi ja buot dan biergasiid, gáhttet dan ja cegget siidda dan birra. ₅₁Go vuolgibehtet johtui, de levilaččat galget gaikkodit almmustusgoađi, ja go luoitalehpet, de sii galget cegget dan. Jos olggobealolmmoš boahtá dan lahka, de su galgá goddit. ₅₂Israellaččat galget luoitalit čearddaid mielde, iešguhtege čearda iežas leavgga birra. ₅₃Levilaččat galget luoitalit almmustusgoađi birra, vai moarri ii deaividivčče Israela searvegotti. Levilaččat galget atnit fuola almmustusgoađis ja bálvalusas mii das doaimmahuvvo.

₅₄Israellaččat dahke buot dan gohččuma mielde maid Hearrá lei addán Mosesii.