3. Mosesgirji 27

₁Hearrá sártnui Mosesii:

₂Cealkke israellaččaide: Jos muhtun lea lohpidan Hearrái muhtin earenoamáš attáldaga, de son sáhttá lonistit iežas attáldaga ruoktot. Olbmo sajis son galgá dalle addit Hearrái dáid lonistansupmiid: ₃Dievddus gean ahki lea guovttelogis guđalohkái, vihttalogi šekela silba bassibáikki šekeldeattu mielde ₄ja nissonis golbmalogi šekela. ₅Viđajahkásaččas guoktelotjahkásažžii galgá máksit dievdobeales guoktelogi šekela ja nissonbeales logi šekela. ₆Mánnosaččas viđajahkásažžii galgá máksit gánddas vihtta šekela silba ja nieiddas golbma šekela silba. ₇Guhttalotjahkásaččas dahje boarráseappos galgá dievdobeales máksit vihttanuppelohkái šekela ja nissonbeales logi šekela. ₈Jos muhtun lea ilá geafi máksit olles lonistansupmi, de son galgá doalvut báhpa lusa olbmo gii lohpiduvvo attáldahkan. Báhppa galgá mearrat lonistanmávssu dan mielde maid lohpádusa dahkki suitá máksit.

₉Jos lohpádus guoská oapmái maid sáhttá addit oaffarin Hearrái, de juohke ealli mii addojuvvo Hearrái, lea bassi. ₁₀Olmmoš ii oaččo buhttet oami iige lonuhit dan, ii buktit buori heaju sadjái iige heaju buori sadjái. Muhto jos son lonuha oami nuppiin omiin, de sihke vuosttaš oapmi ja dat mainna dat lonuhuvvo, gullet Hearrái. ₁₁Muhto jos lohpádus guoská buhtismeahttun oapmái maid ii sáhte addit oaffarin Hearrái, de dan galgá doalvut báhpa lusa. ₁₂Báhppa galgá mearrat oami lonistanhatti dan mielde man buorre dahje headju dat lea, ja lonistanhaddi lea dat maid báhppa mearrá. ₁₃Jos olmmoš dáhttu lonistit oami, de son galgá lasihit viđádasa dan lonistanhaddái.

₁₄Jos muhtin dáhttu basuhit iežas viesu Hearrái, de báhppa galgá mearridit dan árvvu dan mielde man buorre dahje headju dat lea. Árvu lea dat maid báhppa mearrida. ₁₅Muhto jos dat gii lea basuhan iežas viesu dáhttu lonistit dan ruoktot, de son galgá lasihit viđádasa dan haddái, ja de viessu lea fas su.

₁₆Jos muhtin dáhttu basuhit Hearrái bealddu maid lea árben, de dan lonistansubmi mearriduvvo dan mielde man ollu gilvagat adnojit dan beldui: Ovtta homermihtu bivgegilvagat vástidit vihttalogi silbašekela. ₁₇Jos son basuha iežas bealddu juo ávvujagi, de dasa mearriduvvon haddi bissu. ₁₈Muhto jos son basuha bealddus ávvujagi maŋŋil, de báhppa galgá mearrat lonistanmávssu daid jagiid mielde mat vel leat maŋit ávvujahkái, ja haddi geahpeduvvo jagiid logu ektui. ₁₉Jos dat gii lea basuhan iežas bealddu, dáhttu lonistit dan ruoktot, de son galgá lasihit viđádasa dan haddái, ja de bealdu lea fas su. ₂₀Muhto jos son vuovdá bealddu mii lei basuhuvvon Hearrái iige vuos lonis dan alccesis, de bealddu ii oktage sáhte šat lonistit ruoktot. ₂₁Go bealdu šaddá friddjan ávvujagi, de dat basuhuvvo Hearrái seammá ládje go bealdu mii lea vihahuvvon Hearrái; dat šaddá báhpa opmodahkan.

₂₂Jos muhtin dáhttu basuhit Hearrái bealddu maid lea oastán, dakkára mii ii gula su árbejuvvon opmodahkii, ₂₃de báhppa galgá mearrat dan lonistanmávssu dan áiggi ektui mii vel lea maŋit ávvujahkái, ja oasti galgá máksit supmi dan seammá beaivvi; dat leat basuhuvvon Hearrái. ₂₄Ávvujagi bealdu máhccá dasa geas dat ostojuvvui ja gean árbejuvvon eanan dat lea. ₂₅Buot lonistansupmiid galgá mearrat bassibáikki šekeldeattu mielde, ja dalle okta šekel lea guoktelogi gera.

₂₆Oami vuosttašriegádeaddji ii oktage oaččo basuhit Hearrái, vuosttašriegádeaddjinhan dat juo gullá Hearrái. Oami vuosttašriegádeaddji gullá Hearrái, leaččai dat dal vuoksá dahje sávza. ₂₇Jos vuosttašriegádeaddji lea buhtismeahttun oapmi, de dan galgá lonistit mearriduvvon haddái masa lasihuvvo viđádas. Jos dat ii lonistuvvo, de dan galgá vuovdit mearriduvvon haddái. ₂₈Ii maidege mii lea vihahuvvon Hearrái, oaččo vuovdit iige lonistit, leaččai dat dal olmmoš, oapmi dahje árbejuvvon bealdu. Buot mii lea vihahuvvon Hearrái, lea allabassi ja gullá sutnje. ₂₉Olbmo gii lea vihahuvvon Hearrái, ii oaččo lonistit, muhto su galgá goddit.

₃₀Logádas das maid eanan addá, sihke eatnama šattus ja muoraid šaddosiin, gullá Hearrái; dat lea basuhuvvon Hearrái. ₃₁Jos soamis dáhttu lonistit juoidá iežas logádasain, de son galgá lasihit haddái viđádasa. ₃₂Maiddái stuorraomiin ja smávvaomiin, buot das maid báimmanat guođohit, juohke logát oapmi lea basuhuvvon Hearrái. ₃₃Olmmoš ii oaččo geahččat leago dat buorre vai headju, iige lonuhit dan. Muhto jos son dan lonuha, de sihke vuosttaš oapmi ja dat mainna dat lonuhuvvo, gullet Hearrái, iige daid sáhte lonistit.

₃₄Dát leat báhkkomat maid Hearrá attii Mosesii Sinaiváris israellaččaid várás.