4. Mosesgirji 12
Hearrá moaráhuvvá Mirjamii ja Aronii
1Mirjam ja Aron moittiiga Mosesa dan nubialaš nissona dihte gean son lei váldán áhkkán. Son lei oainnat váldán áhkkánis nubialaš nissona. 2Soai dajaiga: “Leago Hearrá sárdnon duššefal Mosesii? Iigo son leat sárdnon maiddái munnuide?” Ja Hearrá gulai dan. 3Muhto Moses lei hui vuollegaš olmmoš, vuollegeabbo go oktage eará olmmoš eatnama alde.
4Fáhkkestaga Hearrá celkkii Mosesii, Aronii ja Mirjamii: “Mannet buot golmmas almmustusgoađi lusa!” Go sii manne dohko, 5de Hearrá njiejai balvabácci siste, čuoččastii goahteuksanjálbmái ja rávkkai Arona ja Mirjama, ja soai loaiddasteigga ovdan. 6Hearrá celkkii:
Gulli mu sániid!
Jos din gaskkas lea profehta,
de mun almmustuvan
sutnje oainnáhusas,
sártnun sutnje niegus.
7Nu in sártno Mosesiin, bálvaleddjiinan,
mun lean oskkildan sutnje
oppa iežan viesu.
8Suinna mun sártnun muođus muhtui,
njuolga, in árvádusaiguin.
Son oažžu oaidnit Hearrá hámi.
Manne doai eahppi dalle ballan láitimis
Mosesa, mu bálvaleaddji?
9Hearrá moarri cahkiidii sudno vuostá, ja son manai eret. 10Go balva lei gáidan eret goađis, de spihtáldávda lei dahkan Mirjama vielgadin dego muohta. Aron jorgalii Mirjama guvlui, ja go son oinnii ahte Mirjamis lei spihtáldávda, 11de son dajai Mosesii: “Hearrán, atte ándagassii, ale ráŋggáš munno dan suttu dihte maid dagaime jallavuođas. 12Ale goit divtte Mirjama leat dego jápma ohki man oažži lea belohahkii guohcagan go dat boahtá eatnis goaŧus.” 13Moses čuorvvui Hearrá: “Vuoi, mu Ipmil! Dearvvašmahte datte su!” 14Hearrá celkkii Mosesii: “Jos su áhčči livččii čolgadan su muođuid njeaiga, iigo son dalle galggaše heahpanaddat čieža beaivvi? Son galgá biddjojuvvot siidda olggobeallái čieža beaivái, ovdal go son luitojuvvo siidii.”
15De Mirjam biddjojuvvui siidda olggobeallái čieža beaivái, iige álbmot vuolgán johtui ovdal go Mirjam lei luitojuvvon siidii. 16Dasto álbmot vulggii Haserotis ja luoitalii Paranmeahccái.
(c) Det Norske Bibelselskap, Suomen Pipliaseura, Svenska Bibelsällskapet 2019
(c) Norwegian Bible Society, Finnish Bible Society, Swedish Bible Society 2019
