4. Mosesgirji 15

₁Hearrá sártnui Mosesii:

₂Cealkke israellaččaide: Go dii boahtibehtet dan eatnamii maid mun attán didjiide ássansadjin, ₃ja dii dáhttubehtet buktit Hearrái boaldinoaffarin dahje njuovvanoaffarin vuovssá dahje sávzza lohpádusa deavdima várás dahje eaktodáhtolaš attáldahkan dahje din basiid olis ja oaffaruššabehtet dan dollaoaffarin man hádja lea Hearrá miela mielde, ₄de dat gii addá dan oaffara Hearrái, galgá buktit maid borramušoaffarin efalogádasa sevlejuvvon jáffuid maidda lea seaguhuvvon hin-njealjádas olju, ₅ja juhkamušoaffarin, boaldinoaffara ja njuovvanoaffara lassin, hin-njealjádasa viinni guđege lábbá nammii. ₆Guđege viercca nammii son galgá oaffaruššat borramušoaffarin guokte efalogádasa sevlejuvvon jáffuid maidda lea seaguhuvvon hin-goalmmádas olju, ₇ja juhkamušoaffarin hingoalmmádasa viinni. Dat lea dollaoaffar man hádja lea Hearrá miela mielde. ₈Go oaffaruššabehtet vuovssá boaldinoaffarin dahje njuovvanoaffarin lohpádusa deavdima várás dahje searvevuođaoaffarin Hearrái, ₉de galgabehtet buktit oktan vuovssáin borramušoaffarin golbma efalogádasa sevlejuvvon jáffuid maidda lea seaguhuvvon hinbealli olju, ₁₀ja juhkamušoaffarin hinbeali viinni. Dat lea dollaoaffar man hádja lea Hearrá miela mielde.

₁₁Dát mearrádusat gusket juohke vuoksái, vircii, lábbái ja gihccái. ₁₂Man galle ealli juo oaffaruššabehtetge, de galgabehtet oaffaruššat daid dáinna lágiin. ₁₃Buot eatnamis riegádan israellaččat galget dahkat ná go oaffaruššet dollaoaffara, hája mii lea Hearrá miela mielde. ₁₄Ja go vieris dahje guossi dál dahje boahtteáiggis dáhttu oaffaruššat dollaoaffara hádjan mii lea Hearrá miela mielde, de son galgá dahkat seammá láhkái go dii ieža. ₁₅Searvegottis galgá gustot okta ja seammá láhka sihke didjiide ja vierrásii gii ássá din gaskkas. Dat galgá leat didjiide agálaš láhka buolvvas bulvii. Dii ja vierrásat galgabehtet dahkat seammá ládje Hearrá muođuid ovddas. ₁₆Seammá láhka ja seammá riekti galgá gustot sihke didjiide ja vierrásii gii ássá din gaskkas.

₁₇Hearrá sártnui Mosesii:

₁₈Cealkke israellaččaide: Go dii boahtibehtet dan eatnamii gosa mun doalvvun din ₁₉ja beassabehtet borrat dan eatnama láibbi, de buktet das attáldaga Hearrái. ₂₀Vuosttaš láibi maid láibubehtet, galgá leat din oaffarattáldat, seammá ládje go addibehtet oaffarattáldaga gordneráidnensajis. ₂₁Vuosttaš láibbi maid láibubehtet, galgabehtet addit attáldahkan Hearrái buolvvas bulvii.

₂₂Jos dii fuomáškeahttá rihkkubehtet daid báhkkomiid maid Hearrá lea addán Mosesii, ₂₃daid maid Hearrá lea mearridan didjiide Mosesa bokte dan beaivvi rájes go Hearrá attii báhkkomiid ja das maŋŋil, ₂₄ de searvegoddi galgá oaffaruššat nuorra vuovssá boaldinoaffarin, hádjan mii lea Hearrá miela mielde, oktan mearriduvvon borramušoaffariin ja juhkamušoaffariin, ja dasto velá bohká suddooaffarin. ₂₅Báhppa galgá doaimmahit soabahusa oppa Israela searvegoddái, ja dat oažžu ándagassii, dasgo suddu dahkkojuvvui fuomáškeahttá, ja dat lea Hearrá muođuid ovddas buktán iežas attáldaga, dollaoaffara Hearrái, ja iežas suddooaffara dan suttu dihte mii dahkkojuvvui fuomáškeahttá. ₂₆Nu oppa Israela searvegoddi ja vierrásat geat ásset dan gaskkas, ožžot ándagassii, danin go oppa álbmot lei suddudan fuomáškeahttá.

₂₇Jos olmmoš sudduda fuomáškeahttá, de son galgá buktit jahkásaš gáicca suddooaffarin. ₂₈Báhppa galgá Hearrá muođuid ovddas doaimmahit soabahusa dasa gii lea suddudan fuomáškeahttá, ja son oažžu soabahusa ja ándagassii addojumi.

₂₉Seammá láhka gusto juohkehažžii gii sudduda fuomáškeahttá, sihke eatnamis riegádan israellažžii ja vierrásii gii ássá israellaččaid gaskkas. ₃₀Muhto jos olmmoš diđolaččat sudduda, leaččai son dal eatnamis riegádan dahje vieris, de son hiddjida Hearrá, ja son galgá jávkaduvvot álbmogisttis. ₃₁Son lea badjelgeahččan Hearrá sáni ja rihkkon su báhkkoma. Dat olmmoš galgá jávkaduvvot, son lea šaddan sivalažžan.

₃₂Go israellaččat ledje meahcis, de sii deive muhtun olbmá čoaggimin muoraid sabbatbeaivvi. ₃₃Dat geat deive su čoaggimin muoraid, dolvo su Mosesa, Arona ja oppa searvegotti ovdii. ₃₄Sii bidje su giddagassii, dasgo ii lean velá čielga mearrádus das maid sutnje galggai dahkat. ₃₅Hearrá sártnui Mosesii:

Olmmái galgá ráŋggáštuvvot jápmimiin. Oppa searvegoddi galgá geađgádit su jámas siidda olggobealde.

₃₆Oppa searvegoddi doalvvui su olggobeallái siidda ja geađgádii su jámas, nugo Hearrá lei gohččon Mosesa bokte.

₃₇Hearrá sártnui Mosesii:

₃₈Gohčo israellaččaid buolvvas bulvii bidjat dihpiid biktasiid čiegaide ja čatnat juohke diehppái ruksesalit láiggi. ₃₉Go dii geahčadehpet dihpiid maid lehpet dahkan, de dii muitibehtet buot Hearrá báhkkomiid ja doallabehtet daid. Dalle ehpet vádjol iežadet váimmu ja čalmmiid himuid mielde. ₄₀Go dii muitibehtet buot mu báhkkomiid ja doallabehtet daid, de dii lehpet basit Ipmileattet ovddas. ₄₁Mun lean Hearrá, din Ipmil, gii bukten din Egyptas vai livččen din Ipmil. Mun lean Hearrá, din Ipmil.