4. Mosesgirji 16

₁Levilaš Korah, Kehata bártni Jishara bárdni, ja rubenlaččat Datan ja Abiram, Eliaba bártnit, ja On, Peleta bárdni, ₂stuimmáskedje Mosesa vuostá ja ovttas singuin guoktečuođi vihttalogi árvvus adnojuvvon olbmá Israela njunušolbmáid ja searvegotti oaivámuččaid gaskkas. ₃Sii čoagganedje Mosesa ja Arona birra ja dadje: “De lea galle! Oppa searvegoddi, buohkat, leat basit, ja Hearrá lea sin gaskkas. Manne doai de viggabeahtti alidit iežaideatte Hearrá searvegotti badjel?”

₄Go Moses gulai dan, de son luoitádii muđolassii eatnamii. ₅De son dajai Korahii ja su vehkii: “Ihttin Hearrá almmuha gii lea bassi ja gii oažžu loaiddastit su ovdii oaffaruššat. Dušše dat gean Hearrá vállje, oažžu boahtit su lahka. ₆Don, Korah, ja juohkehaš du veagas galgá ihttin váldit dollalihti, ₇cahkkehit dasa dola ja gilvit dan ala suovvasiid Hearrá muođuid ovddas. Dat gean Hearrá dalle vállje, lea bassi. Duođaid, de lea galle, levilaččat!”

₈De Moses dajai Korahii: “Gullet datte, levilaččat! ₉Iigo leat galle ahte Israela Ipmil lea čuoldán din sierra Israela searvegottis ja suovvan din boahtit iežas lahka doaimmahit bálvalusa Hearrá goađis ja leat searvegotti bálvaleaddjin? ₁₀Son lea diktán du ja du vieljaid levilaččaid boahtit iežas lahka, muhto dál dii háhpohaddabehtet velá báhppavuođage. ₁₁Don ja du veahka lehpet dahkan lihtu Hearrá ehpetge dušše Arona vuostá, vaikko su vuostá nimmorehpetge.”

₁₂Moses rávkkai lusas Datana ja Abirama, Eliaba bártniid, muhto soai vástideigga: “Moai ean boađe. ₁₃Leago dat beare uhccán ahte don leat váldán min dan eatnamis mas golgá mielki ja honnet, ja buktán min jápmit meahccái? Áiggutgo dahkat iežat velá min ráđđejeaddjinge? ₁₄Don it leat dolvon min dan eatnamii mas golgá mielki ja honnet, itge leat addán midjiide oapmin bealdduid ja viidnegárddiid. Áiggutgo don čuoggut dáin olbmuin čalmmiid? Moai ean boađe!”

₁₅Moses moaráhuvai sakka ja dajai Hearrái: “Ale váldde vuostá sin oaffara. Mun in leat váldán sis ásenage inge leat dahkan oktiige sis maidege baháid.”

₁₆Moses dajai Korahii: “Ihttin don galggat oktan veagainat boahtit Hearrá muođuid ovdii. Maiddái Aron galgá leat das. ₁₇Juohkehaš galgá váldit iežas dollalihti ja gilvit dasa suovvasiid. Buohkat galget buktit dollalihtiset Hearrá muođuid ovdii, guoktečuođi vihttalogi dollalihti, ja doai Aroniin maid galgabeahtti buktit iežade dollalihtiid.”

₁₈Buohkat válde dollalihtiset, bidje dasa hilaid ja gilve dasa suovvasiid. Sii čuoččastedje ovttas Mosesiin ja Aroniin almmustusgoađi uvssa ovdii. ₁₉Korah čohkkii oppa searvegotti sudno buohta almmustusgoađi uksaráiggi ovdii.

Dalle Hearrá hearvásvuohta almmustuvai oppa searvegoddái, ₂₀ja Hearrá celkkii Mosesii ja Aronii: ₂₁“Gáidi eret dán searvegotti luhtte. Mun duššadan sin buohkaid čalbmeravkalanbottus.” ₂₂Muhto Moses ja Aron luoitádeigga eatnamii muđolassii ja dajaiga: “Ipmil, don gii attát buot sivdnádusaide eallinvuoiŋŋanasa, divttátgo iežat moari deaividit oppa searvegotti, go okta áidna olmmoš lea suddudan?”

₂₃Hearrá sártnui Mosesii: ₂₄“Gohčo searvegotti vuolgit eret Koraha, Datana ja Abirama gođiid luhtte.” ₂₅De Moses manai Datana ja Abirama lusa, ja Israela vuorrasat bohte su maŋis. ₂₆Moses dajai searvegoddái: “Vulget eret dáid ipmilmeahttun olbmáid gođiid luhtte, alletge guoskka masage mii lea sin, amadet duššat sin suttuid dihte.” ₂₇Dalle israellaččat vulge eret Koraha, Datana ja Abirama gođiid luhtte.

Datan ja Abiram leigga boahtán olggos ja čuoččuiga goahteuvssas oktanaga iežaska áhkáiguin, mánáiguin ja njuoratmánáiguin. ₂₈Moses dajai: “Das mii dál dáhpáhuvvá, dii oaidnibehtet ahte Hearrá lea gohččon mu dahkat buot maid mun dagan, inge mun daga dan iežan dáhtus. ₂₉Jos dát olbmot jápmet dábálaš jápmima ja sin vuorbi lea nugo buot olbmuid vuorbi, de Hearrá ii leat vuolggahan mu. ₃₀Muhto jos Hearrá dahká juoga earenoamáža, jos eanan rabasta njálmmis ja njiellala sin ja buot mii gullá sidjiide, nu ahte sii mannet eallinaga jábmiidáibmui, de dalle dii diehtibehtet ahte dát olbmát leat badjelgeahččan Hearrá.”

₃₁Illá son lei geargan dadjamis buot dán, go eanan luoddanii sin vuolde, ₃₂rabastii njálmmis ja njiellalii sudno ja sudno bearrašiid ja maiddái Koraha, su bearraša ja buot su opmodaga. ₃₃Sii manne eallinaga jábmiidáibmui buot dainna mii gulai sidjiide, eanan govččai sin ja sii jávke searvegotti gaskkas. ₃₄Israellaččat geat čužžo sin birra, báhtaredje go gulle sin bárguma, danne go sii balle eatnama njiellalit maiddái sin iežaset.

₃₅Hearrá luhtte vulggii dolla ja bolddii dan guoktečuođi vihttalogi olbmá geat ledje boahtán oaffaruššat suovvasiid.

₃₆Hearrá sártnui Mosesii:

₃₇Gohčo báhppa Elasara, Arona bártni, váldit dollalihtiid buollinsajis ja biđget hilaid. Váldde daid suttolaččaid dollalihtiid ₃₈geat rihkko heakkaset, ja dearppa daid asehis duolbbusin áltára skoađasteami várás, danin go dat šadde bassin go buktojuvvojedje Hearrá muođuid ovdii. Nu dat šaddet mearkan israellaččaide.

₃₉Báhppa Elasar válddii buollán olbmáid veaikedollalihtiid, ja dat derpojuvvojedje áltára skoađasin. ₄₀Dat galge muittuhit israellaččaide ahte ii oktage olggobealolmmoš gii ii leat Arona nális, oaččo boahtit Hearrá muođuid ovdii boaldit suovvasiid, vai sutnje ii geavaše seammá láhkái go Korahii ja su vehkii. Elasar dagai nugo Hearrá lei sárdnon sutnje Mosesa bokte.

₄₁Nuppi beaivvi oppa Israela searvegoddi nimmorii Mosesa ja Arona vuostá ja dajai: “Doai leahppi goddán Hearrá álbmoga!” ₄₂Muhto go searvegoddi čoagganii Mosesa ja Arona vuostá, de soai jorggiheigga almmustusgoađi guvlui. Dalle balva govččai goađi ja Hearrá hearvásvuohta almmustuvai. ₄₃Moses ja Aron čuoččasteigga almmustusgoađi ovdii, ₄₄ja Hearrá sártnui Mosesii: ₄₅“Manni eret dán searvegotti luhtte, de mun duššadan dan čalbmeravkalanbottus.” Soai luoitádeigga eatnamii muđolassii. ₄₆Moses dajai Aronii: “Váldde iežat dollalihti ja bija dasa áltáris hilaid ja gilvve dasa suovvasiid. Mana hoahpus searvegotti lusa ja doaimmat sidjiide soabahusa, danne go moarri lea vuolgán Hearrá muođuid ovddas, ja giksi lea álgán.”

₄₇Aron dagai nugo Moses lei gohččon ja viegai álbmoga gaskii, gos giksi lei juo álgán. Aron bolddii suovvasiid ja doaimmahii soabahusa álbmogii. ₄₈Go son čuoččui elliid ja jábmiid gaskkas, de giksi bisánii. ₄₉Giksi gottii njealljenuppelotduhát čiežačuođi olbmo, earret daid geat jápme Koraha dihte. ₅₀Go giksi lei nohkan, de Aron máhcai Mosesa lusa almmustusgoađi uvssa ovdii.