4. Mosesgirji 17

₁Hearrá sártnui Mosesii:

₂Cealkke israellaččaide ahte juohke čeardaoaivámuš galgá addit dutnje soappi, ovtta soappi guđege čeardda nammii, buohkanassii guoktenuppelohkái soappi. Čále guđege oaivámučča nama su soabbái. ₃Levi soabbái galggat goit čállit Arona nama; okta soabbi galgá leat guđege bearašoaivámučča nammii. ₄Bija soppiid almmustusgoahtái lihtumearkka ovdii gos mun almmustuvan didjiide, ₅ja soabbi mii gullá dan olbmái gean mun lean válljen, urbbiida. Nu mun jaskkodahtán israellaččaid nimmoreami dudno vuostá.

₆Moses almmuhii dán israellaččaide, ja buot sin bearašoaivámuččat adde sutnje soappi, oktiibuot guoktenuppelohkái soappi, ja Arona soabbi lei daid gaskkas. ₇Moses bijai soppiid Hearrá muođuid ovdii lihtumearkka goahtái.

₈Maŋit beaivvi Moses manai lihtumearkka goahtái. Dalle Arona soabbái, Levi soga soabbái, ledje ihtán urbbit. Dat urbbiidii, lieđui ja šaddadii láddan mándeliid. ₉Moses válddii buot soppiid eret Hearrá muođuid ovddas ja guttii daid israellaččaid ovdii. Sii geahčadedje daid, ja de juohkehaš válddii iežas soappi.

₁₀Hearrá sártnui Mosesii: “Doalvvo Arona soappi ruoktot lihtumearkka ovdii. Doppe dat galgá leat mearkan vuostehágolaččaide. Nu don loahpahat sin nimmoreami mu vuostá, eaige sii dárbbaš jápmit.”

₁₁Moses dagai nugo Hearrá lei gohččon su.

₁₂Muhto israellaččat dadje Mosesii: “Mii heavvanit, mii duššat, mii buohkat duššat! ₁₃Jos juohkehaš gii lahkana Hearrá goahtái, duššá, de mii duššat buohkat.”