4. Mosesgirji 28

₁Hearrá sártnui Mosesii:

₂Atte israellaččaide dán gohččuma: Atnet fuola das ahte buktibehtet munnje mearriduvvon áigái oaffarattáldagaid mat gullet munnje, mu dollaoaffarborramuša, dollaoaffara hádjan mii lea mu miela mielde.

₃Cealkke sidjiide: Dollaoaffarin dii galgabehtet buktit Hearrái juohke beaivvi, álelassii, guokte jahkásaš lábbá mat leat almmá vigi haga. ₄Oaffaruša nuppi lábbá iđedis ja nuppi lábbágis eahkedisveaigin, ₅ja borramušoaffarin efalogádasa sevlejuvvon jáffuid maidda lea seaguhuvvon hin-njealjádas oliivvain dekčojuvvon olju. ₆Dat lea beaivválaš boaldinoaffar. Dat ásahuvvui Sinaiváris Hearrá dollaoaffarin, hádjan mii lea Hearrá miela mielde. ₇Juhkamušoaffarin galgabehtet buktit hin-njealjádasa viinni goappáge lábbá nammii; garra juhkamušoaffara galgabehtet golggahit bassibáikkis Hearrái oaffarin. ₈Oaffaruššet nuppi lábbá eahkedisveaigin; oaffaruššet ja buktet dainna seammalágán borramušoaffariid ja juhkamušoaffariid go iđedisge. Dat lea dollaoaffar, hádja mii lea Hearrá miela mielde.

₉Sabbatbeaivvi galgabehtet oaffaruššat guokte jahkásaš lábbá mat leat almmá vigi haga. Daidda lassin galgabehtet buktit borramušoaffarin guokte efalogádasa sevlejuvvon jáffuin ja oljjuin seaguhuvvon dáiggi ja juhkamušoaffara. ₁₀Dán boaldinoaffara galgá oaffaruššat juohke sabbaha beaivválaš boaldinoaffara ja dasa gullevaš juhkamušoaffara lassin.

₁₁Juohke mánočalbmebeaivvi ávvudeamis galgabehtet buktit Hearrái boaldinoaffarin guokte nuorra vuovssá, viercca ja čieža jahkásaš lábbá. Buot oaffareallit galget leat almmá vigi haga. ₁₂Daidda lassin galgabehtet buktit borramušoaffarin golbma efalogádasa sevlejuvvon jáffuin ja oljjuin seaguhuvvon dáiggi goappáge vuovssá nammii ja guokte efalogádasa viercca nammii ₁₃ja ovtta efalogádasa sevlejuvvon jáffuin ja oljjuin seaguhuvvon dáiggi guđege lábbá nammii. Dát lea boaldinoaffar, hádja mii lea Hearrá miela mielde, dollaoaffar Hearrái. ₁₄Dasa gullet juhkamušoaffarin hinbealli viidni goappáge vuovssá, hin-goalmmádas viercca ja hin-njealjádas guđege lábbá nammii. Dat lea boaldinoaffar maid galgabehtet oaffaruššat jagi guđege mánočalbmebeaivvi ávvudeamis. ₁₅Dii galgabehtet maiddái oaffaruššat bohká suddooaffarin Hearrái. Buot dát galget oaffaruššojuvvot beaivválaš boaldinoaffara ja dan juhkamušoaffara lassin.

₁₆Vuosttaš mánu njealljenuppelogát beaivvi leat Hearrá beassážat, ₁₇ja seamma mánu vihttanuppelogát beaivvi lea bassebeaivi. Čieža beaivvi galgabehtet borrat suvrutkeahtes láibbi. ₁₈Dan ávvudeami vuosttaš beaivvi galgabehtet doallat bassi čoagganeami; dalle ehpet oaččo bargat maidege. ₁₉Buktet dollaoaffarin, boaldinoaffarin Hearrái, guokte nuorra vuovssá, ovtta viercca ja čieža jahkásaš lábbá; buot eallit galget leat almmá vigi haga. ₂₀Daidda gullevaš borramušoaffarin galgabehtet buktit sevlejuvvon jáffuin ja oljjuin seaguhuvvon dáiggi golbma efalogádasa goappáge vuovssá, guokte efalogádasa viercca ₂₁ja ovtta efalogádasa guđege lábbá nammii. ₂₂Suttuideattet soabahussan galgabehtet oaffaruššat bohká suddooaffarin. ₂₃Buot dáid dii galgabehtet oaffaruššat iđitoaffara lassin mii gullá beaivválaš boaldinoaffarii. ₂₄Dáid oaffariid dii galgabehtet buktit guđege beaivvi dan ávvudeami čieža beaivvis. Dat leat oaffarborramuš, dollaoaffar, hádja mii lea Hearrá miela mielde. Daid galgá oaffaruššat beaivválaš boaldinoaffara ja dan juhkamušoaffara lassin. ₂₅Čihččet beaivvi dii galgabehtet doallat bassi čoagganeami; dalle ehpet oaččo bargat maidege.

₂₆Go dii álgošaddooaffarbeaivvi vahkkobasiid áigge buktibehtet borramušoaffara ođđa šattus Hearrái, de galgabehtet doallat bassi čoagganeami; dalle ehpet oaččo bargat maidege. ₂₇Boaldinoaffarin, hádjan mii lea Hearrá miela mielde, galgabehtet oaffaruššat Hearrái guokte nuorra vuovssá, viercca ja čieža jahkásaš lábbá; buot eallit galget leat almmá vigi haga. ₂₈Dasa gullevaš borramušoaffarin galgabehtet buktit sevlejuvvon jáffuin ja oljjuin seaguhuvvon dáiggi golbma efalogádasa goappáge vuovssá, guokte efalogádasa viercca ₂₉ja okta efalogádasa guđege lábbá nammii. ₃₀Suttuideattet soabahussan galgabehtet oaffaruššat bohká. ₃₁Buot daid dii galgabehtet oaffaruššat beaivválaš boaldinoaffara ja dasa gullevaš borramušoaffara ja juhkamušoaffara lassin.