4. Mosesgirji 29

₁Čihččet mánu vuosttaš beaivvi galgabehtet doallat bassi čoagganeami; dalle ehpet oaččo bargat maidege. Dan beaivvi galgabehtet bossut dorvve. ₂Boaldinoaffarin, hádjan mii lea Hearrá miela mielde, galgabehtet oaffaruššat nuorra vuovssá, viercca ja čieža jahkásaš lábbá; buot eallit galget leat almmá vigi haga. ₃Dasa gullevaš borramušoaffarin galgabehtet buktit sevlejuvvon jáffuin ja oljjuin seaguhuvvon dáiggi golbma efalogádasa vuovssá, guokte efalogádasa viercca ₄ja ovtta efalogádasa guđege lábbá nammii. ₅Suttuideattet soabahussan galgabehtet oaffaruššat bohká. ₆Buot daid galgabehtet oaffaruššat mánočalbmebeaivvi boaldinoaffara ja dan borramušoaffara lassin ja beaivválaš boaldinoaffara, dan borramušoaffara ja daidda mearriduvvon juhkamušoaffariid lassin, hádjan mii lea Hearrá miela mielde, dollaoaffarin Hearrái.

₇Seammá čihččet mánu logát beaivvi galgabehtet doallat bassi čoagganeami. Dalle galgabehtet fástudit ehpetge oaččo bargat maidege. ₈Boaldinoaffarin Hearrái, hádjan mii lea su miela mielde, galgabehtet oaffaruššat nuorra vuovssá, viercca ja čieža jahkásaš lábbá; eallit galget leat almmá vigi haga. ₉Dasa gullevaš borramušoaffarin galgabehtet buktit sevlejuvvon jáffuin ja oljjuin seaguhuvvon dáiggi golbma efalogádasa vuovssá, guokte efalogádasa viercca ₁₀ja ovtta efalogádasa guđege lábbá nammii. ₁₁Dasa lassin galgabehtet oaffaruššat bohká suddooaffarin. Buot daid galgá oaffaruššat soabahusbeaivvi suddooaffara, beaivválaš boaldinoaffara ja dan borramušoaffara ja juhkamušoaffariid lassin.

₁₂Čihččet mánu vihttanuppelogát beaivvi galgabehtet doallat bassi čoagganeami; dalle ehpet oaččo bargat maidege. Čieža beaivvi galgabehtet doallat Hearrái basuhuvvon basiid. ₁₃Boaldinoaffarin, dollaoaffarin, hádjan mii lea Hearrá miela mielde, galgabehtet oaffaruššat golbmanuppelohkái vuovssá, guokte viercca ja njealljenuppelohkái jahkásaš lábbá; eallit galget leat almmá vigi haga. ₁₄Dasa gullevaš borramušoaffarin galgabehtet buktit sevlejuvvon jáffuin ja oljjuin seaguhuvvon dáiggi golbma efalogádasa guđege vuovssá, guokte logádasa goappáge viercca ₁₅ja ovtta logádasa guđege lábbá nammii. ₁₆Dasa lassin galgabehtet oaffaruššat bohká suddooaffarin. Buot daid galgá oaffaruššat beaivválaš boaldinoaffara ja dan borramušoaffara ja juhkamušoaffara lassin.

₁₇Nuppi beaivvi galgabehtet oaffaruššat guoktenuppelohkái vuovssá, guokte viercca ja njealljenuppelohkái jahkásaš lábbá; eallit galget leat almmá vigi haga. ₁₈Buktet borramušoaffariid ja juhkamušoaffariid vuovssáid, vierccaid ja lábbáid loguid mielde nugo lea mearriduvvon. ₁₉Dasa lassin galgabehtet oaffaruššat bohká suddooaffarin. Buot daid galgá oaffaruššat beaivválaš boaldinoaffara ja dan borramušoaffara ja juhkamušoaffara lassin.

₂₀Goalmmát beaivvi galgabehtet oaffaruššat oktanuppelohkái vuovssá, guokte viercca ja njealljenuppelohkái jahkásaš lábbá; eallit galget leat almmá vigi haga. ₂₁Buktet borramušoaffariid ja juhkamušoaffariid vuovssáid, vierccaid ja lábbáid loguid mielde nugo lea mearriduvvon. ₂₂Dasa lassin galgabehtet oaffaruššat bohká suddooaffarin. Buot daid galgá oaffaruššat beaivválaš boaldinoaffara ja dan borramušoaffara ja juhkamušoaffara lassin.

₂₃Njealját beaivvi galgabehtet oaffaruššat logi vuovssá, guokte viercca ja njealljenuppelohkái jahkásaš lábbá; eallit galget leat almmá vigi haga. ₂₄Buktet borramušoaffariid ja juhkamušoaffariid vuovssáid, vierccaid ja lábbáid loguid mielde nugo lea mearriduvvon. ₂₅Dasa lassin galgabehtet oaffaruššat bohká suddooaffarin. Buot daid galgá oaffaruššat beaivválaš boaldinoaffara ja dan borramušoaffara ja juhkamušoaffara lassin.

₂₆Viđát beaivvi galgabehtet oaffaruššat ovcci vuovssá, guokte viercca ja njealljenuppelohkái jahkásaš lábbá; eallit galget leat almmá vigi haga. ₂₇Buktet borramušoaffariid ja juhkamušoaffariid vuovssáid, vierccaid ja lábbáid loguid mielde nugo lea mearriduvvon. ₂₈Dasa lassin galgabehtet oaffaruššat bohká suddooaffarin. Buot daid galgá oaffaruššat beaivválaš boaldinoaffara ja dan borramušoaffara ja juhkamušoaffara lassin.

₂₉Guđát beaivvi galgabehtet oaffaruššat gávcci vuovssá, guokte viercca ja njealljenuppelohkái jahkásaš lábbá; eallit galget leat almmá vigi haga. ₃₀Buktet borramušoaffariid ja juhkamušoaffariid vuovssáid, vierccaid ja lábbáid loguid mielde nugo lea mearriduvvon. ₃₁Dasa lassin galgabehtet oaffaruššat bohká suddooaffarin. Buot daid galgá oaffaruššat beaivválaš boaldinoaffara ja dan borramušoaffara ja juhkamušoaffara lassin.

₃₂Čihččet beaivvi galgabehtet oaffaruššat čieža vuovssá, guokte viercca ja njealljenuppelohkái jahkásaš lábbá; eallit galget leat almmá vigi haga. ₃₃Buktet borramušoaffariid ja juhkamušoaffariid vuovssáid, vierccaid ja lábbáid loguid mielde nugo lea mearriduvvon. ₃₄Dasa lassin galgabehtet oaffaruššat bohká suddooaffarin. Buot daid galgá oaffaruššat beaivválaš boaldinoaffara ja dan borramušoaffara ja juhkamušoaffara lassin.

₃₅Gávccát beaivvi galgabehtet doallat bassi čoagganeami; dalle ehpet oaččo bargat maidege. ₃₆Boaldinoaffarin, dollaoaffarin man hádja lea Hearrá miela mielde, galgabehtet oaffaruššat vuovssá, viercca ja čieža jahkásaš lábbá; eallit galget leat almmá vigi haga. ₃₇Buktet borramušoaffariid ja juhkamušoaffariid vuovssá, viercca ja lábbáid loguid mielde nugo lea mearriduvvon. ₃₈Dasa lassin galgabehtet oaffaruššat bohká suddooaffarin. Buot daid galgá oaffaruššat beaivválaš boaldinoaffara ja dan borramušoaffara ja juhkamušoaffara lassin.

₃₉Dáid oaffariid galgabehtet oaffaruššat Hearrái basiideattet áigge lohpádusoaffariid ja eaktodáhtolaš oaffariid lassin maid oaffaruššabehtet boaldinoaffarin, borramušoaffarin, juhkamušoaffarin dahje searvevuođaoaffarin.