4. Mosesgirji 30

₁Moses sártnui israellaččaide dárkilit buot maid Hearrá lei gohččon su dadjat.

₂Moses sártnui israellaččaid čeardaoaivámuččaide:

“Hearrá lea gohččon ná:

₃Jos olmmái lohpida Hearrái juoidá dahje vuordnumiin geatnegahttá iežas biehttalit mas nu, de son ii oaččo rihkkut iežas lohpádusa. Son galgá dárkilit dahkat maid lea lohpidan.

₄Jos nisson gii lea vel nuorra ja ássá áhčis viesus, addá Hearrái lohpádusa dahje geatnegahttá iežas biehttalit mas nu, ₅ja su áhčči gullá su lohpádusa dahje dan ahte son lea geatnegahttán iežas masa nu iige daja sutnje das maidege, de buot nieidda addin lohpádusat ja geatnegasvuođat bissot fámus. ₆Muhto jos su áhčči gieldá su dan beaivvi go gullá dan, de buot nieidda addin lohpádusat ja geatnegasvuođat leat fámoheamit. Hearrá addá sutnje ándagassii, danin go su áhčči gilddii su.

₇Jos náitalkeahtes nissonis leat lohpádusat deavddekeahttá dahje son lea jurdilkeahttá geatnegahttán iežas masa nu, de son galgá, maŋŋil go lea náitalan, deavdit lohpádusas ja dahkat dan masa lea geatnegahttán iežas, ₈jos su boadnjá ii seahkán áššái. ₉Muhto jos su boadnjá gieldá su dan beaivvi go son dan gullá, de son fámohuhttá dan lohpádusa mii áhkás lea deavddekeahttá ja daid geatnegasvuođaid maid áhkká jurdilkeahttá lei geatnegahttán iežas dahkat, ja Hearrá addá áhkkái ándagassii.

₁₀Go leaskanisson dahje hilgojuvvon nisson lea addán lohpádusa, de buot áššit maid son lea geatnegahttán iežas dahkat, bissot fámus.

₁₁Jos náitalan nisson lohpida juoidá dahje geatnegahttá iežas biehttalit mas nu, ₁₂ja su boadnjá gullá dan muhto ii daja maidege iige gieldde su, de buot áhká addin lohpádusat ja buot su geatnegasvuođat bissot fámus. ₁₃Muhto jos su boadnjá fámohuhttá daid dan beaivvi go daid gullá, de buot áhká addin lohpádusat ja geatnegasvuođat maid son lea geatnegahttán iežas dahkat, leat fámoheamit. Su boadnjá lea fámohuhttán daid, ja Hearrá addá áhkkái ándagassii.

₁₄Nissona boadnjá sáhttá juogo nannet dahje fámohuhttit juohke lohpádusa ja vurdnojuvvon geatnegasvuođa maid su áhkká lei dahkan go dáhtui vuolidit iežas. ₁₅Jos boadnjá ii seahkán áššái ovdal maŋit beaivvi, de son lea nannen buot áhká lohpádusaid ja geatnegasvuođaid. Boadnjá lea nannen daid, dainna go son ii seahkánan áššái dan beaivvi go dan gulai. ₁₆Muhto jos son fámohuhttá daid easkka muhtin áiggi maŋŋil go gulai daid, de son šaddá vástidit áhkás beales.”

₁₇Dáid njuolggadusaid Hearrá attii Mosesii. Dat gustojit boadnjái ja áhkkái ja áhččái ja su niidii gii lea vel nuorra ja ássá áhčis viesus.