4. Mosesgirji 36

₁Josefa náli olbmo Gileada, Makira bártni, Manasse áddjuba, bearašoaivámuččat bohte Mosesa ja Israela čearddaid oaivámuččaid ovdii ₂ja dadje: “Hearrá gohčui du juogadit vuorbádemiin eatnama opmodahkan israellaččaide. Hearrá lea maid gohččon du addit vielljamet Selofhada árbbi su nieiddaide. ₃Muhto jos sii náitalit israellaččain gii gullá eará čerdii, de sin árbeoassi sirdašuvvá eret min áhčiid opmodagas ja laktása dan čeardda opmodahkii masa sii šaddet gullat. Dat oassi váldojuvvo eret min opmodagas. ₄Dalle go Israelis lea ávvujahki, de nieiddaid árbeoassi laktojuvvo bissovaččat dan čeardda opmodahkii masa sii leat šaddan gullat, ja dalle oassi mii lea addojuvvon sidjiide, lea gaikkihuvvon eret min áhčiid čeardda opmodagas.”

₅Hearrá gohččuma mielde Moses dajai israellaččaide:

Josefa náli čearda lea vuoigadis. ₆Ná Hearrá lea mearridan Selofhada nieiddaid áššis: Sii ožžot náitalit geainna hálidit, go beare náitalit dakkár sohkii mii gullá sin áhči čerdii. ₇Israellaččaid eanan ii oaččo sirdašuvvat čearddas nubbái, muhto buohkat galget doallat gitta iežaset čeardda opmodagas. ₈Dan dihte nieida gii árbe áhčis opmodaga, galgá náitalit olbmáin gii gullá su áhčiid čeardda sohkii. Ná juohke israellaš beassá doallat áhčiidis opmodaga. ₉Eanan ii oaččo sirdašuvvat čearddas nubbái, muhto juohke Israela čearda beassá doallat gitta iežas opmodagas.

₁₀Selofhada nieiddat dahke nugo Hearrá lei gohččon Mosesa. ₁₁Selofhada nieiddat Mahla, Tirsa, Hogla, Milka ja Noa náitaledje áhčiset vieljaid bártniiguin. ₁₂Sii náitaledje Josefa bártni Manasse sohkii, ja sin opmodat bisui dan čearddas masa sin áhčiid sohka gulai.

₁₃Dát leat dat báhkkomat ja mearrádusat maid Hearrá attii Mosesa bokte israellaččaide Moaba duolbadasain, Jordangáttis, Jeriko buohta.