4. Mosesgirji 7

₁Go Moses lei geargan ceggemis goađi, de son vuoiddai oljju dan ja áltára ala ja basuhii dan ja buot biergasiid mat daidda gulle. Go son lei vuoidan ja basuhan daid, ₂de bohte ovdan Israela oaivámuččat, bearašoaivámuččat geat ledje čearddaid oaivámuččat ja hovdejedje geahčaduvvon olbmáid. ₃Sii bukte iežaset oaffarattáldahkan Hearrái guđaid vovnnaid maid badjel lei govččas ja guoktenuppelohkái vuovssá, ovttaid vovnnaid ain guovtti oaivámuččas ja ovtta vuovssá iešguđege oaivámuččas. Buot daid sii bukte goađi ovdii. ₄Hearrá celkkii Mosesii: ₅“Váldde vuostá sin attáldagaid. Dat galget adnojuvvot almmustusgoađi bálvalandoaimmain. Juogat daid levilaččaide dan mielde, mo sii dárbbašit daid doaimmaineaset.”

₆Moses válddii vuostá vovnnaid ja vuovssáid ja attii daid levilaččaide. ₇Guvttiid vovnnaid ja njeallje vuovssá son attii geršonlaččaide sin bálvalandoaimmaid várás. ₈Njeljiid vovnnaid ja gávcci vuovssá son attii merarilaččaide sin doaimmaide maid sii barge Itamara, Arona bártni, geahčus. ₉Muhto kehatlaččaide son ii addán maidege, danin go sin bargun lei atnit váras bassi biergasiid maid sii galge guoddit oalggi alde.

₁₀Go áltár lei vuidojuvvon, de oaivámuččat bukte vihahanoaffara ja bidje attáldagaideaset áltára ovdii. ₁₁Hearrá celkkii Mosesii: “Oaivámuččat galget buktit oaffarattáldagaideaset áltára vihaheapmái, guhtege iežas beaivvi.”

₁₂Vuosttažin buvttii oaffarattáldagas Juda čeardda oaivámuš Nahšon, Amminadaba bárdni. ₁₃Su oaffarattáldat lei silbafáhtta mii dettii čuođigolbmalogi šekela, silbabollu mii dettii čiežalogi šekela bassibáikki šekeldeattu mielde, goappašagaid dievva sevlejuvvon jáffut ja oljjuin seaguhuvvon dáigi borramušoaffarin, ₁₄gollelihtti mii dettii logi šekela, man dievva ledje suovvasat, ₁₅nuorra vuoksá, vierca ja jahkásaš láppis boaldinoaffarin, ₁₆bohkká suddooaffarin ₁₇ja guokte vuovssá, vihtta viercca, vihtta bohká ja vihtta jahkásaš lábbá searvevuođaoaffarin. Dát lei Nahšona, Amminadaba bártni, oaffarattáldat.

₁₈Nuppi beaivvi buvttii oaffarattáldagas Isaskara čeardda oaivámuš Netanel, Suara bárdni. ₁₉Su oaffarattáldat lei silbafáhtta mii dettii čuođigolbmalogi šekela, silbabollu mii dettii čiežalogi šekela bassibáikki šekeldeattu mielde, goappašagaid dievva sevlejuvvon jáffut ja oljjuin seaguhuvvon dáigi borramušoaffarin, ₂₀gollelihtti mii dettii logi šekela, man dievva ledje suovvasat, ₂₁nuorra vuoksá, vierca ja jahkásaš láppis boaldinoaffarin, ₂₂bohkká suddooaffarin ₂₃ja guokte vuovssá, vihtta viercca, vihtta bohká ja vihtta jahkásaš lábbá searvevuođaoaffarin. Dát lei Netanela, Suara bártni, oaffarattáldat.

₂₄Goalmmát beaivvi bođii Sebulona čeardda oaivámuš Eliab, Helona bárdni. ₂₅Su oaffarattáldat lei silbafáhtta mii dettii čuođigolbmalogi šekela, silbabollu mii dettii čiežalogi šekela bassibáikki šekeldeattu mielde, goappašagaid dievva sevlejuvvon jáffut ja oljjuin seaguhuvvon dáigi borramušoaffarin, ₂₆gollelihtti mii dettii logi šekela ja man dievva ledje suovvasat, ₂₇nuorra vuoksá, vierca ja jahkásaš láppis boaldinoaffarin, ₂₈bohkká suddooaffarin ₂₉ja guokte vuovssá, vihtta viercca, vihtta bohká ja vihtta jahkásaš lábbá searvevuođaoaffarin. Dát lei Eliaba, Helona bártni, oaffarattáldat.

₃₀Njealját beaivvi bođii Rubena čeardda oaivámuš Elisur, Šedeura bárdni. ₃₁Su oaffarattáldat lei silbafáhtta mii dettii čuođigolbmalogi šekela, silbabollu mii dettii čiežalogi šekela bassibáikki šekeldeattu mielde, goappašagaid dievva sevlejuvvon jáffut ja oljjuin seaguhuvvon dáigi borramušoaffarin, ₃₂gollelihtti mii dettii logi šekela, man dievva ledje suovvasat, ₃₃nuorra vuoksá, vierca ja jahkásaš láppis boaldinoaffarin, ₃₄bohkká suddooaffarin ₃₅ja guokte vuovssá, vihtta viercca, vihtta bohká ja vihtta jahkásaš lábbá searvevuođaoaffarin. Dát lei Elisura, Šedeura bártni, oaffarattáldat.

₃₆Viđát beaivvi bođii Simeona čeardda oaivámuš Šelumiel, Surišaddaja bárdni. ₃₇Su oaffarattáldat lei silbafáhtta mii dettii čuođigolbmalogi šekela, silbabollu mii dettii čiežalogi šekela bassibáikki šekeldeattu mielde, goappašagaid dievva sevlejuvvon jáffut ja oljjuin seaguhuvvon dáigi borramušoaffarin, ₃₈gollelihtti mii dettii logi šekela, man dievva ledje suovvasat, ₃₉nuorra vuoksá, vierca ja jahkásaš láppis boaldinoaffarin, ₄₀bohkká suddooaffarin ₄₁ja guokte vuovssá, vihtta viercca, vihtta bohká ja vihtta jahkásaš lábbá searvevuođaoaffarin. Dát lei Šelumiela, Surišaddaja bártni, oaffarattáldat.

₄₂Guđát beaivvi bođii Gada čeardda oaivámuš Eljasaf, Deuela bárdni. ₄₃Su oaffarattáldat lei silbafáhtta mii dettii čuođigolbmalogi šekela, silbabollu mii dettii čiežalogi šekela bassibáikki šekeldeattu mielde, goappašagaid dievva sevlejuvvon jáffut ja oljjuin seaguhuvvon dáigi borramušoaffarin, ₄₄gollelihtti mii dettii logi šekela, man dievva ledje suovvasat, ₄₅nuorra vuoksá, vierca ja jahkásaš láppis boaldinoaffarin, ₄₆bohkká suddooaffarin ₄₇ja guokte vuovssá, vihtta viercca, vihtta bohká ja vihtta jahkásaš lábbá searvevuođaoaffarin. Dát lei Eljasafa, Deuela bártni, oaffarattáldat.

₄₈Čihččet beaivvi bođii Efraima čeardda oaivámuš Elišama, Ammihuda bárdni. ₄₉Su oaffarattáldat lei silbafáhtta mii dettii čuođigolbmalogi šekela, silbabollu mii dettii čiežalogi šekela bassibáikki šekeldeattu mielde, goappašagaid dievva sevlejuvvon jáffut ja oljjuin seaguhuvvon dáigi borramušoaffarin, ₅₀gollelihtti mii dettii logi šekela, man dievva ledje suovvasat, ₅₁nuorra vuoksá, vierca ja jahkásaš láppis boaldinoaffarin, ₅₂bohkká suddooaffarin ₅₃ja guokte vuovssá, vihtta viercca, vihtta bohká ja vihtta jahkásaš lábbá searvevuođaoaffarin. Dát lei Elišama, Ammihuda bártni, oaffarattáldat.

₅₄Gávccát beaivvi bođii Manasse čeardda oaivámuš Gamliel, Pedasura bárdni. ₅₅Su oaffarattáldat lei silbafáhtta mii dettii čuođigolbmalogi šekela, silbabollu mii dettii čiežalogi šekela bassibáikki šekeldeattu mielde, goappašagaid dievva sevlejuvvon jáffut ja oljjuin seaguhuvvon dáigi borramušoaffarin, ₅₆gollelihtti mii dettii logi šekela, man dievva ledje suovvasat, ₅₇nuorra vuoksá, vierca ja jahkásaš láppis boaldinoaffarin, ₅₈bohkká suddooaffarin ₅₉ja guokte vuovssá, vihtta viercca, vihtta bohká ja vihtta jahkásaš lábbá searvevuođaoaffarin. Dát lei Gamliela, Pedasura bártni, oaffarattáldat.

₆₀Ovccát beaivvi bođii Benjamina čeardda oaivámuš Abidan, Gidoni bárdni. ₆₁Su oaffarattáldat lei silbafáhtta mii dettii čuođigolbmalogi šekela, silbabollu mii dettii čiežalogi šekela bassibáikki šekeldeattu mielde, goappašagaid dievva sevlejuvvon jáffut ja oljjuin seaguhuvvon dáigi borramušoaffarin, ₆₂gollelihtti mii dettii logi šekela, man dievva ledje suovvasat, ₆₃nuorra vuoksá, vierca ja jahkásaš láppis boaldinoaffarin, ₆₄bohkká suddooaffarin ₆₅ja guokte vuovssá, vihtta viercca, vihtta bohká ja vihtta jahkásaš lábbá searvevuođaoaffarin. Dát lei Abidana, Gidoni bártni, oaffarattáldat.

₆₆Logát beaivvi bođii Dana čeardda oaivámuš Ahieser, Ammišaddaja bárdni. ₆₇Su oaffarattáldat lei silbafáhtta mii dettii čuođigolbmalogi šekela, silbabollu mii dettii čiežalogi šekela bassibáikki šekeldeattu mielde, goappašagaid dievva sevlejuvvon jáffut ja oljjuin seaguhuvvon dáigi borramušoaffarin, ₆₈gollelihtti mii dettii logi šekela, man dievva ledje suovvasat, ₆₉nuorra vuoksá, vierca ja jahkásaš láppis boaldinoaffarin, ₇₀bohkká suddooaffarin ₇₁ja guokte vuovssá, vihtta viercca, vihtta bohká ja vihtta jahkásaš lábbá searvevuođaoaffarin. Dát lei Ahiesera, Ammišaddaja bártni, oaffarattáldat.

₇₂Oktanuppelogát beaivvi bođii Ašera čeardda oaivámuš Pagiel, Okrana bárdni. ₇₃Su oaffarattáldat lei silbafáhtta mii dettii čuođigolbmalogi šekela, silbabollu mii dettii čiežalogi šekela bassibáikki šekeldeattu mielde, goappašagaid dievva sevlejuvvon jáffut ja oljjuin seaguhuvvon dáigi borramušoaffarin, ₇₄gollelihtti mii dettii logi šekela, man dievva ledje suovvasat, ₇₅nuorra vuoksá, vierca ja jahkásaš láppis boaldinoaffarin, ₇₆bohkká suddooaffarin ₇₇ja guokte vuovssá, vihtta viercca, vihtta bohká ja vihtta jahkásaš lábbá searvevuođaoaffarin. Dát lei Pagiela, Okrana bártni, oaffarattáldat.

₇₈Guoktenuppelogát beaivvi bođii Naftali čeardda oaivámuš Ahira, Enana bárdni. ₇₉Su oaffarattáldat lei silbafáhtta mii dettii čuođigolbmalogi šekela, silbabollu mii dettii čiežalogi šekela bassibáikki šekeldeattu mielde, goappašagaid dievva sevlejuvvon jáffut ja oljjuin seaguhuvvon dáigi borramušoaffarin, ₈₀gollelihtti mii dettii logi šekela, man dievva ledje suovvasat, ₈₁nuorra vuoksá, vierca ja jahkásaš láppis boaldinoaffarin, ₈₂bohkká suddooaffarin ₈₃ja guokte vuovssá, vihtta viercca, vihtta bohká ja vihtta jahkásaš lábbá searvevuođaoaffarin. Dát lei Ahira, Enana bártni, oaffarattáldat.

₈₄Dát ledje attáldagat maid Israela oaivámuččat bukte vihahanoaffarin dalle go áltár vuidojuvvui: guoktenuppelohkái silbafáhta, guoktenuppelohkái silbabollu ja guoktenuppelohkái gollelihti. ₈₅Juohke silbafáhtta dettii čuođigolbmalogi šekela ja juohke bollu čiežalogi šekela. Lihtiin lei oktiibuot guokteduhát njeallječuođi šekela silba bassibáikki šekeldeattu mielde. ₈₆Dat guoktenuppelohkái gollelihti maid dievva ledje suovvasat, dedde guhtege logi šekela bassibáikki šekeldeattu mielde. Lihtiin lei golli oktiibuot čuođiguoktelogi šekela. ₈₇Boaldinoaffara eallit ledje guoktenuppelohkái vuovssá, guoktenuppelohkái viercca ja guoktenuppelohkái jahkásaš lábbá oktan borramušoaffariiguin mat daidda gulle, ja guoktenuppelohkái bohká suddooaffarin. ₈₈Searvevuođaoaffara eallit ledje guokteloginjeallje vuovssá, guhttalogi viercca, guhttalogi bohká ja guhttalogi jahkásaš lábbá. Dát ledje vihahanattáldagat mat addojuvvojedje maŋŋil go áltár lei vuidojuvvon.

₈₉Go Moses manai almmustusgoahtái sárdnut Hearráin, de son gulai lihtumearkka árkka soabahussaji bajábealde kerubaid gaskkas jiena sárdnumin alccesis. Doppe Hearrá sártnui sutnje.