Sátneláskkut 1

₂Oahpahehkoset dat viisodaga

ja bagadusa,

vai olmmoš ádde jierpmálaš sániid

₃ja váldá vuostá bagadusa

jierpmálašvuhtii, vanhurskkisvuhtii,

vuoigatvuhtii ja vuoigatlašvuhtii.

₄Ožžoset dáidemeahttumat dain dáiddu,

nuorat dieđu ja dárkilvuođa.

₅Viissisge viisu go gullá daid,

jierpmálašge oažžu dain bagadusa,

₆oahppá ipmirdit sátnevádjasiid

ja veardádusaid,

ádde viisáid sániid ja árvádusaid.

₇Hearrá ballu lea dieđu álgu,

muhto jalla badjelgeahččá

viisodaga ja bagadusa.

₈Bártnážan, guldal áhčát cuiggodusa,

ale hilggo eatnát oahpahusa!

₉Dat lea čáppa gudnegierdu du oaivái,

viđji mii čiŋaha du čeabeha.

₁₀Go suttolaččat fillejit du, bártnážan,

de ale mieđit ₁₁go sii dadjet:

“Vuolgge minguin vuođgŋit varaid,

sokčat vigihemiid somá dihte!

₁₂Njielastehkot sin eallinaga

dego jábmiidáibmu,

obbanaga nugo hávdi!

₁₃Mii fidnet buotlágáš

mávssolaš dávviriid,

deavdit viesuideamet stajádusain.

₁₄Don beasat juogadit sállaša minguin,

ruhtabursa mis lea oktasaš.”

₁₅Bártnážan, ale searvva sidjiide,

ale goassege duolmmas sin bálgáid!

₁₆Sii dopmet bahá guvlui,

gáhččet golggahit vara.

₁₇Eai lottit áicca fierpmi,

vaikko dat lebbejuvvo daid oaidnut,

₁₈ja dát olbmát leat vuođgŋimin

iežaset vara,

iežaset heakka sii leat bivdimin.

₁₉Nu geavvá juohkehažžii

gii bivdá vearrevuoittu:

Dat váldá heakka das gii dan fidne.

₂₀Viisodat čuorvu gáhtain,

márkanšiljuin dat diktá jienas gullot.

₂₁Šlábmás gáhtačiegain dat čuorvu,

sárdnu gávpoga poarttain:

₂₂“Man guhká dii dáidemeahttumat

ráhkistehpet dáidemeahttunvuođa?

Man guhká dii bilkideaddjit

illudehpet bilkideapmái

ja dii jallat vašuhehpet dieđu?

₂₃Jorgalehket ja jeagadehket

mu cuiggodusaid!

Mun muitalan didjiide iežan dáhtu,

dieđihan didjiide sániidan.

₂₄Mun čurvon,

muhto dii ehpet dáhtton gullat,

mun várrejin,

muhto ii oktage beroštan.

₂₅Dii ceakkasteiddet

buot mu neavvagiidda,

ehpet viššan gullat mu cuiggodusaid.

₂₆Dan dihte mun boagustan

go lihkuhisvuohta deaivida din,

mun bilkidan go boahtá dat

maid dii gáfestuvvabehtet,

₂₇go ballu falleha din

dego garra biegga

ja lihkuhisvuohta nugo riđđu,

go áŧestus ja heahti deaivida din.

₂₈Dalle dii čuorvubehtet mu,

muhto mun in vástit,

dii ohcabehtet mu, muhto ehpet gávnna.

₂₉Dii vašuheiddet dieđu

ehpetge dáhtton ballat Hearrás,

₃₀dii ehpet viššan guldalit mu neavvaga,

muhto badjelgeahčaidet mu cuiggodusaid.

₃₁Danne dii borrabehtet

daguideattet šattuid

ja gallánehpet juonaideattetguin.

₃₂Jorraleapmi goddá dáidemeahttumiid,

jallaid oadjebasvuohta duššada sin.

₃₃Muhto dat gii mu gullá,

beassá ássat oadjebassan,

son ii dárbbaš ballat mange bahás.”