Sátneláskkut 2

₁Bártnážan,

jos don válddát vuhtii mu sániid

ja vurket mu báhkkomiid iežat siste,

₂nu ahte jorgalat bealji

gullat viisodaga,

rabastat váimmu ipmárdussii,

₃rávkkat jierpmi

ja čuorvvut jitnosit áddejumi,

₄jos ozat dan dego silbba,

oččodat dan nugo čihkkojuvvon dávviriid,

₅de dalle don ipmirdat Hearrá balu

ja áddet mii lea dovdat Ipmila.

₆Dasgo Hearrá addá viisodaga,

su njálmmis boahtá diehtu ja

ja áddejupmi.

₇Son veahkeha vuoigatlaččaid ovdánit,

son lea daid galba

geat vádjolit láitemeahttumit,

₈son várjala vuoigatvuođa bálgáid

ja gáhtte oskkáldasaidis geainnuid.

₉Dalle don ipmirdat vanhurskkisvuođa,

vuoigatvuođa ja vuoigatlašvuođa,

juohke buori bálgá.

₁₀Viisodat deavdá du váimmu

ja diehtu addá dutnje ilu,

₁₁dárkilvuohta lea du gáhttejeaddji,

ipmárdus du várjaleaddji.

₁₂Dat gádjot du bahás geainnus,

olbmuin geat botnjet duohtavuođa,

₁₃dain geat leat gáidan njulges bálgáin

ja vádjolit seavdnjadasa geainnuid,

₁₄geat illudit go dahket bahá

ja ávvudit das mii lea bahá ja jorgut,

₁₅geat vádjolit mohkkás bálgáid

ja spiehkastit vearrigeainnuide.

₁₆Viisodat beastá du vierronissonis,

sus gii dahká sániidis livttisin,

₁₇sus gii lea guođđán

nuorravuođa ustibis

ja vajáldahttán lihtu Ipmiliinnis.

₁₈Su viessu vuodju jábmiidáibmui,

su geaidnu doalvu jámežiid lusa.

₁₉Dat geat mannet su lusa,

eai goassege máhca,

eai sii gávnna eallima bálgá.

₂₀Vádjol don baicce

buriid olbmuid geainnu

ja čuovo vanhurskásiid bálgáid.

₂₁Vuoigatlaččat ožžot ássat eatnamis,

láitemeahttun olbmot

besset orrut doppe,

₂₂muhto ipmilmeahttumat

duššaduvvojit eatnamis,

behtolaš olbmot rohttejuvvojit

doppe eret.