Sátneláskkut 3

₁Bártnážan, ale vajáldahte

maid mun lean oahpahan dutnje,

vurke mu báhkkomiid váibmosat.

₂Dat lasihit dutnje eallinjagiid,

addet dutnje ráfi ja lihku.

₃Ale divtte buorrevuođa

ja oskkáldasvuođa gáidat luhtát –

giesa daid iežat čeabehii,

čále daid váimmot távvalii,

₄de Ipmil ja olbmot atnet du árvvus

du viissisvuođa dihte.

₅Dorvvas Hearrái oppa váimmus,

alege luohte iežat jierbmái.

₆Jurddaš su gos dal vádjoleaččat,

de son dahká du bálgáid njuolgadin.

₇Ale leage jierbmái iežat čalmmiin;

bala Hearrás ja gáidda bahás.

₈Dat šaddá dearvvasvuohtan

du rupmašii,

fápmun buot dan dávttiide.

₉Gudnejahte Hearrá

buot dainna mii dus lea,

buot dan álgošattuin maid leat šaddadan.

₁₀Dalle gortnit devdet du áittiid,

ja viidni golgá

du bohčingáriid badjel.

₁₁Bártnážan, ale hilggo

Hearrá bagadusa,

ale nuonddahala

go son cuiggoda du,

₁₂danne go Hearrá ráŋgu dan

gean son ráhkista,

son bagada dan bártni

gean son atná ráhkisin.

₁₃Lihkolaš dat olmmoš

gii lea gávdnan viisodaga,

dat gii lea joksan dieđu.

₁₄Buoret go silba lea viisodat,

dat addá buoret vuoittu go golli.

₁₅Viisodat lea mávssoleabbo

go bearralat,

ii mihkkege buot dávviriin

leat dan veardásaš.

₁₆Dan olgeš gieđas lea guhkes eallin,

dan gurut gieđas riggodat ja gudni.

₁₇Viisodaga geainnuid

lea hávski vádjolit,

buot dan bálgát dolvot ráfái.

₁₈Dat lea eallima muorra

buohkaide geat fáhtejit dan,

lihkolaš dat gii doallá das gitta.

₁₉Hearrá vuođđudii eatnama

viisodagain,

son lebbii almmi ipmárdusain.

₂₀Su diehtu rabai

čiekŋalasaid rávnnji

ja divttii balvvaid suolnni goaikut.

₂₁Bártnážan, ane áimmuin

jierpmálašvuođa ja fuolalašvuođa,

ale luoitte daid gáidat

čalmmiidat ovddas,

₂₂danin go dat addet dutnje eallima,

dat leat čikŋa du čeabeha birra.

₂₃Dalle don vádjolat oadjebasat,

it nordda juolggát,

₂₄ja go leat veallánan, de oađát njálgát,

it bala mastege.

₂₅Ale bala fáhkkes suorggahusas,

ale garra dálkkis

mii deaivida ipmilmeahttumiid,

₂₆dasgo Hearrá lea du dorvu,

son várjala du juolggi darváneames gillii.

₂₇Ale biehttal veahkeheames,

jos nubbi olmmoš dárbbaša veahki

ja don sáhtát dahkat sutnje buori.

₂₈Jos dus lea mihkkege maid addit,

de ale daja lagamužžasat:

“Mana dál ja boađe ihttin,

de mun attán dutnje!”

₂₉Ale hutkka baháid lagamuččat vuostá

gii atná oadjebassan ássat du siidaguoibmin.

₃₀Ale bealkke nuppiin almmá siva haga,

go son ii leat dahkan dutnje

maidege baháid.

₃₁Ale gáđaš veahkaválddálaš olbmá,

ale čuovvul su luottaid.

₃₂Hearrá fasttáša vearálaš olbmo,

muhto vuoigatlačča son atná ustibin.

₃₃Hearrá garuha

ipmilmeahttumiid viesu,

muhto vanhurskásiid ruovttu

son buressivdnida.

₃₄Bilkideddjiid son bilkida,

muhto vuollegaččaide son addá árpmu.

₃₅Viisát ožžot gudni,

jierpmeheamit guddet iežaset heahpada.