Sátneláskkut 4

₁Gullet, mánáidan, áhči neavvagiid,

guldalehket ja ohppet jierpmálašvuođa.

₂Mun attán didjiide buori oahpa,

allet vajáldahte mu oahpahusa.

₃Go mun bártnážin ledjen ruovttus

áhččán luhtte,

njuorasin ja eadnán áinnohažžan,

₄dalle áhčči oahpahii mu:

Doala gitta mu sániin,

doala mu báhkkomiid, de oaččut eallit.

₅Hága viisodaga, hága jierpmi,

ale vajáldahte

maid mun dutnje cealkkán

alege gáidda das.

₆Ale hilggo viisodaga,

de dat gáhtte du,

ráhkis dan, de dat várjala du.

₇Hága viissisvuođa,

dat lea buot mávssoleamos,

hága ipmárdusa buot dainna

mii dus lea.

₈Goarggut viisodaga,

de dat alida du,

jos don fátmmastat dan,

de dat buktá dutnje gudni.

₉Dat bidjá du oaivái

čáppa gudnegierddu,

dat geige dutnje hearvás kruvnnu.

₁₀Gula, bártnážan,

váldde vuhtii mu sániid,

de du eallinjagit šaddet eatnagin.

₁₁Mun oahpahan dutnje

viisodaga geainnu,

mun oahpistan du rivttes bálgáide.

₁₂Go don váccát daid,

de ii mihkkege hehtte du,

go don viegat, de it guossal.

₁₃Biso álo bagadusas

maid leat ožžon,

ane dan áimmuin,

dat lea du eallin.

₁₄Ale vácce ipmilmeahttumiid bálgá,

ale vuolgge dan geidnui

man bahát vádjolit,

₁₅divtte dan orrut alege vácce dan,

gáidda das ja mana meaddel.

₁₆Ipmilmeahttumat eai sáhte oađđit

muđui go leat dahkan bahá,

sidjiide eai boađe nahkárat

jos sii eai leat jorralahttán ovttage.

₁₇Vearrivuohta lea sin láibi,

veahkaváldi sin viidni.

₁₈Vanhurskásiid bálggis lea dego

iđedisguovssu

mii šaddá šearradeabbon

ahte šearradeabbon dassá go

lea olles čuvges beaivi.

₁₉Ipmilmeahttumiid geaidnu

lea nugo seavdnjatvuohta,

sii eai dieđe masa vedjet guossalit.

₂₀Bártnážan, gula maid mun dajan,

guldal dárkilit mu sániid.

₂₁Ale goassege luoitte daid

čalmmiidat ovddas,

vurke daid čiekŋalassii iežat váibmui.

₂₂Dat addet eallima dasa

gii daid gávdná,

dálkasa olles su rupmašii.

₂₃Várjal váimmot eambbo go

buot eará,

dainna go eallin vuolgá das.

₂₄Ale suova iežat njálmmi

sárdnut vearálaččat,

ale ane baksamiiddát behttosii.

₂₅Gehččoset du čalmmit

njuolga ovddos,

geahča dasa mii dus lea ovddabealde.

₂₆Dárko dan luotta man leat vázzimin,

de don jođát álo nana eatnama alde.

₂₇Ale spiehkkas olgeš alege

gurut beallái,

jorgal lávkkiidat bahás eret.