Sátneláskkut 25

₂Ipmila gudni lea čiehkat ášši,

gonagasaid gudni lea dutkat ášši.

₃Almmi allodat, eatnama čikŋodat

ja gonagasa jurdagat

eai leat guorahallamis.

₄Earut skártta silbbas,

de silbarávdi sáhttá duddjot lihti.

₅Áje ipmilmeahttumiid eret

gonagasa luhtte,

de vuoigatlašvuohta nanne

su truvnnu.

₆Ale rámppastala

gonagasa muođuid ovddas

alege gáibit saji stuorráid searvái.

₇Buoret lea gullat su cealkit:

“Boađe boaššoliidda”,

go šaddat čáhkket saji oaivámužžii.

Vaikko vel oainnášitge mii dáhpáhuvvá,

₈de ale diggogoađe beare fargga.

Maid don dagat maŋimustá,

go du lagamuš

heahppášuhttá du?

₉Čielggat iežat ášši lagamuččainat,

muhto ale ivtte nuppi olbmo

čiegusvuođa,

₁₀muđui dat gii dan gullá,

soaibmá du,

eaige du šláddarat leat máhcaheames.

₁₁Golleehpelat silbaviđjjis

leat sánit mat sárdnojuvvojit

vuogas áigái.

₁₂Dego golleriekkis, nugo gollečikŋa

lea viisá bagadus mieđamánas olbmui.

₁₃Dego muohttaga gálusvuohta

lájuid áigge

lea luohtehahtti áirras

vuolggaheaddjásis:

Son addá isidasas ođđa návccaid.

₁₄Biegga ja balva mii ii atte arvvi,

lea dat gii rámpo skeaŋkka

maid ii atte.

₁₅Gierdavašvuođain oaivámuččat

sártnuhuvvojit,

litna njuovčča doadjá dávttiid.

₁₆Jos gávnnat honnega,

de bora maid dárbbašat,

amat gallánit das ja vuovssadit.

₁₇Gallet hárve ustibat viesu,

amas čalmmástuvvat ja bahánit dutnje.

₁₈Šluppot, miehkki

ja bastilis njuolla lea son

gii cealká vearreduođaštusa

lagamuččas vuostá.

₁₉Dego mieska bátni

ja suibbodeaddji juolgi

lea dorvvastit behtolaš olbmui

heahtebeaivvi.

₂₀Nugo olmmoš gii nuolada buolašin,

dego leiket sivrra hávvái

lea lávlut morašlažžii.

₂₁Jos du vašálaš nealgu,

de atte sutnje láibbi borrat,

jos son goiká,

de atte sutnje čázi juhkat.

₂₂Dalle don čohkket buolli hilaid

su oaivvi ala,

ja Hearrá máksá dan dutnje.

₂₃Davvebiegga buktá arvvi,

sealggebeale sárdnun

suhttan ámadaju.

₂₄Buoret ássat dáhkkečiegas

go ovtta viesus bealkálas áhkáin.

₂₅Nugo galbma čáhci goikan čoddagii,

nu lea buorre sáhka gáiddus eatnamis.

₂₆Dego moiveája ja biliduvvon gáivo

lea vanhurskkis gii mieđiha

ipmilmeahttumii.

₂₇Ii leat buorre borrat ollu honnega;

ii leat gutnálaš háhpohaddat iežas gudni.

₂₈Dego gávpot man muvra

lea gaikojuvvon,

lea olmmái gii ii máhte ráđđet iežas.