Sálmmaid girji 1

₁Ávdugas lea son guhte ii vádjol

ipmilmeahttumiid ráđi mielde,

guhte ii čuovvul suttolaččaid geainnu

iige čohkká bilkideddjiid čohkkánsajis,

₂muhto gávdná ilu Hearrá lágas

ja guorahallá dan ijatbeaivái.

₃Son lea dego muorra

mii lea gilvojuvvon čáhcejogažiid gáddái:

dat addá šaddosa rivttes áigái,

eaige dan lasttat golnna.

Buot maid son dahká, lihkostuvvá.

₄Nu eai ipmilmeahttumat –

sii leat dego sáđut maid biegga biđge.

₅Dan dihte ipmilmeahttumat

eai ceavzze go duopmu celkojuvvo,

iige suttolaččain leat sadji

vuoigatlaččaid searvvis.

₆Hearrá dovdá vuoigatlaččaid geainnu,

muhto ipmilmeahttumiid geaidnu

doalvu hevvui.