Sálmmaid girji 103

Máinno Hearrá, mu siellu,

buot mii mu siste lea,

máinno su bassi nama!

₂Máinno Hearrá, mu siellu,

ale vajáldahte buot buriid

maid son dahká.

₃Son addá ándagassii buot mu suttuid

ja dálkkasta buot mu buozalvasaid.

₄Son lonista mu heakka hávddis

ja kruvnnida mu árpmuin

ja váibmoláđisvuođain.

₅Son galleha mu eallima buriiguin,

ja mun šattan fas nuorran dego goaskin.

₆Hearrá dagut leat vanhurskásat,

son buktá vuoigatvuođa

buot sordojuvvon olbmuide.

₇Son čájehii geainnuidis Mosesii,

Israela álbmogii stuorra daguidis.

₈Váibmoláđis ja árbmugas lea Hearrá.

Son lea gierdavaš ja su árbmu lea stuoris.

₉Ii son sivahala min agibeaivvi,

ii son leat moaris agálaččat.

₁₀Ii son daga midjiide dan maid mii ánssášit,

ii mávssat midjiide min vearredaguid.

₁₁Nu allat go albmi lea eatnama badjel,

nu stuoris lea Hearrá árbmu daidda

geat ballet sus.

₁₂Nu guhkkin go nuorti lea eret oarjjis,

nu guhkás son gáidada mis min suttuid.

₁₃Nugo áhčči árkkálmastá mánáidis,

nu árkkálmastá Hearrá daid geat ballet sus.

₁₄Son diehtá mo mii leat sivdniduvvon,

son muitá ahte mii leat muolda.

₁₅Olbmo beaivvit leat nugo rásit:

Nugo gietti rássi son liđiida,

₁₆ja go biegga manná su badjel,

de son ii leat šat eambbo

iige su báiki šat dovdda su.

₁₇Muhto Hearrá árbmu

lea agálašvuođas agálašvuhtii

daid oassi geat ballet sus.

Su vanhurskkisvuohta ollá buolvvas bulvii

₁₈daidda geat dollet su lihtu,

muitet su báhkkomiid

ja ellet daid mielde.

₁₉Hearrá lea ceggen truvnnus albmái,

buot lea biddjojuvvon su válddi vuollái.

₂₀Máidnot Hearrá, buot su eŋgelat,

dii gievrras sáŋgárat

geat dahkabehtet maid son gohčču

ja jeagadehpet su jiena.

₂₁Máidnot Hearrá, buot su veagat

geat bálvalehpet su

ja ollašuhttibehtet su dáhtu.

₂₂Máidnot Hearrá, buot su sivdnádusat

buot báikkiin gos son ráđđe.

Máinno Hearrá, mu siellu!