Sálmmaid girji 104

₁Máinno Hearrá, mu siellu!

Hearrá, mu Ipmil, don leat stuoris!

Don leat gárvodan allatvuođa

ja hearvásvuođa,

₂čuovggas du birra lea dego bivttas.

Don leat lebben almmi dego loavdaga

₃ja huksen iežat sála čáziid badjel.

Don dagat balvvaid iežat vovdnan

ja jođát biekka soajáiguin.

₄Biekkaid don dagat áirrasin,

šloavvi dola bálvaleaddjinat.

₅Don vuođđudit eatnama

nana vuođu ala,

dat ii lihkahuvvo agálaš áigái.

₆Mearračiekŋalas govččai dan

dego bivttas,

čázit ledje váriid badjel.

₇Muhto don gohččot čáziid

ja dat báhtaredje,

dat manne hoahpus

du bajána jiena ovddas.

₈Čázit badjánedje váriid badjel

ja golge legiide,

daidda sajiide maid don mearridit.

₉Don bidjet ráji čáziide,

eaige dat šat goassege

máhca gokčat eatnama.

₁₀Don diktet ádjagiid golggiidit legiin,

dat golget johkan váriid gaskka.

₁₁Dat addet čázi buot eatnama elliide,

doppe meahcceásenat čáskadit goikku.

₁₂Daid gáttiin almmi lottit bessejit

ja vizardit ovssiid alde.

₁₃Don čáhccet váriid alla sálastat,

ja eanan gallehuvvo

buot dainna maid don attát.

₁₄Don šaddadat rási omiide

ja šattuid ávkin olbmuide.

Nu don divttát biepmu boahtit eatnamis

₁₅ja viinni illudahttit olbmo váimmu.

Olju dahká ámadaju báitin,

ja láibi addá olbmui áhpiid.

₁₆Hearrá muorat gallehuvvojit,

Libanona sederat maid son lea gilván.

₁₇Lottit huksejit daid ovssiide beasi,

stoarkka viessu lea daid gierragiin.

₁₈Alla várit leat várregáicca ruoktu,

bákteluomuin gávdná báktemievri suoji.

₁₉Don dahket mánu čájehit áiggiid,

ja beaivváža mii diehtá luoitádanáiggis.

₂₀Don vuolggahat seavdnjadasa,

ja idja šaddá.

Dalle lihkadišgohtet buot meahcieallit.

₂₁Nuorra ledjonat čergot

stajádusa maŋŋái,

dat bivdet Ipmilis biepmu.

₂₂Go beaivváš badjána, dat čiehkádit

ja mannet goarjut biejuidasaset.

₂₃Dalle olmmoš vuolgá bargosis

ja bargá gitta eahkedii.

₂₄Hearrá, lohkameahttumat

leat du dagut!

Buot daid don dahket viissisvuođain,

eatnama dievva leat du sivdnádusat.

₂₅Das lea áhpi, stuoris ja viiddis,

giđđudeaddji elliid eatnatvuohta,

lohkameahttun ollu eallit,

sihke smávvát ja stuorrát.

₂₆Doppe johtet skiippat,

doppe lea Leviatan maid don dahket

duhkoraddat čiekŋalasas.

₂₇Buot dat bidjet doaivvu dutnje,

vurdet du biebmat sin rivttes áigái.

₂₈Don attát daidda, ja dat váldet,

don rabastat gieđa a gallehat daid

buriid attáldagaiguin.

₂₉Go don jorgalat eret,

de dat suorganit,

don válddát dain eallinvuoiŋŋanasa,

ja dat jápmet ja šaddet fas muoldan.

₃₀Don vuolggahat vuoiŋŋat,

ja eallin sivdniduvvo,

don ođasmahtát eatnama hámi.

₃₁Vare Hearrá gudni bisttášii agálaš áigái,

vare Hearrá beasašii illudit daguidis dihte!

₃₂Son geahččá eatnamii,

ja dat doarggista,

son guoskkaha váriid,

ja dat borggistit.

₃₃Mun rámidan Hearrá buot beivviidan,

máinnun Ipmilan nu guhká go ealán.

₃₄Vare Hearrá liikošii mu lávlagii,

vare mun beasašin illudit Hearrás!

₃₅Vare buot suttolaččat

jávkkašedje eatnamis,

eaige ipmilmeahttumat šat livčče das!

Máinno Hearrá, mu siellu!

Halleluja!