Sálmmaid girji 105

₁Giitet Hearrá, čurvot su nama,

muitalehket álbmogiidda

su stuorra daguid!

₂Lávlot ja čuojahehket su gudnin,

almmuhehket buot su oavdduid.

₃Máidnot su bassi nama,

illudehkoset dat geat ohcet Hearrá!

₄Ohcet Hearrá ja su fámu,

loaiddastehket álelassii su muođuid ovdii.

₅Muitet daid oavdudaguid

maid son lea dahkan,

su mearkkaid ja su duomuid,

₆dii Abrahama, su bálvaleaddji, mánát,

dii Jakoba bártnit, geaid son lea válljen.

₇Son lea Hearrá, min Ipmil,

su duomut jukset oppa eatnama.

₈Son muitá lihtus agálaš áigái,

duhát bulvii báhkkoma maid attii,

₉ lihtu maid dagai Abrahamiin,

váli maid vuortnui Isakii.

₁₀Son attii dan Jakobii láhkan,

Israelii agálaš lihttun.

₁₁“Mun attán dutnje Kanaana eatnama

árbin ja opmodahkan.”

₁₂Vaikko sii ledje dušše

uhca jovkkoš, vierrásat

₁₃geat vádjoledje álbmogis álbmogii,

riikkas nubbái,

₁₄de son ii suovvan ovttage soardit sin.

Sin dihte son ráŋggui gonagasaid:

₁₅“Allet guoskka daidda

geaid mun lean vuoidan,

allet daga baháid mu profehtaide.”

₁₆Son gohčui nealggi boahtit eatnamii

ja válddii sis láibbi,

₁₇son vuolggahii olbmá ovdal sin,

Josefa, gii vuvdojuvvui šlávvan.

₁₈Sii bággejedje Josefa julggiid láhkkiide,

ruovdi biddjojuvvui su čeahpáha birra,

₁₉dassá go su sátni ollašuvai,

ja Hearrá duođaštii su áššeheapmin.

₂₀Gonagas gohčui luoitit su friddjan,

álbmogiid ráđđejeaddji luittii su luovos.

₂₁Son bijai Josefa iežas viesu hearrán,

hálddašit buot su opmodaga,

₂₂bagadit oaivámuččaid

iežas dáhtu mielde

ja oahpahit vuorrasiidda viissisvuođa.

₂₃Nu Israel bođii Egyptii,

Jakob vierisin Hama eatnamii.

₂₄Ipmil dagai álbmogis šattolažžan,

gievrrabun go dan vašálaččat.

₂₅Son jorgalii egyptalaččaid miela,

ja sii vašuhišgohte su álbmoga,

meannudedje gávvilit su bálvaleddjiiguin.

₂₆Son vuolggahii Mosesa, bálvaleaddjis,

ja Arona gean son lei válljen.

₂₇Soai dagaiga Egyptas Ipmila mearkkaid,

oavdudaguid Hama eatnamis.

₂₈Hearrá vuolggahii seavdnjadasa,

ja visot sevnnjodii,

muhto egyptalaččat nággárušše

su sáni vuostá.

₂₉Son nuppástuhtii sin čázi varran

ja gottii visot sin guliid.

₃₀Cubbot giđđudedje sin eatnamis,

velá gonagasa gámmáriid sistege.

₃₁Hearrá gohčui, ja čurotmoađit bohte,

čuoikkat levve miehtá sin riikka.

₃₂Son attii čuorbmasiid arvvi sadjái

ja časkkii eatnama šloavvi dolain.

₃₃Son njeiddii sin viidnemuoraid

ja fiikonmuoraid

ja dojii juohke muora sin eatnamis.

₃₄Son gohčui, ja rásselohkut bohte,

lohkameahttun jurssánat.

₃₅Dat borre eatnamis buot ruotnasa,

jurse visot bealdduid šattuid.

₃₆Ipmil sorbmii buot

sin vuosttašriegádeddjiid,

sin olmmáivuođa vuosttaš šattuid.

₃₇Son doalvvui israellaččaid eret Egyptas,

sii vulge ja gudde silbba ja golli,

su čearddaid olbmuin

ii oktage guossalan.

₃₈Egypta illudii go sii vulge,

dasgo álbmot balai sis.

₃₉Son lebbii balvva govččasin

ja bijai dola čuvget ija.

₄₀Sii gáibidedje borramuša,

ja son vuolggahii váktillottiid,

son gallehii sin almmi láibbiin.

₄₁Son rabastii bávtti, ja čáhci golggihii,

dat golggai johkan goikeeatnamis.

₄₂Hearrá muittii bassi lohpádusas

Abrahamii, bálvaleaddjásis,

₄₃ja divttii álbmogis vuolgit iluin.

Álbmot maid son lei válljen,

beasai johttát ávvudemiin.

₄₄Son attii sidjiide

eará álbmogiid ássansajiid,

sii besse váldit vierroálbmogiid

rahčamušaid šaddosiid,

₄₅ja sii galge doallat su báhkkomiid,

doahttalit su lágaid.

Halleluja!