Sálmmaid girji 106

₁Halleluja!

Giitet Hearrá! Son lea buorre,

su árbmu bistá agálaččat.

₂Gii máhttá muitalit Hearrá

veagalaš daguid,

almmuhit buot maid son lea dahkan?

₃Ávdugasat dat geat ellet

nugo lea vuoigat,

geat álelassii barget vuoiggalaččat.

₄Hearrá, don leat árbmugas

iežat álbmogii – oahppalatta munai!

Veahket mu ja beastte mu,

₅divtte mu dovdat daid olbmuid lihku

geaid leat válljen,

illudit go du álbmot illuda

ja ávvudit oktan daiguin geat gullet dutnje.

₆Mii leat suddudan nugo min áhčitge,

mii leat dahkan baháid

ja eallán ipmilmeahttumit.

₇Go min áhčit ledje Egyptas,

de sii eai ipmirdan du oavdudaguid.

Sii eai muitán buot buriid

maid ledjet dahkan.

Ruksesmeara gáttis

sii nággárušše du vuostá.

₈Muhto Hearrá besttii sin,

namas gudni dihte,

son čájehii iežas fámu ja válddi.

₉Son áittii Ruksesmeara, ja dat goikkai,

son doalvvui sin mearračiekŋalasa čađa,

mearrabotni dego meahcceluotta.

₁₀Son besttii sin vašuheddjiin,

lonistii sin vašálačča gieđas.

₁₁Čáhci govččai buot sin vuostálastiid,

ii oktage dain báhcán heggii.

₁₂Dalle sii osko maid son lei sárdnon,

ja lávlo sutnje giitosa.

₁₃Dattetge sii fargga vajáldahtte su daguid,

eai luohttán su neavvagiidda.

₁₄Meahcis sii dohppehalle anistupmái

ja geahččaledje Ipmila.

₁₅Dalle son attii sidjiide

maid sii gáibidedje,

muhto vuolggahii sin gaskii maiddái

issoras dávdda.

₁₆Siiddas sii gáđaštedje Mosesa

ja Arona, Hearrá bassi olbmá.

₁₇Dalle eanan rahpasii ja njielai Datana,

govččai Abirama joavkku.

₁₈Daid vuostá geat čuvvo su,

buollái dolla,

njivžžanas duššadii ipmilmeahttumiid.

₁₉Horeba vuolde sii leikejedje gálbbi

ja gopmirdedje bácci

maid ledje ráhkadan.

₂₀Sii lonuhedje gudniset vuovssá govain,

šibiha mii borrá rásiid.

₂₁Sii vajáldahtte Ipmila, beastiset,

guhte lei dahkan stuorra daguid Egyptas,

₂₂imašlaš oavdudaguid Hama eatnamis,

balddihahtti daguid Ruksesmeara gáttis.

₂₃Son livččii duššadan sin

jos Moses, gean son lei válljen,

ii livčče loaiddastan su ovdii

ja hehtten su moari duššadeames sin.

₂₄Sii hilgo hávskás eatnama,

sii eai oskon maid Hearrá sártnui,

₂₅muhto nimmoredje gođiineaset

eaige gullan Hearrá jiena.

₂₆Dalle son bajidii gieđa sin vuostá.

Son áiggui časkit sin meahcis,

₂₇biđget sin mánáid álbmogiid gaskii

ja háddjet sin buot eatnamiidda.

₂₈Sii serve Baal-Peoriin

ja borre heakkahis ipmiliid oaffariid.

₂₉Sii moaráhuhtte Hearrá

daguideasetguin,

ja rohttudávda bođii sin gaskii.

₃₀Dalle loaiddastii Pinehas ovdan

ja doalai duomu,

ja rohttudávda bissánii.

₃₁Dan dihte son adnojuvvo vanhurskkisin

buolvvas bulvii, agálaččat.

₃₂Sii moaráhuhtte Ipmila

Meribačázi gáttis,

ja sin geažil Moses šattai gillát.

₃₃Sii bávččagahtte su miela,

ja son sártnui almmá jurddaškeahttá.

₃₄Sii eai duššadan eatnama álbmogiid

maid Hearrá lei gohččon sin duššadit,

₃₅muhto seahkánedje vieris álbmogiidda

ja ohppe sin vieruid.

₃₆Sii bálvaledje vieris ipmiliid,

ja dat šadde sidjiide giellan.

₃₇Sii oaffarušše bártniideaset

ja nieiddaideaset bahás vuoiŋŋaide.

₃₈Sii golggahedje vigihis vara,

bártniid ja nieiddaid vara

maid sii oaffarušše

Kanaana eahpeipmiliidda,

ja varra dagai eatnama eahpebassin.

₃₉Sin dagut dahke sin buhtismeahttumin,

sii ledje oskkáldasmeahttumat

das maid dahke.

₄₀Dalle Hearrá moarri buollái

álbmoga vuostá,

son fasttášii daid geat gulle sutnje.

₄₁Son attii sin vierroálbmogiid gihtii,

sin vašuheaddjit ráđđejedje sin.

₄₂Sin vašálaččat áŧestedje sin,

ja sii šadde vierrásiid váldái.

₄₃Son gájui sin eatnat gerddiid,

muhto sii nággárušše su vuostá,

dahke nugo dáhtto

ja vudjo suddui ain čiekŋalebbui.

₄₄Muhto Hearrá oinnii sin heađi

ja gulai sin čuorvasa.

₄₅Son muitái lihtus singuin

ja árpmihii sin

stuorra árbmugasvuođastis.

₄₆Son jorgalii sidjiide váibmoláđisin

daid olbmuid

geat ledje dolvon sin fáŋgavuhtii.

₄₇Beastte min, Hearrá, min Ipmil,

viečča min álbmogiid gaskkas!

Dalle mii beassat máidnut du bassi nama

ja giitit ja rámidit du.

₄₈Máidnojuvvon lehkos Hearrá,

Israela Ipmil,

agálašvuođas agálašvuhtii!

Celkos oppa álbmot: Amen.

Halleluja!