Sálmmaid girji 107

₁Rámidehket Hearrá,

dasgo son lea buorre,

su árbmu bistá agálaččat.

₂Nu celkoset dat

geaid Hearrá lea lonistan,

geaid son lea čoavdán heađis

₃ja čohkken buot eatnamiin

nuortan ja oarjin, davvin ja lullin.

₄Muhtumat sis čádjádalle meahccái

ja ávdin báikkiide

eaige gávdnan gávpoga gosa ássat.

₅Sii nelgo ja goike,

sin siellu vuoimmehuvai.

₆Dalle sii heađisteaset čurvo Hearrái,

ja son gájui sin sin áŧestusain.

₇Son oahpistii sin rivttes geidnui,

gávpogii gosa sii besse ássat.

₈Giitoset sii Hearrá su buorrevuođas,

rámidehkoset oavdudaguin

maid son lea dahkan olbmuide!

₉Son addá juhkat daidda

geat leat goikan,

galleha buriiguin daid geat leat nelgon.

₁₀Muhtumat sis čohkkájedje

seavdnjadasas ja jápminsuoivanis,

vártnuheapmin

ja ruovdeláhkkiide čadnojuvvon,

₁₁danne go sii ledje leamas

vuostehágolaččat Ipmila gohččumiidda

ja badjelgeahččan Alimusa neavvagiid.

₁₂Son vuolidii sin gillámušaiguin,

sii guossaledje

eaige ožžon veahki ovttasge.

₁₃Dalle sii heađisteaset čurvo Hearrái,

ja son besttii sin sin áŧestusain.

₁₄Son doalvvui sin olggos

seavdnjadasas ja jápminsuoivanis

ja botkii sin láhkkiid.

₁₅Giitoset sii Hearrá su buorrevuođas,

oavdudaguin maid son lea dahkan olbmuide!

₁₆Son biđge veaikeuvssaid

ja cuvke ruovdesmarttiid.

₁₇Muhtumat sis buhce suttuideaset dihte

ja gárte gillát vearredaguideaset geažil.

₁₈Sii fasttášedje buot borramuša,

sii ledje juo boahtán

jápmima poarttaid lahka.

₁₉Dalle sii heađisteaset čurvo Hearrái,

ja son besttii sin sin áŧestusain.

₂₀Son vuolggahii sánis ja buoridii sin,

son besttii sin hávddis.

₂₁Giitoset sii Hearrá su buorrevuođas,

oavdudaguin maid son lea dahkan olbmuide!

₂₂Buktoset sii giittusoaffara

ja muitalehkoset ávvudemiin su daguid!

₂₃Muhtumat sis manne skiippaide

ja gávppašedje stuorra mearaid alde.

₂₄Sii oidne Hearrá daguid,

čiekŋalasaid oavdduid,

su stuorra oavdudaguid.

₂₅Son gohčui, ja šattai riđđudálki,

meara bárut badjánedje.

₂₆Sii loktanedje almmi guvlui

ja vudjo čiekŋalasaide,

oasehisvuođas sin siellu hearddohuvai.

₂₇Sii sugadedje, sii suibo

dego gárrenolbmot,

sin máhtus ii lean ávki.

₂₈Dalle sii heađisteaset čurvo Hearrái,

ja son besttii sin sin áŧestusain.

₂₉Son divttii riđu šaddat goalkin,

ja meara bárut jaskkodedje.

₃₀Sii illosedje go golkii,

ja son doalvvui sin dan hápmanii

gosa sii ledje áigumin.

₃₁Giitoset sii Hearrá su buorrevuođas,

oavdudaguin maid son lea dahkan olbmuide!

₃₂Gulahehkoset sii su gudni

go su álbmot čoaggana,

su rámádusa vuorrasiid čoakkalmasas!

₃₃Son dahká eanuid ávdin meahccin,

goikada čáhccás ádjagiid,

₃₄dahká šattolaš eatnama sálteeanamin

dan ássiid bahávuođa dihte.

₃₅Son rievdada meahci jávrin

ja goikeeatnama čáhceájan.

₃₆Dasa son diktá nealgu olbmuid ássat,

ja sii huksejit alcceseaset gávpoga.

₃₇Sii gilvet bealdduid

ja ráhkadit viidnegárddiid,

sii čohkkejit šattu valjis.

₃₈Son buressivdnida sin

ja álbmot eatnána sakka,

ja sin oamit lassánit.

₃₉Muhto jos sii fas uhccánit

ja nuonddahallet áŧestusaide,

oasehisvuhtii ja morrašii,

₄₀de son golggaha badjelgehččojumi

oaivámuččaid badjelii

ja diktá sin čádjádallat

bálggeskeahtes ávdin meahccái.

₄₁Muhto váivvášiid son bajida

vártnuhisvuođas

ja dahká sin sogaid stuorisin

dego sávzaeallu.

₄₂Vuoigatlaččat oidnet dan ja illudit,

muhto buot bahávuohta

ferte jávohuvvat.

₄₃Viissis váldá dan vuhtii

ja guorahallá Hearrá buriid daguid.