Sálmmaid girji 108

₂Ipmil, mu váibmu lea dorvvolaš,

mun dáhtun čuojahit ja lávlut.

Gohccá, mu siellu,

₃morit, hárpa ja lyra,

mun dáhtun boktit iđedisgukso!

₄Hearrá, mun rámidan du

álbmogiid gaskkas,

mun lávllun du máidnuma

buot álbmogiidda.

₅Du árbmu ollá alleliidda go albmi,

du oskkáldasvuohta gitta balvvaid rádjái.

₆Ipmil, badjánehkos du gudni

badjel almmi,

du hearvásvuohta badjel oppa eatnama!

₇Veahket min olgeš gieđainat,

gula mu rohkadusa ja gájo daid

geaid don ráhkistat!

₈Ipmil lea sárdnon bassibáikkistis:

“Ávvudemiin mun attán didjiide Sikema,

juogadan didjiide Sukkotleagi.

₉Mu lea Gilead, mu lea Manasse,

Efraim lea mu oaivesuodji,

Juda mu ráđđensoabbi.

₁₀Moab lea mu basadanlihtti,

Edomii mun suhppen gápmagiiddán,

Filistea vuostá mun bajidan

soahtečuorvasa.”

₁₁Gii doalvu mu ladnegávpogii,

gii oahpista mu Edomii?

₁₂Ipmil, donhan hilgot min,

it vuolgán min soahteveagaiguin.

₁₃Atte midjiide veahki vašálačča vuostá!

Olbmuid veahkis ii leat ávki.

₁₄Ipmila vehkiin mii dahkat

stuorra daguid,

son duolbmá eatnamii min vašálaččaid.