Sálmmaid girji 109

Ipmil, don gean mun máinnun,

ale oro jávohaga!

₂Ipmilmeahttumat ja behtolaččat

sivahallet mu.

Sii sárdnot muinna gielis njuokčamiin,

₃birastahttet mu vaššás sániiguin

ja fallehit mu almmá siva haga.

₄Sii bálkkašit mu ráhkisvuođa

sivahallamiin.

Mun in leat dahkan maidege baháid.

₅Sii mávssahit buori baháin,

mu ustitvuođa vašiin.

₆Bija mu vuostálastái

vuoigatmeahttun duopmára,

bija árpmuhis olbmá guoddalit su!

₇Divtte dikki dubmet su sivalažžan,

vare su rohkadus manašii duššás.

₈Šaddos su eallin oanehaš,

váldos eará olmmoš su doaimma.

₉Báhcoset su mánát áhčiheapmin,

báhcos su áhkká leaskan.

₁₀Vádjolehkoset su mánát golgolažžan,

šaddoset gearjidit guhkkin eret

gaikkoduvvon ruovttusteaset.

₁₁Váldos velgoheaddji

buot su opmodaga,

rievidehkoset vierroolbmot

su barggu šattuid.

₁₂Allos oktage čájehehko sutnje

oskkáldasvuođa,

allos guhtege árpmihehko

su oarbbes mánáid.

₁₃Vare su nálli duššašii,

vare sin namma jávkkašii

nuppi buolvvas!

₁₄Vare Hearrá muittášii

su áhčiid vearredaguid,

vare su eatni suttut eai goassege

sihkkojuvvoše,

₁₅atnos Hearrá dan čađat čalmmis.

Vare su muitu sihkkojuvvošii eatnama alde!

₁₆Son ii goassege áigon leat váibmoláđis.

Son doarrádalai váivváša ja vártnuheami,

ja hearddohuvvan olbmo son dáhtui goddit.

₁₇Son liikui garuhit,

vare son ieš garuhuvvošii!

Son ii beroštan buressivdnidit,

vare buressivdnádus livččii sus gáidosis!

₁₈Giessasehkos garuhus su birra

biktasa láhkái,

bahkkejehkos dat su rupmašii dego čáhci,

su dávttiide nugo olju.

₁₉Lehkos dat gáktin su badjel,

boagánin su alimiid birra.

₂₀Mávssahehkos Hearrá daidda

geat sivahallet mu,

geat sárdnot bahá mu birra.

₂₁Hearrá, mu Hearrá,

daga buori munnje namat dihte!

Gájo mu, donhan leat buorre ja oskkáldas!

₂₂Mun lean vártnuheapme ja váivváš,

mu váimmu dievva lea áŧestus.

₂₃Mun jávkkan dego suoivvan

sevnnjodettiin,

mun njávkkastuvvon eret

nugo rásselohkku.

₂₄Mu čippit suibot

danne go mun fástudan,

mu gorut ruoidná ja sotná.

₂₅Mu doarrideaddjit bilkidit mu,

sii bárdet oaivvi go oidnet mu.

₂₆Hearrá, mu Ipmil, veahket mu!

Don gii leat oskkáldas, beastte mu!

₂₇Divtte sin dovdat du gieđa fámu,

vare sii boađášedje diehtit

ahte don, Hearrá, leat dahkan dán!

₂₈Sii garuhit,

muhto don buressivdnidat.

Mu vuostálastit šaddet heahpanit,

muhto du bálvaleaddji beassá illudit.

₂₉Lehkos bilku

mu guoddaleddjiid bivttas

ja heahpat sin gákti!

₃₀Mun giittán Hearrá máidnunlávlagiin,

álbmoga gaskkas mun rámidan su.

₃₁Son čuožžu váivváša bálddas

ja beastá su daid gieđas geat dubmejit su.