Sálmmaid girji 110

Hearrá cealká mu hearrái:

“Čohkán mu olgeš beallái,

de mun bijan du vašálaččaid

du julggiid vuolušin.

₂Sionis Hearrá geige dutnje fámu soappi.

Ráđđe dal vašálaččaidat!

₃Du álbmot čoaggana millosit

dan beaivvi go don oaččut válddi.

Bassi váriin mun riegádahtten du

dego suolnni iđedisroađi askkis.”

₄Hearrá lea vurdnon váli iige dan gáđa:

“Don leat báhppa agálašvuhtii,

du báhppavuohta lea

Melkisedeka báhppavuohta.”

₅Hearrá lea du olgeš gieđa bealde.

Iežas moari beaivvi

son cuvke gonagasaid,

₆son dubme álbmogiid:

Das leat dievva rupmašat,

miehtá eatnama

oaivámuččaid oaivvit.

₇Mátkkis son juhká jogažis.

Allagassii son bajida oaivvi.